Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Chèng tāu-á ê chiat-kî beh kàu–ah, a-bú beh khì liông-téng chhò tāu-á-lî (chhú kùi-tek-á ēng lâi chò chèng chhài-tāu-á ê khiā-thiāu), kap bán bôa-hui-chí (sóe-saⁿ ê lō͘-ēng) lâi bē hō͘ hoàn-á (siau Ji̍t-pún), án-ne a-bú ē-tàng ke-kiám thàn chi̍t-kóa gōa-lō͘-á. Goán chia-ê gín-á thiaⁿ–tio̍h lāu-bú beh khì liông-téng, tō thó beh tòe lō͘, kóng hó-thiaⁿ sī beh kap tōa-lâng chò-phōaⁿ, lūn-chin kóng si̍t-chāi sī beh khì thit-thô koh bán pa̍t-á.
Soaⁿ ê liông-téng ū kúi-nā châng âng-sim-pa̍t-á chhiū, a-bú bô-êng chhò tâu-á-lî kap peh-khì bôa-hui chhiū-téng bán bôa-hui-chí, hit-sî goán chia-ê gín-á ē peh khì pa̍t-á chhiū-téng, bán âng-sim-pa̍t-á, ná bán ná chia̍h, ū ê bán bē-tio̍h, tō iô chhiū-oe, khioh lak tī thô͘-kha kàu-hun ê pa̍t-á lâi chia̍h, tāi-ke lóng thui kah pá-pá-pá chiah ū beh soah-kó͘. Tī hit ê nî-tāi goán bô-thang bé sì-siù-á lâi chia̍h, gín-á lóng mā ū pún-léng khì tōa-chū-jiân chhōe Siōng-tè só͘ sù ê mi̍h-á lâi boán-chiok. Chit-má ê gín-á m̄-bián thó beh chia̍h, pē-bú to chiong mi̍h-kiāⁿ sàng kàu chhùi–nih, goán khah-chá nā hó-táⁿ kā pē-bú thó khòaⁿ-māi leh, pē-bú koat-toān ē sàng goán chhê-á chia̍h kah chin chho͘-pá !
Tī khoe-piⁿ ū chi̍t châng chin tōa châng ê iûⁿ-meh-á-sái chhiū (Tō͘-eng, Kâu-hoaⁿ-hí), joa̍h-thiⁿ kàu chhiu-thiⁿ ê kî-kan chhiū-téng ê chéng-chí ē kiat kah lúi-lúi-lúi, chéng-chí nā se̍k ê sî, sek-chúi ōe tùi le̍k-sek hoán-chòe o͘-ka-pi-sek, khòaⁿ–khì-lâi chhin-chhiū iûⁿ-meh-á-sái, hong nā chhe–lâi ê sî chhiū-chí chiū lak kah kui thô͘-kha, goán chia-ê gín-á ē khì khioh lâi tām-sám, iûⁿ-meh-á-sái mā sī Siōng-tè siúⁿ-sù ê lé-mi̍h.
Ū chi̍t kang a-pa beh khì chhân–nih chò-sit, góa tòe i ê āu-piah kiâⁿ, kàu chhân-piⁿ ê sî khòaⁿ-tio̍h lō͘-piⁿ ū chi̍t phiâⁿ iá-seng ê chhì-pho, chhì-pho seⁿ kah âng-kì-kì, khòaⁿ–khí-lâi chin hó-chia̍h-khóaⁿ, a-pa sòa-chhiú bán chi̍t ki chháu-á kut, kǹg chi̍t-phāiⁿ chhì-pho ê phoa̍h-liān kòa tī góa ê ām-kún-á, hit-sî góa ê sim tōa hoaⁿ-hí, sui-jiân a-pa bô kóng siáⁿ-mi̍h ōe, m̄-koh a-pa ê thiàⁿ chhin-chhiūⁿ hit-kōaⁿ chhì-pho phoa̍h-liān éng-oán kòa tī góa ê sim-lāi, tiⁿ-but-but !
