咱跤底徛咧ê所在，有主ê心意
◎鍾慧芳
林內ê早起，風輕輕咧吹，田園咧起霧，雞咧啼，狗咧吠，ná像生活ê前奏。坐tī窗仔門邊，看光線慢慢咧轉金，心內浮起四个詞：「呼召」、「參與」、「陪伴」、「著時」。這四个詞，親像四粒種子，種佇心肝內，ta̍uh-ta̍uh-á出芽，叫人反省，mā hō͘人感動。
呼召 是天父tī心內溫柔ê聲
有時親像清早田園ê風，有時親像暗暝燈下ê靜默。呼召m̄是愛咱去遠方，是提醒咱：咱跤底徛咧ê所在，就有伊ê心意。親像tī林內陪長輩啉茶、陪學生寫功課、陪田園咧變化，這攏是呼召ê回應。是主咧講：「你敢願意tī這个所在，活出我ê心意？」
參與 是咱願意踏出一步
無論是煮飯、種菜、陪人散步、聽人講話，攏是參與。參與m̄是做大事，是tī生活中間，細膩、真心，來活出信仰。親像tī社區，陪長輩寫生活ê風景，陪學生看見平凡中ê幸福，陪青年 kòe-ūi （繪畫）夢想ê壯圖，寫出創作ê路徑，這攏是參與。參與是將信仰穿咧身軀， 行入去別人ê故事裡。
陪伴 是上溫柔ê行動
陪伴m̄是講道理，是願意同行。親像咱陪朋友行過低潮，陪厝nih ê人經過病痛，陪社區咧過節、咧祈禱。有時無聲贏過有聲，有時茶一甌、一句請安，就夠額。陪伴是「在場」ê愛，是願意tiàm tī別人ê故事內面，是信仰活出來ê溫度。
著時 是準時、準心、準情
M̄是無閒，是著ê時節、著ê心情、著ê情感。親像咱咧種田，時節若著，種子才會 puh-íⁿ；服事mā是，若心著、時機著，愛就會落地生根。著時是信仰ê精準，是愛ê分寸，是靈性ê成熟。咱若願意tī主ê時間等候，tī生活中細膩咧觀察，tī人群中溫柔行動，咱就會慢慢學會曉「著時」。
這四个詞，ná親像是信仰ê四步舞，mā親像tī社區、家庭、教會中間，活出祝福ê節奏。咱無一定愛做大事，咱是願意tī咱所徛起ê土地， tī咱生活ê細節， khoaⁿ-khoaⁿ-á栽種信仰ê種子，陪伴人、聽見人ê聲、疼惜人。
鄉村ê風景， m̄是觀光ê媠，是生活ê真。有時是tī田園咧種菜，有時是tī外庭咧泡茶，有時是tī教會咧吟詩，有時是tī街頭巷尾請安。這攏是信仰咧落土，是愛咧生根，是咱tī主ê呼召，互相陪伴、共同參與，tī伊ê時間裡，著時。
Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
