Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Iû Nái-kî
Tī chit-tōaⁿ keng-bûn tiong, Iâ-so͘ tùi chèng-lâng kóng phû-tô-hn̂g ê phì-jū. Chit-ê phì-jū iân-sio̍k 20 chiuⁿ chi̍t-khai-sí Iâ-so͘ tī Sèng-tiān só͘ tú–tio̍h ê sū. Lō͘-ka 20 chiuⁿ khí-thâu Iâ-so͘ tī Sèng-tiān teh kà-sī lâng koh thoân hok-im. Chè-si-tiúⁿ, keng-ha̍k-su kap tiúⁿ-ló lâi chit-būn Iâ-so͘ ê koân-pèng. Chóng–sī Iâ-so͘ bô hām-ji̍p in só͘ siat-kè ê lô-bāng, kū-choa̍t hôe-èng in ê chit-būn. Iâ-so͘ sûi-sî ǹg chèng-lâng kóng-khí phû-thô-hn̂g ê phì-jū, ēng án-ni lâi chí-chek hiah-ê gia̍h-to thàm gû-pēⁿ ê chè-si-thâu, keng-ha̍k-su kap tiúⁿ-ló.
Chit-ê phì-jū sī teh thê-chhíⁿ thóng-tī-chiá m̄-thang bōe-kì-tit Siōng-Chú chiah-sī hit ê ū koân-pèng–ê. Chú-lâng chiong i ê phû-tô-hn̂g kau-thok hō͘ tiān-lông lâi koán-lí. Phû-tô-hn̂g chiū-sī Í-sek-lia̍t; chú-lâng sī Siōng-Chú; tiān-lông chiū-sī chè-si-thâu, keng-ha̍k-su kap tiúⁿ-ló chiah-ê Iû-thài siā-hōe ê thóng-tī kai-chân. Siōng-Chú chiong Í-sek-lia̍t kau-thok hō͘ chè-si-thâu, keng-ha̍k-su kap tiúⁿ-ló lâi koán-lí. Tān-sī in khiok lia̍h-chún ka-kī sī chú-lâng. Tng Siōng-Chú chhe-phài i ê po̍k-jîn lâi thoân-ta̍t Siōng-Chú ê chí-ì ê sî, in m̄-nā bô beh thiaⁿ, koh phah Siōng-Chú ê po̍k-jîn, chiong in kóaⁿ–chhut-khì. Siōng-Chú pēng bô in-ūi án-ni lâi siū-khì, hoán-tó-tńg chhe-phài koh-khah-chōe ê po̍k-jîn khì kàu in ê tiong-kan. Chiah-ê tiān-lông bô leh sìn-táu. Sīm-chì chòe-āu ūi-tio̍h siūⁿ-beh kè-sêng chú-lâng ê châi-sán, thâi-sí chú-lâng só͘ chhe khì ê káiⁿ.
Iâ-só͘ tùi chèng-lâng kóng chit-ê phì-jū, si̍t-chè-siōng mā sī teh tùi chit-būn I ê chè-si-thâu, keng-ha̍k-su kap tiúⁿ-ló kóng: Siōng-Chú chiah-sī hit ê ū koân-pèng–ê, lín put-kò sī I ê tiān-lông, m̄-thang ûi-pōe I; lín iā m̄-thang kū-choa̍t I só͘ chhe-phài–ê, koh khah m̄-thang thâi-sí I só͘ thiàⁿ ê kiáⁿ. Chè-si-thâu, keng-ha̍k-su kap tiúⁿ-ló put-kò sī Siōng-Chú kau-thok lâi koán-lí Iû-thài siā-hōe ê lâng, m̄-thang chhiàm-hūn siūⁿ-beh lâi ka-kī chòe Í-sek-lia̍t ê Chú.
