Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎鄭加典
一世人認真打拚
為錢為利拚輸贏
權勢地位好名聲
終尾身心攏痛疼
心靈空虛孤單影
肉體倦懶閣軟茈
一生日子若幻影
終尾追求閣是啥
人生在世愛知影
命運三分天註定
留有七分靠打拚
哭賴上主𣍐得成
人生苦杯主知影
全心倚靠免驚惶
克盡本份細膩行
遵照上主旨意行
較贏試煉繼續行
上主攝理會得成
人生意義會是啥
學習隨主跤步行
聽主的聲尊主名
信靠主價值連城
活出多彩的性命
利益人榮光主名
珍惜寶貴的性命
享受活命的真餅
注神看主向前行
到尾允當入天城
Chit-sì-lâng jīn-chin phah-piàⁿ
Ūi chîⁿ ūi lī piàⁿ su-iâⁿ
Koân-sè tē-ūi hó miâ-siaⁿ
Chiong-bóe sin-sim lóng thàng -thiàⁿ
Sim-lêng khang-hi ko͘-toaⁿ iáⁿ
Gio̍k-thé ià-lán koh nńg-chiáⁿ
It-seng ji̍t-chí ná hoàn-iáⁿ
Chiong-bóe tui-kiû koh sī siáⁿ
Jîn-seng chāi-sè ài chai-iáⁿ
Miā-ūn saⁿ hun thiⁿ chù-tiāⁿ
Lâu ū chhit hun khò phah-piàⁿ
Khàu-lōa Siōng-chú bōe tit chiâⁿ
Jîn-seng khó͘-poe Chú chai-iáⁿ
Choân-sim oá-khò bián kiaⁿ-hiâⁿ
Khek chīn pún-hūn sè-jī kiâⁿ
Chun-chiàu Siōng-chú chí-ì kiâⁿ
Khah-iâⁿ chhì-liān kè-sio̍k kiâⁿ
Siōng-chú lia̍p-lí oē tit chiâⁿ
Jîn-seng ì-gī oē sī siáⁿ
Ha̍k-si̍p tòe Chú kha-pō͘ kiâⁿ
Thiaⁿ Chú ê siaⁿ chun Chú miâ
Sìn-khò Chú kè-ta̍t liân-siâⁿ
Oa̍h-chhut to-chhái ê sìⁿ-miā
Lī-ek lâng êng-kng Chú miâ
Tin-sioh pó-kùi ê sìⁿ-miā
Hióng-siū oa̍h-miā ê chin-piáⁿ
Chù-sîn khòaⁿ Chú hiòng-chiân kiâⁿ
Kaù-bóe ún-tàng ji̍h thiⁿ-siâⁿ
