◎楊國禎
Tī lán Tâi-oân chng-kha nā-sī ū chi̍t-ê lâng i iân tōa-ke sió-hāng chi̍t-hō͘ kòe chi̍t-hō͘ khì kā lâng thó chia̍h-mi̍h, a̍h-sī thó chîⁿ-gûn, goán lóng kiò i sī khit-chia̍h; nā-sī tī tōa to͘-chhī ê hóe-chhia-thâu, sī-biō hù-kīn chū-chi̍p–ê, iōng ba̍k-chiu chi̍t-nih góa to̍h chai in sī iû-bîn, che nn̄g khoán lâng bōe án-chóaⁿ phái hun-piān; tē saⁿ khoán lâng to̍h sī tiàm-tī chhài-chhī-á té, in ū khiā–teh, ū chē–teh, ū phak–teh, koh hòng-sàng A-kiat-á pi-chhám ê koa-siaⁿ tī thô͘-kha teh pê, pài-thok bé-chhài–ê hiaⁿ-ché sī-tōa si-siá in kim-chîⁿ, in cha̍p-kho͘ bô hiâm chió, chi̍t-pah-kho͘ bô hiâm chē, chi̍t-khoán lâng khah chhan-chhiūⁿ sī khit-chia̍h, só͘-í bōe-sái kā in chheng chòe iû-bîn; tē-sì-khoán lâng sī ké tian-kông bōe siong-hāi-lâng–ê iû-bîn, góa lâu-teh chòe-āu chiah kā tāi-ke kóng.
Lán lóng chai-iáⁿ Tiong-kok kiōng-sán-tóng sī bô ín-chún lâng tī chhia-thâu, káng-kháu, chhia-chām hù-kīn lâi chòe khit-chia̍h a̍h-sī iû-bîn, hoān-nā sī chit-khoán lâng ê ē hông lia̍h-khì chài-kàu-io̍k.
Téng-kang, góa khòaⁿ-tio̍h tùi-bīn ê mī-tiàm-á lāi-bīn ê chit-ê lú-sèng Youtuber, i cháu-khì Báng-kah Liông-san-sī ê tùi-bīn chham ke-iú khai-káng, tī iáⁿ-phìⁿ ē-bīn ū-lâng kā mē, kóng i tiau-kò͘-ì kā Tâi-oân siōng kē-chân ê lâng ê seng-oa̍h hip hō͘ lâng khòaⁿ, koh mē i teh siat-to̍k Tâi-oân lâng, i tī têng-á-kha hām ē-hâi hoa̍t tn̂g-tn̂g ê chhùi-chhiu ê o͘-chí-sáng khai-káng, hit-kang o͘-chí-sáng chiong i thâu-khak-téng teh tì ê hi̍t téng bō-á sàng hō͘ i, sió-chiá i bô hiâm lah-sap, chek-sî kā hi̍t-téng bō-á tì tī i ka-tī ê thâu-khak-téng; o͘-chí-sáng koh kà i lim ûi-sū-pì thàu tin-tin lô͘-sún-chiap, bōe-su-kóng o͘-chí-sáng hām i chá toh sī se̍k-sāi ê pêng-iú kāng chi̍t-khoán.
Àm-sî nā lâi-kàu Tâi-pak chhia-thâu, tī chap-tiám í-āu, iû-bîn ke-iú ē kā chhia-thâu pau-ûi, in m̄-sī teh beh khòng-gī, chí-put-kò in ta̍k-lâng lóng kā tn̂g-tn̂g ê chóa-phoe the̍h chhut-lâi pho͘ tiàm thô͘-kha chòe bîn-chhn̂g ū thang hioh-mî.
Tiàm-tī Tâi-oân ê iû-bîn ē-sái bián hām siàu-liân Tāi-pit saⁿ-chan-chhiūⁿ, ūi-tio̍h beh siám-pī Sò-lô ê tui-sat khì bih tī A-tō͘-lân (I Sat-bó-ní-kì 22:1-5); sīm-chì m̄-bián chhin-chhiūⁿ lán bó͘-chi̍t-ê bîn-chú ūn-tōng ê chiân-pòe ūi-tio̍h siám-pī Kéng-pī Chóng-pō͘ sòa lâi chiâⁿ-chòe cheng-sîn sit-siông, iōng siang-chhiú hô͘ phun-chúi lim hō͘ lâng khòaⁿ. Che to̍h-sī góa tú-chiah kóng ê tē-sì-chióng iû-bîn.
Tī Tâi-oân chòe iû-bîn put-tàn bōe siū kî-sī, koh-ū, tōa-pō͘-hūn ê iû-bîn lóng chai-iáⁿ khì chit-ê só͘-chāi, chit-ê só͘-chāi ē-tàng hō͘ in chi̍t lé-pài sé sin-khu saⁿ-pái, múi chi̍t-pái hān-tiāⁿ siōng-kú ē-sái sé jī-cha̍p hun-cheng lóng m̄-bián chîⁿ.
Kok-ūi pêng-iú, lín kám chai-iáⁿ chit-ê só͘-chāi kiò siáⁿ-mi̍h miâ? Tiàm-tī Tâi-pak siáⁿ-mi̍h só͘-chāi? Sī phang-phang sóe-e̍k-keng (香香澡堂).
