Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◉Lîm Phek-tông
整理◉王美書
一、地方教會對大專中心ê期待
就我ê了解，台灣基督長老教會（PCT）地方教會對大專事工ê期待kap思考至少有三種：
頭一種：有一寡教會講大專中心學生團契佇教會用水、電、灶跤；總是，禮拜ê時，學生無來，事工嘛無參與。教會向望團契學生加入教會。
第二種：免設立大專中心，hō͘較有氣力ê地方教會直接聘青年牧師、聘宣教師來牧養大專生，進入學校內面做福音事工。這款方式雖莽有優點，總是出發點猶原是用地方教會做中心，地方教會ê大專團契受地方教會組織ê管轄。
第三種：地方教會用正面支持ê態度kap行動，開放場所互大專學生團契聚會，或是奉獻金錢、教會有人來作志工輔導。
二、 我所知ê PCT大專工作強調ê團契自治、自傳、自養
團契自治，是培養團契內底ê人通過開會、討論來決定事工、決定預算，以及kap畢業團契ê契友做伙參與信仰團契ê起造。這是跨教會、跨教派，甚至跨族群ê工作。
舉一個例，台中大專中心林佳勳牧師落實團契自治。佇我讀中興大學參加中興長青團契（中興長青）ê時陣，有一擺，PSF（Presbyterian Student Fellowship，台中大專中心ê各團契會長kap各團契選立一名代表組成ê學生聯合團契，各團契通過PSF結連）佇西屯教會參詳事工kap代禱，知影有ê團契無法度補助學生參加活動。中興長青同工會決議，用家己團契ê錢補助其他團契ê兄姊參與營會，有無相通，見證福音。這層代誌了後，林佳勳牧師對我講，團契ê學長學姊一定真歡喜恁做這款決定。
中興長青開同工會，約略八个大學生咧自由發想，計畫事工，分配團契粒積到今有ê二、三十萬欲按怎使用。對照復興教會，2025年長執會決議，任何超過5000箍ê開銷，無論啥款事工，攏比照七星中會大直教會採購備品設備ê做法，必須經過長執會同意。
大專事工對人格ê培養、信仰ê塑造，攏超越地方教會ê治理。大學生知影真緊就會世代交替，成員逐年攏變化，錢項kap事工著緊緊做、緊緊用；中興長青到今無欠用，畢業生願意奉獻，知影團契有咧運作，有咧栽培，是分享耶穌基督恩典ê信徒。
團契自傳，是學生去招學生來參加，學生通過大專中心收集ê名單來聯絡、同學相招。我佇全國社青讀經營拄著中興長青ê學妹，伊講：「我來讀大學，發現啥物款ê邪教社團攏有。拄開始，我逐个社團攏去，總是，人ê頭殼若較正常，就會比較，漸漸發現奇怪ê所在。有一工，我佇社團博覽會看著信望愛社，有團契學生招我來參加中興長青，佇復興教會禮拜，得著當時復興教會ê執事照顧。」
佇大學內底tiāⁿ-tiāⁿ是無仝款ê基督徒團體，長青團契、校園團契、學園團契等等做伙成立一个社團，比論講信望愛社。這時常是長老教會青年接觸其他基督徒學生ê起頭，mā是基督徒學生佇大學內底傳福音ê起頭。佇我讀冊ê時，校園團契kap學園團契攏有派宣教師佇中興大學；獨獨PCT ê大專中心無直接派宣教師駐校，是學生帶領學生，這是自傳。
團契自養，就是靠有志奉獻。台中大專中心目前ê經費來源，超過40%是畢業ê契友kap認同ê兄姊奉獻（向望比例閣較濟）。有25%是願意支持大專工作ê地方教會兄姊佇大專工作者去請安募款ê時奉獻ê。中會直接撥落來ê補助無到30%。認同各大專中心事工對學生ê信仰塑造ê人，就會獻心、獻錢、獻力來支持各大專中心工作。
三、個人觀察kap經驗分享
（一）大學城邊仔ê教會特色
