Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
A-hoat peh sī chi̍t-ê chin kut-la̍t ê choh-sit-lâng, i tī soaⁿ-piⁿ hiòng ji̍t-thâu ê só͘-chāi, ū chi̍t-tōa-phiàn ê liú-teng-hn̂g, i chèng chhut-lâi ê liú-teng pá-chúi, tiⁿ koh hó-chia̍h, thong chng ū chhut-miâ, kìⁿ-nā liú-teng chhái-siu chìn-chêng lâm-pak-jī-lō͘ ê liú-teng hoàn-á lóng chá-chá tō chhiúⁿ beh lo̍h-tiāⁿ-chiah, thang bé tio̍h i ê liú-teng. Liú-teng ê siu-ji̍p tn̂g-kî iúⁿ-chhī A-hoat peh in ê kui-kháu-chàu, in sui-jiân bô sǹg hó-gia̍h, m̄-koh ji̍t-chí mā kè liáu chin an-ún.
M̄-koh chòe-kūn tī liú-teng beh hó ê sî, put-sî ē chhut-hiān chi̍t-tīn chha̍t-thâu lâi thau bán liú-teng, in nā lâi–kòe, hn̂g–ni̍h tō chhin-chhiūⁿ hō͘ hong-thai sàu–kòe kāng-khoán, sún-sit chin siong-tiōng. Kúi-nā-pái i khí pò koaⁿ-hú mā bô-chhái-kang, in-ūi chha̍t-thâu sī kui-tōa-tīn ê kâu-san-á, kéng-chhat mā bô châi-tiāu pān, A-hoat peh ê sim-chêng ut-chut koh pi-siong.
Cha̍p-it ge̍h chhe, hn̂g-lāi ê liú-teng liâu-liâu-á hoán-n̂g, koh keng-kòe chi̍t-tōaⁿ ji̍t-chí tō ē-tàng chhái-siu, A-hoat peh ê sîn-keng-sòaⁿ ká chin-ân, put-sî lóng teh siūⁿ beh án-chóaⁿ tùi-hù hia-ê lâi thau-bán liú-teng ê kâu-tīn. Lūn-chin-kóng, A-hoat peh chi̍t-lâng beh tùi-hù chèng kâu-tīn, mā sī khah bô iâⁿ-bīn.
Chit-kang ê thàu-chá, thiⁿ tú phú-kng, A-hoat peh kap A-hoat ḿ chòe-hóe khì liú-teng-hn̂g kò͘ liú-teng, tī hia bô-tāi-chì-chò, A-hoat peh ōe-san-ōe-súi, ū-kóng-ū-chhiò, nn̄g-lâng khin-sang koh hoaⁿ-hí, chit-sî A-hoat peh ê sîn-keng-sòaⁿ chi̍t-ê lēng, siūⁿ kóng kin-á-ji̍t chin tiām-chēng, lóng bô khòaⁿ-tio̍h pòaⁿ-chiah kâu-san-á iáⁿ, chit-má pak-tó͘ iau-kì-kù, seng tńg-khì chia̍h-tàu chiah koh lâi. Ná chai kâu-tīn soah thàn hīt-chūn mā lâi chia̍h-tàu, khòaⁿ–khí-lâi in eng-kai sī thui kah chin-pá, liú-teng sún-sit bē-chió, chit-pái A-hoat peh koh su–ah, in-ūi kâu-san-á pí i tòa khah-kīn, beh lâi liú-teng-hn̂g khah kín !
Thong-chng ê liú-teng sún-sit lú-lâi lú chē, chèng liú-teng ê lâng kiōng-beh tòng-bē-tiâu, ta̍k-ke sio-chio khì kong-só͘ thong-pò͘, ū chi̍t-kang kong-só͘ phài chi̍t-ê lâng lâi kóaⁿ kâu, thiaⁿ kóng chit-ê lâng ê khò͘-tē-á té chin chē chhiong-thian-phàu, phah-sǹg beh ēng phàu lâi kóaⁿ kâu, i khiâ o͘-tó͘-bái ǹg soaⁿ-piⁿ khì, chit-tōaⁿ lō͘ kham-kham-khia̍t-khia̍t, bô hó kiâⁿ, o͘-tó͘-bái tiô-leh tiô-leh, teh-beh kàu soaⁿ-piⁿ ê sî, phàu-á soah po̍k-chà, lâng kap chhia lóng chông-khì khàm-kha, hut kah tōa-kháng-sòe-li̍h, put-lí-a siong-tiōng, chit-pái lâng iū koh su ah, kâu iáu-bē kiaⁿ–tio̍h, soah kiaⁿ tó chi̍t-tīn lâng !
A-hoat peh lō͘-bóe siūⁿ-tio̍h chi̍t-ê pō͘-sò͘, tī liú-teng iáu-bē se̍k chìn-chêng, lia̍h chi̍t-chiah kâu, kā i pa̍k tī hn̂g-lāi, chhiàⁿ i chò pó-choân lâi kò͘-hn̂g, ta̍k-ji̍t A-hoat-peh ài khì liú-teng-hn̂g khoán-thāi i ê saⁿ-tǹg, tī chit-tōaⁿ liú-teng siu-sêng ê kî-kan, soaⁿ–ni̍h ê kâu-tīn khòaⁿ-tio̍h tâng-phōaⁿ hō͘ lâng pa̍k tī hia, lóng m̄-káⁿ óa-khì, chit-pái ê liú-teng ū thò-tòng ê siu-sêng. Siu-sêng liáu-āu, hit chiah kâu ê khang-khòe oân-sêng, A-hoat peh ē chiong i pàng tńg-khì soaⁿ-nâ, hō͘ i chū-iû. Che sī A-hoat peh kah kâu chiàn-cheng ê kò͘-sū !
