Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Chá-khí, thiⁿ phú-kng, gōa-bīn lo̍h kui mê ê sap-sap-á hō͘, chi̍t sì-kè lóng siûⁿ-leh-leh, piah-kak-á ê thô͘-kha chheⁿ-tî seⁿ kah kāu-kāu-kāu.
Hit-chūn góa iáu-kú sī chi̍t ê la̍k-chhit hòe ê cha-bó͘-gín-á, bô-hoân-bô-ló, chē tī hō͘-tēng-kha teh nà-liâng, liâng-hong bî-bî-á chhoe kòe gîm-chîⁿ piⁿ ê hit châng lāu lêng-géng-chhiū, chhoe kàu góa ta̍k-ki ê thâu-mn̂g-si lóng teh thiàu-bú, sim-lāi ū kóng bē chhut-lâi ê hoaⁿ-hí.
Chit chūn góa khòaⁿ-tio̍h a-má thâu tì koe-le̍h-á siūⁿ beh chhut-khì mn̂g-kháu-tiâⁿ piⁿ, lâ chi̍t-kóa tek-se tńg-lâi hiâⁿ-hóe, i chē tī hō͘-tēng, kha long-ji̍p-khì kòa-kóng-ê lāi khiok kám-kak kha-té ū nńg-nńg siûⁿ-siûⁿ ê mi̍h-kiāⁿ tī hia, i tō sûi kā kha thiu–chhut–lâi, kòa-kóng-ê tò khà, hit-chūn chi̍t chiah pûi-chut-chut ū kàu bái-khòaⁿ ê chiuⁿ-chî thiàu–chhut–lâi ! Hit-sî ê góa kiaⁿ kah kui-sin-khu chhàng ke-bó-phôe, hiám-hiám-á háu–chhut-lâi, sui-jiân kàu-taⁿ chit-chân tāi-chì keng-kòe sò͘ cha̍p nî kú, chit ê hō͘ góa tio̍h-chheⁿ-kiaⁿ ê ìn-siōng iáu-kú chhim-chhim ìn tī sim-lāi, í-āu piān nā khòaⁿ tio̍h kòa-kóng-ê ê sî, tō ē siūⁿ tio̍h hit chiah pûi-pûi iū koh bái-khòaⁿ ê chiuⁿ-chî bih tī hia !