復興教會經驗流動kap無穩定。2025年，佇復興教會禮拜ê人有70% kap 2004年ê無仝款。最近20冬，禮拜人數（包含主日學）佇78人到140人中間起起落落。2025年，佇復興教會主日禮拜kap主日學ê成員中間，0～14歲ê人有21%、65歲有28%；台中市南區0～14歲有13%，65歲以上有16%。復興教會ê成員流動速度真緊，也不時充滿舊kap新ê成員衝突。
復興教會佇中興大學ê邊仔。2025年，中興大學ê在學生有15萬845人，3% ê學生是外國人。仝年，復興教會松年團契較固定ê契友有26个，有22个捌出國，甚至有超過一半捌長期佇外國生活，有體會無仝文化、國籍、語言、種族、地區ê經驗。每一个佇大學城邊仔ê教會，攏有才調成做普世閣釘根佇本地ê教會。
（二）對台中大專中心ê學生工作ê觀察
這15冬中間ê大專學生，毋但是國籍、種族或是語言ê改變，年齡kap性命發展mā也改變。
1.國籍、種族kap語言ê改變
2023年9月到2025年12月ê中間，復興教會接待領國際飢餓對策協會獎學金ê非洲學生，in來讀中興大學ê農業學程。佇生活kap文化差異極大ê時，中興長青團契ê一寡契友chhōa in去款逐項代誌，譬論講手機仔、郵局口座、買生活用品，mā教in數學。非洲學生原底kap中興長青團契做伙聚會，路尾因為語言kap團契聚會進展ê挑戰，佇一學期了後就分開聚會。
2024年7月，非洲學生參加復興教會ê社青團契中間ê以利亞國際小組，成員有三分一是復興教會kap附近教會ê兄姊；三分一是國際學生，包含飢餓對策協ê非洲學生、中興大學kap其他大學ê國際學生、有興趣ê外國少年家；三分一是對外口來ê兄姊，不時有新ê人。這个國際學生小組，是地方教會、大專中心、國際性ê協會ê協力，是另外一種大專學生工作ê開展kap努力。
2023年2月，阮佇復興教會建置同步口譯系統，這是阮佇台南神學院ê時陣學tio̍h–ê。彼時，神學院有美國來ê宣教師亞大偉牧師負責翻譯，對台語翻譯英語，對英語翻譯台語，hō͘來南神讀冊ê國際學生kap本地師生聽；chiah-ê國際學生對馬來西亞、印尼、緬甸、太平洋島嶼等等ê國家來。佇軟體，需要有翻譯ê人；佇硬體就是發送kap接收翻譯ê機器kap耳機。
若有外國朋友來教會，教會較普遍ê做法是根據外國朋友ê語言來開設彼款語言ê禮拜，比論講英語禮拜、越南語禮拜。總是，徛佇主體性kap資源運用ê角度，同步口譯會當保全在地教會ê主體性，閣結連普世。2023～2025年，復興教會佇禮拜ê時陣，上少會出現台語kap英語；講無仝語言ê會眾仝時陣吟唱仝一條歌， 甚至，siāng-sî用五、六種ê語言吟詩謳咾、感謝祈禱、信仰告白。有時，阮會根據來禮拜ê外國兄姊ê國籍kap族群，選擇聖詩中間屬佇伊ê語言或是民族ê歌謠。一首歌，會當翻譯作無仝ê語言，成做合一ê禮拜ê要素。
大專中心ê學生工作受挑戰，國際學生ê大專工作加倍受挑戰。復興教會本身就是外國人來協助設立ê。1974年，德國牧師郭合德、芬蘭宣教師吳仁娜通過德國黎明啟差會來台灣，佇復興教會做上帝ê工。佇復興教會猶是支會ê時，台中大專中心洪振輝牧師kap中中巡迴牧師兵世哲輪流來主持禮拜。復興教會頭一擺ê聖餐奉獻就是支持大專中心ê事工。復興教會ê起頭，就是普世閣在地ê結合，親像chit-má，親像PCT ê起頭，是蘇格蘭、英格蘭、威爾斯、加拿大、美國、日本、芬蘭、德國、濟濟國家ê宣教師kap在地信徒，做伙建立起來ê。PCT是普世閣釘根本地ê記號。2025年，一寡國際學生、我kap一寡教會ê長老、執事、主日學教員去國小做文化交流。小學生通過教會，認識世界ê基督徒kap上帝多元ê創造。國際學生通過教會，到台灣ê小學，認識台灣ê教育系統kap師生互動。學校ê教員通過教會，接觸福音，福音ê種子掖出去。Logos Spermatikos。宣教是上帝ê宣教。
