Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
台南市永康國小五年8班ê學生 指導老師：蘇晏德
我ê家庭
◎黃柏翔
我ê家庭有足chē人，攏對我足好，像我ê阿媽，伊對阮足好，ta̍k工攏煮飯hō͘阮食，伊煮ê飯非常好食，伊是阮厝上gâu煮食ê，我以後beh kā阿媽學煮飯。
我ê阿公會算命，tī我出世ê時陣，伊不只替我算命，猶幫我收驚，真正足厲害。我ê阿弟仔足古錐，chit-má也kah我kāng款讀永康國小。伊差我四歲，tī放假ê時陣，伊攏會kah我做伙sńg，我kah伊攏sńg籃球、棒球。阮攏sńg kah足歡喜，tī我ê心目中，伊是我上kah意ê阿弟仔。我ê阿爸是一ê厲害ê人，ta̍k工攏足早起來準備上班，伊是阮全家上拍拼ê人，我ê阿母嘛足厲害，ta̍k工攏幫我準備早頓，我ê家庭所有ê人不只對我真好，嘛對我真關心ê家庭，我感覺足幸福。
我ê家庭
◎謝皓富
我ê阿爸愛lim酒，佳哉伊lim酒有節制。但是阿爸lim酒了後會起性地真歹，我實在真驚。我ê阿爸一擺koh一擺lim酒，阿爸lim酒ê時，攏會拍人，我ê阿母一擺koh一擺hō͘阿爸機會，阿爸攏無珍惜，chit-má我ê阿母hō͘阿爸最後一擺機會。以前阿母就kā阿爸講過：「Mài lim ah，lim酒會kā家己ê身軀攏拍歹。」但是阿爸攏繼續lim酒，hō͘阿母真煩惱，為伊teh操煩，只有講：「lim酒是慢性自殺，阿爸ê身體是m̄是beh健康，就看伊beh減lim–無。」阿母想beh kah阿爸分開，就kā我講：「看你kah阿姊beh tòe阿爸抑是阿母？」我hām阿姊攏beh tòe阿母，我希望阿爸減lim酒，請阿爸保重，好好仔顧伊ê身體。
我ê阿母
◎林昕渝
我ê阿母m̄-nā足súi，koh足巧，伊會chhōa我去遊樂園sńg，koh會chhōa我去食好食ê物件。我ê阿母是全世界上蓋好ê人，伊會tī我有困難ê時陣kā我鼓勵、tī我艱苦ê時陣安慰我。我ê阿母嘛是我上好ê靠山，tī我有危險ê時陣，保護我hō͘我度過難關。我ê阿母是全世界上疼我ê人，會煮物件hō͘我食、買chhit-thô物仔hō͘我sńg買衫褲hō͘我穿koh買紙hō͘我做手工ê物件。我ê阿母是全世界上偉大ê人，伊是我ê加油團，ta̍k工攏會kā我加油，hō͘我元氣滿滿。伊會chhōa我去全世界上好sńg ê所在sńg，koh會chhōa我去食全世界上好食ê物件，所以我上愛我ê阿母、上kah意我ê阿母。
我上敬佩ê老師
◎侯禹榕
我上敬佩ê老師是毛定然，伊是我三、四年級ê老師，伊ê個性真趣味，有時陣真𠢕會講sńg笑，m̄-koh beh期中ê時陣，伊就m̄-bat講sńg笑，攏足認真複習，會補充一寡其他ê題目，hō͘阮考更好ê成績。伊ê身材無蓋好，伊ê腹肚圓滾滾，身koân也無koân，但是伊對我kah其他同學真好。伊會教我kah另一ê同學華語朗讀，教kah足認真，是一ê好老師。伊ê平時考足困難，我有真chē bē曉，m̄知按怎寫，所以我愛認真讀冊，bē使貧惰，才會得著較好ê成績，較好ê名次，hō͘老師khah歡喜，嘛hō͘厝nih ê人khah歡喜。
心情
◎黃亭瑄
我ê心情有時陣歡喜、有時陣無歡喜。考試考好我就真歡喜、阿母chhōa我去食物件我也會真歡喜；但是，只要考試考無好，我就會無歡喜，心情無kāng款。人ê心情，一定會無kāng款，ta̍k家ê生活，只要你過了好，你ê心情就會足歡喜。每一層代誌，你ê心情攏無kāng，猶有kāng款ê代誌ta̍k家心情mā也無kāng款。你今仔日ê心情是好是bái？心情好，你一定會過了真好。我希望ta̍k家ta̍k工攏歡歡喜喜。阮厝內面ê人攏講：若是心情無好，一定愛食糖仔，因為糖仔甜甜食了會hō͘心嘛甜甜。希望ta̍k家心情無好ê時，食一粒糖仔試看māi。希望ta̍k家有好心情，好好仔過每一日。
溪頭一日遊
◎許立昀
Tī我小學四年級ê一ê假日，hit時陣姨婆講beh chhōa我去溪頭peh山，呼吸新鮮ê空氣，hō͘身體更加健康。Hit時陣聽tio̍h真歡喜，因為我真少去溪頭，所以有人願意chhōa我去，我就足歡喜，因為阿媽peh山ê時陣，我teh上課，我kā阿爸阿母講，阿母講siuⁿ無閒ah，無時間。來到溪頭我足歡喜趕緊落車，一落車我就看tio̍h足chē大樹和花草，完全kah我tī台南ê時陣無kāng；溪頭空氣好，無像台南ta̍k工空氣攏無好。Sòa落來阮先去大學池peh橋，因為he是竹仔做–ê，所以我真好奇，就行足chē擺。後來姨婆kā我講chit-má beh開始peh山，遐ê kiā足chē，peh到跤u足無力。阮一直peh，koh轉來原點，一落山就看tio̍h遊覽車tī無外遠ê所在，hit時陣姨婆講beh轉來，後擺有機會chiah koh來。
