◎杜信龍
就算春天無花無蕊，有你佇咧就予我安慰
自由ê風行家己路，將來好歹著鬥看顧
失去ê咱欲叨位揣，金銀財寶佮土地
一條性命閣值偌濟，拚勢活咧為我講話
我會閣轉來，無論上天抑落海
轉來咱山裡、田園佮你鬥種菜
親像以早作曲唱歌予你聽
牽手散步逐日平安好心情
我會閣轉來，攑頭看你著會知
轉來咱山裡、田園做伙流目屎
親像以早拍拚開墾過山嶺
過節我去拍獵你煮飯予我食
佇遮叫你ê名，欲寫予你ê批
阮心肝搐搐仔疼，你著愛守護家，囝愛晟
若是叫阮ê名，阮ê魂魄綴你行
陰陽隔離一片壁，穿你車ê衫褲，我今欲起行
我會閣轉來，失禮予你來等待
轉來咱厝裡，土地予你好未來
無像現陣予你跋落一片苦海
堅強度日目屎吞肚內
春天落雪訴無奈，敢是臭香番薯八字歹
你ê美麗失光彩，唱歌著愛暗蓋悲哀
我會閣轉來，原諒我這不應該
轉來看顧你，我心一生ê所愛
免閣驚惶免強忍青春拖去埋
笑容不再無閣再開眉
春天開花無底代，是咱心肝抛荒起警戒
你ê性命替我栽，後世惜你命命一擺
我有轉來，恁敢知
我一定攏有轉來，恁定著攏知影
