Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Káng-su◎Lîm Chu-iū
Kì-lio̍k◎Lí Ú-pêng
POJ◎Khó͘ Phok-sèng
【Pe̍h-ōe-jī】
Koan-hē “Tōa-sú-bēng 3.0”
Iâ-so͘ kóng “soaⁿ-iûⁿ kap mî-iûⁿ” ê phì-jū, thê-chhíⁿ bûn-tô͘ tio̍h chiàu-kò͘ chì-bî-sòe ê 1 ê; Iâ-so͘ iā thong-kòe kap châi-chú ê tùi-ōe, kiò châi-chú tio̍h bōe só͘-ū ê, lâi hō͘ sòng-hiong lâng. Chit 2 chām keng-bûn iau-kiû bûn-tô͘, nā-beh tit-tio̍h éng-oán ê oa̍h-miā, tio̍h si̍t-hêng siā-hōe hok-im, che tio̍h sī “Tōa-sú-bēng 3.0”, mā-sī chōe-chōe Ki-tok-kàu ki-kò͘ leh chòe–ê. Chóng–sī, tōe-hng kàu-hōe kám-ū goān-ì chòe? Chia ê tāi-chì, khó-lêng hō͘ kàu-hōe phòaⁿ-toàn chòe lōng-hùi chîⁿ, lōng-hùi jîn-le̍k, bô-hoat-tō͘ cheng-ka sé-lé jîn-sò͘ ê gia̍p-chek. Só͘-í Iâ-so͘ tō kā i ê bûn-tô͘ kóng: “Góa si̍t-chāi kā lín kóng, hó-gia̍h-lâng ji̍p thian-kok chin khùn-lân!” Nā-sī án-ni, kin-á-ji̍t hó-gia̍h ê kàu-hōe, beh ji̍p thian-kok sī khùn-lân he̍k-chiá kán-tan?
Sióng-siōng “Tōa-sú-bēng 4.0”
“Kiàn-nā góa só͘-ū bēng-lēng lín–ê, tio̍h kà-sī in siú.” (Má-thài Hok-im 28:20) Má-thài Hok-im ê Iâ-so͘ pêng-siông lóng leh kà siáⁿ-mi̍h? Thian-kok. “Thian-kok” tī Má-thài Hok-im chhut-hiān 32 pái! Kun-kù Chú ê kî-tó-bûn í-ki̍p kî-thaⁿ tī Má-thài Hok-im ê kì-chài, chit ê “Thian-kok” tio̍h-sī tī “tōe-chiūⁿ”, che iah hôe-èng Khé-sī-lio̍k só͘ kóng–ê “sin-thiⁿ sin-tōe”, sī kàng-lo̍h tī tōe-chiūⁿ. Iâ-so͘ tùi kûn-chiòng kóng-lūn thian-kok, chóng-sī hit-sî ê kûn-chiòng oa̍h tī Lô-má tè-kok ê thóng-tī tiong-kan, só͘-í tong-sî ū 2 ê kok; Iâ-so͘ pēng bô thoân “Sìn Iâ-so͘ tek éng-seng”, Iâ-so͘ sī thoân “Thian-kok ê hok-im”! Koan-hē “hok-im”, kî-si̍t sī Lô-má tè-kok ê tè-kok soan-thoân, pí-lūn kóng “Lô-má hông-tè ê chhut-sì” tio̍h sī tè-kok tùi choân jîn-lūi ê hok-im. Má-thài Hok-im ê “hok-im” m̄ sī sìn Iâ-so͘ tio̍h éng-oán oa̍h, hoán-tńg sī 1 ê sin ê kok chiong-lâi ē chhú-tāi Lô-má tè-kok. Che iā-sī Chú kà-sī bûn-tô͘ ê kî-tó só͘ kóng: “Goān Lí ê kok lîm-kàu!” Tī Má-thài Hok-im, Iâ-so͘ ū 9 pái siū chheng chòe “Tāi-pi̍t ê kiáⁿ-sun”. Tāi-pi̍t sī Í-sek-lia̍t le̍k-sú tiong-kan siōng úi-tāi ê kun-ông, Tāi-pi̍t ê kiáⁿ-sun tāi-piáu tùi Í-sek-lia̍t ho̍k-kok ê kî-thāi, kî-thāi Iâ-so͘ chòe ông, siū si̍t-bîn ê só͘-chāi ài to̍k-li̍p kiàn-kok. Só͘-í, tī Má-thài hok-im, thian-kok kap to̍k-li̍p kiàn-kok bô-hoat-tō͘ hun-khui.
