Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Lōa Phek-chhong
1977 nî, góa in-ūi khó tio̍h Tâi-pak ê ha̍k-hāu, thâu chi̍t pái ài lī-khui kò͘-hiong kàu hit ê hoân-hôa ê to͘-chhī tha̍k-chheh kap seng-oa̍h, tùi m̄-bat lī-khui Tâi-tiong ê chng-kha gín-á lâi kóng, sim-lāi kín-tiuⁿ koh kiaⁿ-hiâⁿ. Khì Tâi-pak hit-kang, tng góa chē ê hóe-chhia khui kàu ūi, góa kiâⁿ chhut chhia-thâu ê sî, khòaⁿ-tio̍h chē-chē tī goán kò͘-hiong m̄-bat khòaⁿ kòe ê kéng-siōng, ū chin koân ê tōa-lâu, hō͘ lâng kiâⁿ ê thian-kiô kap nǹg ji̍p-khì thô͘-kha ê tē-hā-tō; tī chia kiâⁿ-lō͘ ê lâng e-e-tīn-tīn, lāu-jia̍t kún-kún, in ê chhēng-chhah liû-hêng, kiâⁿ-lō͘ chin kín, lō͘–nih ê o͘-tó-bái, kè-thêng-chhia, kong-chhia kap kheh-ūn lóng chhih òa lâi koh bē sio cheng tio̍h. Lūn-chin kóng, chia ê su-ki si̍t-chāi ū kàu lī-hāi; góa chhāi tī hia, gông-sîn gōng-sîn, khòaⁿ chin kú, khòaⁿ kàu ba̍k-chiu beh chhut-chiap mā m̄ kam sóa-kha. Chit-má siūⁿ–khí-lâi, hit-chūn, Tâi-pak lâng it-tēng khòaⁿ ē chhut góa sī chi̍t ê pah-bīn ê chng-kha-sông !
Ha̍k-hāu khai-o̍h, góa chham-ka ha̍k-hāu ê ha̍p-chhiùⁿ-thoân, thoân–nih ū chi̍t ê ji̍t–sî teh siōng-pan thàn-chîⁿ, àm-sî tha̍k iā-kan-pō͘, súi-súi ê cha-bó͘ ha̍k-seng, i ê kò-sèng oa̍t-phoat koh tāi-hong, góa ê kò-sèng pì-sù koh an-chēng, ta̍k-pái góa piān-nā khòaⁿ tio̍h i teh khòaⁿ góa ê sî, góa ê bīn tō piàn kah âng-kì-kì, kóng ōe ē kā-chi̍h, m̄ chai beh án-chóaⁿ chiah hó. Siūⁿ-bē-kàu i bô kā góa khì-hiâm koh chin ài chio góa chò-hóe khai-káng.
Ū chi̍t pái, goán tī ha̍p-chhiùⁿ-thoân liān koa soah, i chio beh chhiáⁿ góa chò-hóe khì Tiong-san-pak-lō͘ chia̍h gû-pâi kap lim ka-pi. Góa siūⁿ kóng kā-ki chia̍h kah chiah tōa-hàn lóng m̄-bat chia̍h kòe chit nn̄g hāng mi̍h-kiāⁿ, in-ūi chin hòⁿ-kî chiū ióng-kám chiap-siū i ê iau-chhiáⁿ. Hit-kang goán khì kàu iok-sok ê hit keng chhan-thiaⁿ, chhan-thiaⁿ ê chong-hông chin khì-phài, góa khòaⁿ tio̍h chhài-toaⁿ ê kè-siàu sī kùi-som-som, kin-á-ji̍t ài hō͘ lâng chhiáⁿ, kám-kak chin pháiⁿ-sè, m̄-kú i kóng bô iàu-kín: °ßGóa ū teh thàn-chîⁿ, bián hoân-ló.°®
Teh tán-thāi gû-pâi chiūⁿ-toh ê sî, ū khek-pôaⁿ pò-sàng hó-thiaⁿ ê im-ga̍k, khì-hun chin hó, pa̍t-toh ê lâng-kheh chi̍t-tùi chi̍t-tùi thn̂g-kam-bi̍t-tiⁿ teh kóng sè-siaⁿ-ōe. Sui-jiân goán bô chhiūⁿ in an-ne, m̄-kú chit-chūn goán iā ū tām-po̍h-á teh tâm-loân-ài ê kám-kak kap chi̍t-sut-sut-á tiⁿ-tiⁿ ê chu-bī. Gû-pâi chiūⁿ-toh ah, ū chhiám-á, to-á pâi kui pâi, góa chit ê chng-kha-sông m̄ chai-iáⁿ sī beh án-chóaⁿ khai-sí chia̍h. I khòaⁿ chhut góa ê tiû-tû tō kà góa ài án-chóaⁿ chia̍h. Gû-pâi ê chu-bī ū-kàu hó, bô-jōa-kú tō chia̍h kah chheng-khì tam-tam, i koh pun chi̍t-kóa hō͘ góa chia̍h kàu-khùi.
Ka-pi ê sî-kan kàu lah, khong kim-piⁿ ê ka-pi poe-á chin hó-khòaⁿ, o͘-sek ê ka-pi ná tāu-iû leh, m̄-kú ka-pi ê khì-bī chin phang, chit pái góa siūⁿ kóng mài koh làu-khùi, ài lâng kà góa án-chóaⁿ lim, tō gia̍h khǹg tī phiat-á téng hit ki sè-ki thng-sî-á iúⁿ ka-pi khí-lâi lim, ûn-ûn-á tam, lim khí-lâi chin kāu-kang. I khòaⁿ góa án-ne teh lim ka-pi, it-ti̍t bûn-bûn-á chhiò, lóng bô kóng-ōe, góa mā m̄-chai tàu-té sī hoat-seng siáⁿ-mi̍h tāi-chì. Kòe chi̍t-khùn-á góa khòaⁿ tio̍h i phâng poe-á khí-lâi lim ka-pi, góa chiah chai, chhám–ah ū kàu làu-khùi !
