Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
文◎申世榮
譯◎周穎杉等人
事實上，我兩冬年前有參加教會舉辦ê菲律賓短期宣教。當時，雖莽我心內對宣教有負擔，總是有真大ê躊躇，到報名截止彼工才勇敢提出申請，he是我頭一擺邁向宣教ê旅程，深深經驗上帝ê計畫kap作為。今年參加台灣基督長老教會舉辦ê「我愛台灣宣教營」（ILT），我是通過網路知影，彼工mā拄拄好是報名截止ê日子。我原底beh放棄，心內雄雄有氣力chhèng出來，路尾我有報名，因為按呢，我來到台灣。
我對台灣無生份。八冬前，我bat佇台中ê靜宜大學留學半冬，對台灣特有ê溫暖kap人情味印象真深。因為ILT，我用完全無仝款ê方式閣來到這塊土地，特別是kap囡仔做伙參與夏季ê聖經學校，我真感動。Kap囡仔做伙笑、謳咾、吟詩、翕相、體驗，用台灣話互動ê日子，我自然對家己ê人生kap未來有khah深ê思考。上帝佇我ê性命種落新ê心、新ê方向kap寶貴ê「果子」。
Beh對韓國來台灣進前，我ê心內感覺真複雜，有時陣半暝睏袂落眠。佇台中復興教會參與ILT，有一節經文成做我極大ê安慰：「所以，毋通為著明仔載操煩；明仔載ê代誌明仔載才操煩。一日ê艱苦一日當。」（馬太福音6章34節）這節經文我以前嘛bat讀真濟遍，這遍hō͘我ê心tit-tio̍h安慰。坦白講，kah仝年歲ê朋友比較，我ê工作生涯猶袂穩定，身軀邊ê朋友kap親人有濟濟攏已經結婚生囝、成家立業。我想著遮ê代誌，就會提in來kap家己比較，嘛發現家己ê生活已經沓沓仔遷徙成做用「我」做中心。
若是一个人愈來愈自我中心，上帝ê話語就會離彼个人愈來愈遠。上帝ê話原本已經離開我ê性命核心，經過這擺ê ILT，我重新佇上帝面前將家己ê心調整hō͘ chiàⁿ，學習對上帝ê眼光看待家己ê人生。我重新體會，毋是根據人ê眼光或是世界ê標準；人佇上帝ê揀選kap計畫來生活，是何等有福氣。因為按呢，無論將來欲去叨位、面對叨一款處境，我深信上帝會一直kap我同在，引𤆬我前向行。
佇我內心，上帝通過約翰福音15章16～17節，hō͘我感受著伊對「另外一粒果子」ê期待：「毋是恁揀我，是我揀恁，閣設立恁，hō͘恁去結果子，閣hō͘恁ê果子久長佇啲，hō͘恁佇我ê名，無論對父求甚麼，伊就hō͘恁。我用諸個命令恁，是欲hō͘恁相疼。」（約翰福音15章16～17節）親像這段經文所講ê，上帝揀選kap設立咱ê目的，毋但是為著hō͘咱得著福氣，嘛是欲hō͘咱佇伊ê疼內面結果子，互相相疼。我深深體會這點。我向望這擺ILT，佇每一个參與ê人ê人生中間嘛結出寶貴ê果子。若是有機會，我向望明年通閣參加。
感謝台灣基督長老教會、台中復興教會ê兄弟姊妹，以及來做志工ê大學生。願耶穌基督保守恁ê健康kap幸福，我會為恁禱告。閣有，這兩禮拜鬥陣生活ê日本朋友KOKI（指方虹希），你做êおこのみやき（廣島燒）實在真好食，多謝你！向望後擺閣再相會！ （原作是韓文）
