Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
〔夏令營ê起頭〕
是上帝kā人𤆬來
◎王美書
佇阮來到台中中會復興教會服事進前，復興教會因為種種因素kap武漢肺炎，已經幾nā冬無家己辦兒童夏令營。2023年3月12阮就任了後，因為家己囡仔ê關係，認捌一寡自學ê家長kap囡仔，閣因為教會ê疼心願意開放教會空間hō͘囡仔kap家長做伙活動， 所以，有一陣過去罕得佇教會出入ê兄姊開始佇教會行踏。
彼時，我毋知佗位來ê勇氣，現在回想，精確來看是聖神ê感動。阮看著真濟慕道友開始佇教會出入，有一寡信任感，人已經來，敢講無欲進一步為主來做見證?所以，當我知影有ILT（我愛台灣宣教營）ê方案，就決定暑假來辦營隊。考慮tio̍h有外國青年、在地手語老師ê資源等等，決定用多語言ê特色與形式，用聖經經文kap主題——撒種ê譬喻，配合在地生活踅菜市仔以及到中興大學做自然生態觀察。營隊ê主題曲是聖詩517首「咱的鄉土主所賜」，用台語kap手語教唱。
頭一擺ê營隊kā一寡家長kap孩子結連起來。佇學期中ê逐禮拜五開始有系統ê台語親子共學課程，有合唱、白話字、數學、台灣學等等。上帝通過多語親子夏令營ê種子iā了後，繼續佇平常日生長。
有社區ê家長kap囡仔向望教會ē-sái辦第二擺ê多語營，所以佇2024年，種子變做大樹，用「活命樹」做主題。主題經文kap故事是芥菜子tióng-sêng chiâⁿ-chòe大樹ê故事，主題曲是聖詩第7首「行佇山林小路吟詩謳咾」，在地生活體驗有洗ò-giô-á（薁蕘仔），種作園藝ê植物，佮木工體驗。樹仔佇咱ê身邊，通看，通食，通用……有逐種ê可能性。
今年8月初9到11日佮13日，營隊用共學團規學期試驗發展ê課程，主題是「花」，主題曲是聖詩630首「佇m̂內有一蕊媠花」，閣用馬太福音6章28～29節講出花ê價值。有手語、韓語、日語、台語、排灣語來做花ê相關活動，集中佇媠ê體驗，自然人文ê媠，作花器，作水浸粿，聽台灣原生種百合花ê故事，做排灣族花環，閣有插花藝術。
營隊ê開始毋是我特別規劃才有ê，是上帝kā人𤆬來教會，上帝kā阮感動才有ê。因為，夏令營是愛開費足濟精神、金錢，動員人員來投入–ê；而且，效果定定佇現此時看無。若是欲講因為辦營會就有人受洗，教會人數就大加添，按呢咱一定會失望。總是，親像種子、樹仔佮花，這三个耶穌用來教導咱ê比喻，咱領受聖神ê感動，遮个話語毋是故事爾爾，是針對咱ê活命所發出ê，咱就會看著上帝宣教ê 跤跡，活命ê行踏，疼ê理路。
〔用紙芝居講故事〕
免煩惱，天父會照顧你
馬太福音6章25～34節
文圖◎指方虹希
編譯◎蔡孟辰、林碧堂
註：日本青年指方虹希畫圖，用紙芝居（かみしばい, Kamishibai, 紙戲）kap日本話來講馬太福音6章25～34節hō͘囡仔聽。
|
查某囡仔：我後擺欲買彼領彼款ê衫，嘛想欲買sì-siù-á…m̄-koh我ê錢無夠啦… |
|
耶穌：請看空中眾鳥隻，in無iā種，無種作，in無收割，無收成，in無積聚佇粟倉。咱ê天父給in養飼，咱豈無比in khah貴氣？莫得掛慮食啥物，莫得掛慮lim啥物。 |
|
耶穌：想看山裡百合花，in無著磨，無紡織，所羅門榮華ê時，所穿毋值媠花蕊。 |
|
Ta-po͘囡仔：為啥物天父欲照顧咱？為怎樣我所需要 ê chia̍h-si̍t、衫仔、錢攏會拄拄好無欠？ |
|
耶穌：路尾我欲kā恁提醒，天父疼每一个人，無論發生啥物代誌，只要你khîⁿ-tiâu上帝，伊的確顧守你ê路。毋通為著明仔載操煩；明仔載ê代誌明仔載才操煩。一日ê艱苦一日當。認真過日，聽你心內ê聲，去思考、去判斷，這是上要緊ê！ |
①
②
③
④
延伸閱讀：