Phì-jū ê chòe-āu chú-lâng bô koh chài hō͘ tiān-lông ki-hōe hóe-kái, i châu-bia̍t chiah-ê tiān-lông, chiong phû-tô-hn̂g chō͘ hō͘ pa̍t-lâng. Iâ-so͘ soan-kò͘ tiān-lông ê kiat-kio̍k liáu-āu, chèng-lâng kóng ”Chhian-bān m̄-thang ū chit-koán tāi-chì!”. Thiaⁿ-kìⁿ chit-ê phì-jū ê lâng lóng chai-iáⁿ tiān-lông ê hêng-ûi sī m̄-tio̍h ê. Chèng-lâng ê hoán-èng sī chit-chiuⁿ keng-chat ê koan-kiàn, in-ūi chèng-lâng ê bêng-lí hō͘ keng-ha̍k-kàu-su kap chè-si-thâu m̄-káⁿ tong-tiûⁿ hē-chhiú lia̍h Iâ-so͘. Iā sī in-ūi án-ni, keng-ha̍k-kàu-su kap chè-si-thâu tùi Iâ-so͘ ê put-boán kap oàn-hūn ná ke-thiⁿ. Iâ-so͘ bô in-ūi án-ni chiū tò-kiu, I ēng Kū-iok ê keng-bûn chòe chi̍t-ê giâm-lē ê kiat-bóe: “Góa chiū-sī lín só͘ khì-sak ê chio̍h, sī beh chiâⁿ-chòe siōng tiōng-iàu ê ki-chio̍h–ê, lín khòaⁿ-chòe bô kè-ta̍t–ê ōe kā lín teh kah chhùi-kô͘-kô͘ ”.
Thó-lūn
Keng-ha̍k-kàu-su kap chè-si-thâu sī Iû-thài siā-hōe tiong ê cheng-eng, in chai-iáⁿ Iâ-so͘ ê phì-jū sī teh chí in. In tī Iû-thài siā-hōe tiong, tam-jīm koán-lí ê kak-sek, soah ūi-tio̍h ka-kī ê lī-ek bô beh ho̍k-chiông Siōng-Chú ê koân-pèng. Keng-ha̍k-kàu-su kap chè-si-thâu èng-kai sī siōng liáu-kái Siōng-Chú ê lâng, in se̍k-sāi Sèng-keng kap lu̍t-hoat, soah bô goān-ì sêng-jīn Iâ-só͘. Lán thang mn̄g ka-kī, lán ê hêng-ûi kám ū chhin-chhiūⁿ tiān-lông? Lán tī ka-kī só͘ tam-jīm ê kak-sek tiong, kám ū sî-sî thê-chhíⁿ ka-kī m̄-thang bōe-kì-tit lán chí-sī Siōng-Chú kau-thok ê koán-lí-chiá? M̄-thang ūi-tio̍h ka-kī ê lī-ek kap su-io̍k, thâi-sí Siōng-Chú chhe-phài lâi ê lâng. Siōng-Chú ê jîn-chû sī iú-hān ê, i ōe lâi châu-bia̍t tiān-lông, chiong phû-tô-hn̂g cho͘ hō͘ pa̍t-lâng. “Chhian-bān m̄-thang ū chit-khoán tāi-chì!”.
Gîm Sèng-si
Tē 4 siú “Thiⁿ-ē bān-kok chèng-lâng tio̍h thiaⁿ”
Kî-tó
Tī-lí bān-pang chip-chiáng koân-pèng ê Chú ah, goān goán chiâⁿ-chòe khiam-pi ê tiān-lông. Tī lí ê phû-tô-hn̂g tiong, jīn-chin phah-piàⁿ chòe-kang, chiong it-chhè ê kóe-chí kau tī lí ê chhiú-lāi. Nā ū siu-sêng, sī lí ê un-tián. In-ūi lí ê jîn-chû kap kong-gī, goán beh chiong chiah-ê un-tián hun-hióng hō͘ sin-piⁿ ê lâng. Bô chhiàm-hūn lâi ka-kī chòe phû-tô-hn̂g ê Chú. A-men.
Hêng-tōng hong-àn
Ū kóng phì-jū ê lâng, chiū ū thiaⁿ phì-jū ê lâng. Lán kám chai-iáⁿ Iâ-so͘ ê phì-jū só͘ chí–ê sī siáⁿ-lâng? Chhiáⁿ koan-chhat lán ê Tâi-oân siā-hōe. Chéng-kô ê siā-hōe kiat-kò͘ tiong, kám ū keng-ha̍k-kàu-su kap chè-si-thâu chit-khoán-lâng chûn-chāi? Siā-hōe tiong ê koán-lí-chiá kap thè chèng-lâng hoat-giân–ê, in ê hêng-ûi kám ū chhin-chhiūⁿ keng-ha̍k-kàu-su kap chè-si-thâu hiah-ni̍h à-pà? Chhiáⁿ chiong kin-á-ji̍t só͘ tha̍k ê keng-bûn tùi-èng tī chi̍t-kiāⁿ Tâi-oân siā-hōe só͘ hoat-seng ê sū-kiāⁿ téng-bīn. Su-khó cháiⁿ-iūⁿ ēng phû-tô-hn̂g ê phì-jū lâi lí-kái Siōng-Chú ê chí-ì.
