◎張正雄
巴克禮白話字聖經 kah 現代台語譯本新約聖經 lóng tiāⁿ-tiāⁿ 出現「sìⁿ-miā」chit-ê 詞彙。巴克禮修訂版台語漢字本 kā「sìⁿ-miā」ê 漢字寫做「生命」。現代台語譯本漢羅版 kā「sìⁿ-miā」ê 漢字寫做「性命」。到底 tó 一種寫法 khah 正確？台日大辭典有收錄「生命（seng-bēng）」kah「性命（sìⁿ-miā）」，普通話閩南語辭典台灣版 mā 有收錄「生命（seng-bēng）」kah「性命（sìⁿ-miā／sèng-bēng）」，教育部臺灣閩南語常用詞辭典看 kan-taⁿ 收錄「性命（sìⁿ-miā／sèⁿ-miā）」，《TJ台語白話小詞典》mā 有收錄「性命（sèⁿ-miā／sìⁿ-miā）」。可見「sìⁿ-miā」ê 漢字是「性命」，m̄ 是「生命」。《全民台語聖經》to̍h lóng 用台灣普遍腔 ê「性命（sèⁿ-miā）」。
巴克禮白話字聖經 kah 現代台語譯本新約聖經 tī 馬太福音3章12節 lóng 出現「be̍h-hiūⁿ」chit-ê 詞彙。巴克禮修訂版台語漢字本 kā「be̍h-hiūⁿ」ê 漢字寫做「麥香」。現代台語譯本漢羅版 kā「be̍h-hiūⁿ」ê 漢字寫做「麥芒」。台日大辭典有收錄「芒（hiūⁿ）」kah「香（hiuⁿ）」。M̄ -koh，「be̍h-hiūⁿ」是麥稿 khah 幼 ê 部分，「香」字音義 lóng 無對 tâng。
巴克禮白話字聖經馬太福音6章5節出現「oat-kak」chit-ê 詞彙。巴克禮修訂版台語漢字本 kā「oat-kak」ê 漢字寫做「越角」。其實「越」字是第8聲，「斡」字 chiah 是第4聲。「oat-kak」chit-ê 詞彙，台日大辭典寫做「穵角」。
巴克禮白話字聖經馬太福音6章5節出現「pháng cheh」chit-ê 詞彙。巴克禮修訂版台語漢字本 kā「pháng cheh」ê 漢字寫做「紡織」。台日大辭典有收錄「紡績（pháng-cheh）」kah「紡織（pháng-chit）」。根據台日大辭典 kah 甘為霖台語字典，「cheh」ê 漢字是「績」，m̄ 是「織」。
巴克禮白話字聖經馬太福音9章1～13節、馬可福音2章1～12節、路加福音5章17～26節，tiāⁿ-tiāⁿ 出現「pho͘-á」chit-ê 詞彙。巴克禮修訂版台語漢字本 kā「pho͘-á」ê漢字寫做「舖仔」。根據台日大辭典 kah 甘為霖台語字典，「pho͘」ê 漢字是「鋪」，毋是「舖（phò͘）」。
林俊育長老 bat 寫文章指出，巴克禮修訂版台語漢字本 tiāⁿ-tiāⁿ kā「但是（nā-sī／tān-sī）」，誤寫做「若是（nā-sī）」。M̄ 若 án-ne，巴克禮白話字聖經馬太福音14章34～36節、馬可福音6章53～56節，lóng 有出現「nā sái」chit-ê 詞彙。巴克禮修訂版台語漢字本 kā「nā sái」ê 漢字寫做「若使」。根據台日大辭典「nā sái」ê 漢字是「但使」，m̄ 是「若使」。唐朝詩人王昌齡 ê〈出塞〉：「秦時明月漢時關，萬里長征人未還。『但使（tān-sú）』龍城飛將在，不教胡馬度陰山。」mā 是 kāng 款 ê 用法，只不過唐詩習慣上用文言音讀。
巴克禮白話字聖經馬太福音16章3節出現「o͘-áu」chit-ê 詞彙。巴克禮修訂版台語漢字本 kā「o͘-áu」ê 漢字寫做「黑眑」。根據台日大辭典、普通話閩南語辭典台灣版、甘為霖台語字典 kah 教育部臺灣閩南語常用詞辭典，「o͘」ê 漢字絕對 m̄ 是「黑（hek）」。台日大辭典有收錄「o͘-áu」，漢字寫做「烏拗」。最後我抄錄台日大辭典 ê 例句 hō͘ 大家參考：「入虎喉不（m̄）死亦（iā）烏拗。」
