Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Tè Khái-sū
Chhòng-chō goán ê Siōng-chú, tio̍h lîn-bín goán:
Pang-chān goán chai-iáⁿ beh-án-chóaⁿ tiàm Lo̍k-hn̂g khiā-khí. Tī hia, lóng bô phah-sńg lōng-hùi. Tī hia, Lí beh-ài kap goán saⁿ-kap kiâⁿ, chò-hóe khiâ kha-ta̍h-chhia. Sù hok-khì hō͘ khoán hôe-siu chu-goân–ê: Lí chiàu Lí ê hêng-siōng chō lâng, in tō chiàu Lí ê khoán-sit kā loān-chau-chau–ê chhiau hō͘ chiâu-chiâu-chê, ta̍k-hāng chiàu in ê chióng-lūi. Kiû Chú lîn-bín.
Ki-tok goán ê Kiù-chú, tio̍h lîn-bín goán:
Kiù goán bô hō͘ hi-hoa ê pháu-chhia, tōa-chiah o͘-thâu-á-chhia bê–khì. Chiah–ê kan-na chhōa goán kín-kín ji̍p-khì tē-ge̍k ê hóe-lô͘. Nā khòaⁿ-tio̍h pùn-sò-tiûⁿ teh hoat ê chhì-phè, tio̍h hō͘ goán ōe-kì-tit Lí ê bián-liû. Nā khòaⁿ-tio̍h ian-tâng á-sī hoat-tiān ê hong-chhia, tō hō͘ goán ōe-kì-tit Lí ê si̍p-jī-kè. Hō͘ goán ōe-kì-tit Lí siū-lān, ōe-kì-tit Lí ū koh-oa̍h. Ki-tok lîn-bín.
Sèng Sîn, goán ê Ùi-chō͘-chiá, Pó-hūi-su, tio̍h lîn-bín goán:
Pó-pì goán chē bá-suh khì hôe-siu chām ê lō͘-thêng. Kā goán hiau-pai kap siáu-tham ê chōe piàⁿ chheng-khì. Chhin-chhiūⁿ hong teh pháng hong-chhia, tio̍h ǹg goán pûn Lí ê hong. Chhin-chhiūⁿ Gō͘-sûn-cheh hit-kang, ēng Lí ê koân-lêng kā goán chhoe hō͘ tín-tāng. Ēng Lí bōe kóng-chhut ê thó͘-khùi sù hok-khì hō͘ ta̍k-hāng ū hôe-siu kì-hō ê mi̍h-á.
Kiû Chú lîn-bín. Amen.
Āu-kì Jean Calvin kóng-m̄-tio̍h. “Liān-ge̍k” si̍t-chāi ū. Góa tiàm hôe-siu chām bat chhin-ba̍k khòaⁿ–kìⁿ.
2008 nî khì Oxford ê Redbridge hôe-siu chām liáu-āu iōng Eng-bûn siá chhú phiⁿ kî-tó sû; 2025 nî kái-siá chò Tâi-oân-ōe, kì-liām Samuel Ruiz García chú-kàu.