Cháiⁿ-iūⁿ su-iàu sin–ê hok-im? Lô-má tè-kok ê hok-im kám m̄ hó? In-ūi Lô-má tè-kok sī si̍t-bîn-chiá, siū si̍t-bîn thóng-tī ê lâng su-iàu to̍k-li̍p kiàn-kok ê hok-im. Tùi chit ê kak-tō͘ lâi su-khó, Chú ê kî-tó-bûn tō sī to̍k-li̍p kiàn-kok ê kî-tó. Tâi-oân kap Í-sek-lia̍t kāng-khoán, siū chōe-chōe si̍t-bîn-chiá thóng-tī, iah hŏng sé-náu khì chiap-siū chōe-chōe tè-kok soan-thoân ê “hok-im”. Lán tàu-tóe su-iàu siáⁿ-khoán ê hok-im? Lán beh si̍t-bîn-chiá ê hok-im, he̍k-sī thian-kok ê hok-im? Má-thài ê hok-im m̄ sī “Sìn Iâ-so͘ tek éng-seng”, Má-thài ê hok-im sī “1 ê sin ê kok chiong-lâi ē chhú-tāi si̍t-bîn-chiá ê tè-kok”. Ùi chia, khí-chō kong-gī ê kok-tō͘, tō sī “Tōa-sú-bēng 4.0”!
Lō͘-bóe, Lîm Chu-iū chhōa lán chéng-lí chit 4 ê Tōa-sú-bēng: “Tōa-sú-bēng 1.0 — Hit 11 ê bûn-tô͘ in ê tāi-chì. Tōa-sú-bēng 2.0 — Kiò lán chhōa lâng sìn Chú. Tōa-sú-bēng 3.0 — Siā-hōe hok-lī. Tōa-sú-bēng 4.0 — Khí-chō kong-gī ê kok-tō͘.” I iau-chhiáⁿ lán chò-hóe su-khó: Kin-á-ji̍t ê tōe-hng kàu-hōe khah chōe sī chìn-hêng tó 1 ê pán-pún ê Tōa-sú-bēng? Nā-bô si-hêng kî-thaⁿ ê Tōa-sú-bēng (Tōe 1 hāng í-gōa) ê goân-in sī siáⁿ-mi̍h? (Oân)
【漢羅】
關係「大使命3.0」
耶穌講「山羊kap綿羊」ê譬喻，提醒門徒tio̍h照顧至微小ê一个；耶穌亦thong-kòe kap財主ê對話，叫財主tio̍h賣所有ê，來hō͘喪鄉人。這兩chām經文要求門徒，nā-beh tit-tio̍h永遠ê活命，tio̍h實行社會福音，這就是「大使命3.0」，嘛是濟濟基督教機構teh做ê。總是，地方教會豈有願意做？遮个代誌，可能hō͘教會判斷做浪費錢、浪費人力、無法度增加洗禮人數ê業績。所以耶穌就kā伊ê門徒講：“Góa si̍t-chāi kā lín kóng, hó-gia̍h-lâng li̍p thian-kok chin khùn-lân!” 若是按呢，今仔日好額ê教會，欲入天國是困難或者簡單？
想像「大使命4.0」
「見若我所有命令恁ê，tio̍h教示in守。」(馬太福音28章20節)馬太福音ê耶穌平常攏teh教啥物？天國。「天國」佇馬太福音出現32擺！根據主ê祈禱文以及其他佇馬太福音ê記載，這个「天國」就是佇「地上」，這亦回應啟示錄所講ê「新天新地」，是降落佇地上。耶穌對群眾講論天國，總是彼時ê群眾活佇羅馬帝國ê統治中間，所以當時有兩个國；耶穌並無傳「信耶穌得永生」，耶穌是傳「天國ê福音」！關係「福音」，其實是羅馬帝國ê帝國宣傳，比論講「羅馬皇帝ê出世」就是帝國對全人類ê福音。馬太福音ê「福音」毋是信耶穌得著永遠活，反轉是一个新ê國將來會取代羅馬帝國。這亦是主教示門徒ê祈禱所講：「願祢ê國臨到！」佇馬太福音，耶穌有9擺受稱做「大闢ê囝孫」。大闢是以色列歷史中間上偉大ê君王，大闢ê囝孫代表對以色列復國ê期待，期待耶穌做王，受殖民ê所在ài獨立建國。所以，佇馬太福音，天國kap獨立建國無法度分開。
怎樣需要新ê福音？羅馬帝國ê福音敢無好？因為羅馬帝國是殖民者，受殖民統治ê人需要獨立建國ê福音。對這个角度來思考，主ê祈禱文就是獨立建國ê祈禱。台灣kap以色列仝款，受濟濟殖民者統治，亦hǒng洗腦去接受濟濟帝國宣傳ê「福音」。咱到底需要啥款ê福音？咱beh殖民者ê福音，或是天國ê福音？馬太ê福音毋是「信耶穌得永生」，馬太ê福音是「一个新ê國將來會取代殖民者ê帝國」。對遮，起造公義ê國度，就是「大使命4.0」！
路尾，Lîm Chu-iū 咱整理這四个大使命：「大使命1.0—彼11个門徒in ê代誌。大使命2.0—叫咱人信主。大使命3.0—社會福利。大使命4.0—起造公義ê國度。」伊邀請咱做伙思考：今仔日ê地方教會較濟是進行佗一个版本ê大使命？若無施行其他ê大使命（第一項以外）ê原因是啥物？ （完）
