Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
文圖◎王美書
三、上感動ê時：默想（Labyrinth散步）
佇Labyrinth迷宮（嘛有人kā Labyrinth翻譯做bêng-tīn「明陣」）默想散步是我上感動ê時。這个Labyrinth是榎本光太主任kap同工攏總三个人，開費半年，做伙用手起造起來ê。榎本光太主任有特別講，佇日本有人身事故（じんしんじこ）ê遺族家屬，通過這款方式hō͘心靈ê創傷得著安慰。人身事故是因為意外á-sī家己lak-lo̍h去車頭月台ê事件，對猶活咧ê家屬來講，心內ê苦痛，有時陣根本揣無適當ê語詞來表達，苦楚積聚佇人ê心靈kap肉體，致到歸身軀攏tēng-khok-khok，心內真孤單。來kiâⁿ這个迷宮，毋免講話，毋免出聲，佇kiâⁿ路ê過程，ta̍uh-ta̍uh-á體會上主ê疼kap扶持。
當阮實際操作ê時陣， 一擺一个人入去，聽候5～10分鐘了後閣hō͘另外一个人入去。入去了後，會先kiâⁿ到Labyrinth迷宮ê中心，閣kiâⁿ出來。每一个人家己決定欲如何完成，有時陣tn̄g-tio̍h其他ê人，tio̍h互相看講欲怎樣相閃或是同行，路尾，ài kiâⁿ出來。出Labyrinth迷宮了後，ē-tàng kā家己ê想法寫落來，成做這輪ê默想。
我ê默想kap感動是按呢：
1.逐人攏是一个人入去閣一个人出來
佇這个迷宮行踏ê過程，一定會kap人相拄。相拄ê時，有人因為跤步真緊，所以ài相閃。有ê人kap我差不多，所以ē-tàng勻勻仔相閃。有人佇我後壁tau̍h-tau̍h-á tòe。無論啥款，佇過程中攏毋是一个人，有同伴ê感覺真溫暖。我ê媽媽、後生、教會兄姊攏做伙。
2.我kap囝做伙坐佇迷宮ê中心
Kiâⁿ到中心ê時，我坐落來，也因為坐落來才有法度看著其他人按怎kiâⁿ。Siāng-sî，坐落來閣ē-tàng欣賞周圍ê風景，感受風，鼻花ê味kap有時冷冷有時閣燒燒ê空氣。坐落來ê時，看著母親慢慢仔離開，看著囝向我走來。路尾，囝phēng佇我ê身軀。人際中上親密ê時刻是佇迷宮ê中心，人靜靜停落來ê時，無閣cháu-chông，無閣jiok，無閣追揣sím-mi̍h ê時。佇彼霎，kap我做伙ê兄弟kā阮看，若親像咧見證這个神祕閣美好ê時，總是當我kap囡仔相依倚ê時，阮毋知。
3.攏總ê美好、艱苦、燒絡、同伴攏有時
迷宮終其尾佇時間kap空間攏有結束。有開始，有結束。有入口、迷宮ê路徑、有出口。時間有限，空間有限，鬥陣同行做伴ê人，mā有限。阮這陣參加ê兄姊攏總有10个，佇行ê時，無拄拄攏相拄ē著。我深深體會人ê相拄是偌爾寶貝kap愛珍惜ê。
四、上挑戰ê時陣：默想（靜聽）經文
平常時，阮慣習讀經文，拄著袂曉、無理解ê，就會去揣註解冊或是揣人討論，這款慣習有伊ê必要kap功能。總是，佇遮，tio̍h直接聽候上帝，kā袂曉ê交託伊；這hō͘我體會著經文毋是咱會使控制–ê，有濟濟所在kap時刻，咱因為讀無感覺真不安。總是，上主引𤆬ê方式，突破咱激頭腦ê思考。雅歌是詩，描寫人kap上帝中間ê親密，mā ē-sái講是男女ê愛情。佇無去nǹg-chǹg字句ê意思，無去陷落佇無了解ê不安中間，我看著ê是佇愛情中間ê男女互相kā對方當做媠ê存在，是若花ê女性，是若蘋果樹ê男性。愛情mā是短短ê，有時間性ê。愛情毋是永遠順序，mā有冬天，總是冬天會煞，春天ê媠，是花開滿全地。
上帝通過櫻花滿開來啟示。滿開ê櫻花，媠kah無法度形容。阮經驗hō͘雨拍落地ê花蕊。彼个滿開ê時，有伊ê時，彼个落塗嘛有時。佇台灣，我無可能有這款ê理解。佇彼个時，佇彼地，才有可能佇自然ê櫻花kap落雨ê中間，對照經文，得著特殊ê理解。
五、護照phàng-kìⁿ，考驗阮ê靈性
愛修會ê媠ê體會，佇猶袂離開日本，我kap A-lu（阮囝）佇日本機場有著驚ê經驗，親像是靈性ê考試。入機場，我請A-lu家己保管伊ê護照。入海關進前，ài kā身軀頂紮ê水倒掉。佇彼个倒水ê所在，A-lu kā護照囥佇糞埽桶面頂，kā水倒掉了後，護照就無去矣。
彼時，阮開始緊張，母仔囝四界揣，四界cháu-chông想辦法。代先，阮請清潔人員kā收起來ê糞埽lok-á phah開，阮去péng糞埽，無揣著。阮轉去check-in ê櫃台，請寄行李ê工作人員鬥相共。阮去服務櫃台報案。煞接，因為其他ê團員攏已經入去，所以，我聯絡媽媽，團員中ê Iông-iông牧師娘，請in鬥揣看覓，敢有收起來？
時間真緊就過去，1點鐘了後猶袂揣著。我kap A-lu心內想講可能ài去報失講護照phàng見，今仔日就ài蹛佇機場。兩个人心噗噗chháiⁿ，A-lu開始責備家己，我mā講家己tio̍h擔責任，上無咱mā是做伙留咧。
路尾，A-lu ê護照是一个團員掠準是家己ê就收起來，飛行機起飛進前ê 40分鐘發現。機場ê服務人員分做兩組鬥相共。櫃台小姐𤆬阮去海關門口接護照，登機處遐ê小姐送護照來，佇提著護照彼霎，阮母仔囝teh欲哭出來，心內充滿感激，充滿感謝。
A-lu kā我講，伊kap我對「失去閣揣著ê聖經故事」會有全新閣親身ê體會。佇生活中拄著ê代誌，成做阮理解耶穌ê比喻上好ê家私，阮兩人佇機場互相扶持，阮做伙為對愛修會轉來ê兄姊祈禱ê時，閣是一个聖家族。坐佇飛機頂，阮母仔囝對相，bún-bún-á-chhiò。我自然想著「冬天已經過，雨已經煞」ê主題經句，閣有另外一款屬佇阮ê理解！ (完)
前期：