2.大專學生ê年齡kap性命發展改變
中興長青團契對2004年開始佇復興教會聚會，彼時，無畢業生參與團契聚會。Chit-má，聚會有大學生、有拄畢業無偌久ê畢業生，嘛有重新閣來做學生ê前畢業生。對有社會經驗、有家庭等等閣轉去讀冊ê人來講，生活ê世界kap拄拄十八歲高中卒業ê少年家無仝。對無仝款年齡、性命發展無仝階段ê大專學生，大專中心所需要做ê工作就會無仝款。將青年事kap大專事工做適當ê整合是必要；整體化思考，閣針對無仝性命ê發展。比論講，大專kap教會鬥陣發展親子共學團kap主日學結連來支持有家庭ê學生；針對少年學生，有無仝款ê探索營、生涯規劃、查經、國際交流等等。
3.紹介一个舊閣新ê大專青年事工方案
「我愛台灣宣教營」（ILT，總會ê青年事工，邀請國外友好教派差派青年來台灣參與在地教會ê夏季學校，促進國際ê教會青年kap事工交流）創造機會hō͘有家庭ê學生kap少年學生做伙同工，是有國際性閣有在地性ê福音事工。
2023年到2025年，復興教會連續三冬申請ILT來辦理夏季學校。招生ê對象有小學生kap家長，親子共學辦理營隊。ILT佇在地ê教會，有大學生kap專業師資，包含基督徒、慕道友；有主日學師生kap家長，嘛有社區ê兒童kap父母；有對無仝國家來ê基督徒學生kap志工。PCT ê信仰告白：「教會是普世閣釘根佇本地。」親像Vuluk Palimdai牧師設計聖詩ê封面， 是用基督作中心，是新ê世代、超宗派、多元文化、多元語言，成作合一ê福音事工。2025年，復興教會夏季學校有台語、日語、韓語、英語、手語、排灣語六種語言做伙運用，佇營會中間，攏有主體性：用排灣族語紹介花ê故事kap花環佇排灣族ê用語kap重要性；用手語kap台語來吟聖詩〈佇苺內有一蕊媠花〉，用日語kap紙芝居 （Kamishibai）演出耶穌講毋免為明載日掛慮ê譬喻（馬太福音6章）；用韓語來紹介人蔘ê傳說kap地理。
多元參與者通過屬耶穌ê在地教會領受上帝ê恩典。大專學生成做地方教會ê代表去接待外國青年，共同生活kap服事，培養開闊ê心胸kap靈性。面對無仝款，冤家、衝突是素常；總是，佇基督耶穌ê疼，著學習怎樣安搭家己ê不安，佇上短ê時間內面，通過交陪友情、深化對自我ê認識kap對別人ê理解，互相成全，攏是有可能ê。
四、建議：
我對PCT ê地方教會、大專中心、中會kap總會提出淡薄仔ê建議：
（一） 對地方教會ê建議
地方教會開放空間kap時間，hō͘大專團契佇教會聚會。教會參與ILT，促進普世kap在地ê參與，嘛hō͘大學生有做伙同工ê機會，用正面ê角度來參與大專事工，拍破堂會主義。
（二）對大專中心ê建議
Kap地方教會合作，鼓勵學生佇畢業了後參與在地教會，奉獻支持大專中心。受大專中心栽培ê人，毋通干焦會曉批評、失望教會ê現實，著勇敢參與教會事工kap團契，甚至成做執事kap長老，通過組織同心合一來「傳揚福音kap關懷社會」，活出咱所經驗閣體會著ê無仝款ê信仰活命。
（三）對中會ê建議
長老教會ê體制是中會主義，有ê中會對山到海，對鄉村到都市，對田野到漁港，逐款人攏包含佇中會各教會內底，教會事工本質就是多元–ê，親像大學，是對全台灣，甚至是對全世界來ê人組合起來ê。大專中心是培育教會未來同工、中會幹部ê所在。中會ê青年部kap大專中心合作─事工有分開來做ê，嘛有做伙做ê─發展新閣有創意ê事工，親像台中大專bat舉辦培育教會青少年輔導ê養成課程。
（四）對總會ê建議
若是佇中會層次攏無才調做研發或是思考方案ê時陣，總會ē-tàng調查、研究大學城邊仔ê教會狀況，發展類似ILT這款ê方案，將地方教會、大專事工以及總會攏結合做伙，落實教會一體、普世閣在地ê宣教。
