Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎黃文宏
Lán知影，牧師ài傳達上帝ê旨意。Chiah-ê旨意，聖經有記載足濟，所以，牧師不時ài用聖經ê話語，提醒門徒。信義立志beh做牧師，chit點伊一定知影，所以伊隨時tō去做。親像 ……
有一工，放學了，信義tī學校門口等正義做伙kiâⁿ tńg去，伊看tio̍h林同學一个人，冊包á phāiⁿ咧，頭-lê-lê，面色無siáⁿ歡喜，向伊kiâⁿ過來。
「林同學，你是án-chóaⁿ，看起來心情無好neh。」
「今á日，我kah張同學冤家sio拍，阮去chhōe正義主持公道… …」
「正義án-chóaⁿ講 ?」
「正義講張同學khah m̄-tio̍h，叫張同學kā我道歉。」
「張同學有kā你道歉boh ?」「有。」
「有tō好，你是án-chóaⁿ心情無好。」
「張同學做kah sioⁿ過分，伊kan-nā對我講一句 : 『林同學，我kā你道歉』，按呢niâ … …。我足m̄-kam願，我足受氣。」
「Á無beh按怎做，你chiah bē koh受氣?」
「我mā m̄知影。」
「林同學，以早你kah張同學是m̄是好朋友嗎？」
「是，阮以早lóng逗陣做伙sńg。」
「林同學，你kám有想beh以後koh kah伊做伙sńg ?」
「張同學做了sioⁿ過分，我足受氣。伊已經m̄是我ê好朋友，以後我無beh kah伊做伙sńg。」
「林同學，明á載我叫伊去kā你會失禮，á你kah伊合好，以後lín tō是好朋友，lóng ē-tàng koh做伙sńg，好–無 ?」
「今á日，我有叫張同學koh kā我會一个失禮，m̄-koh伊bô-ài，我足受氣。」
「林同學，你是因為張同學無koh kā你會失禮，chiah開始受氣，á-sī是本來tō咧受氣 ?」
「我kah伊冤家了，到chit-má，lóng一直足受氣。」
「林同學，張同學kám有承認，伊khah m̄-tio̍h ?」
「伊有承認。正義主持公道ê時陣，有解釋互伊聽，伊聽了，tō tìm頭，表示同意，對我講 : 『林同學，我kā你道歉』。」
「林同學，我有一个方法，ē-tàng hō͘張同學，tī明á載，去kā你會失禮，án-ne以後lín tō是好朋友，tō ē-tàng koh做伙sńg。」
「Siáⁿ-mi̍h方法 ? 」
「林同學，我chit-má叫你mài受氣，你有法度boh ?」
「我做bē到，我chit-má足受氣。」
「無要緊，足濟人lóng做bē到。上要緊是，tī明á載以前，你mài koh受氣。一个人ê面，nā是受氣ê面，he是beh冤家sio拍ê面，ta̍k-ê人看tio̍h tō足討厭，beh ná有可能去kā伊會失禮，是m̄是?」「… …」
「林同學，我知影你chit-má足受氣。M̄-koh受氣mài到日落，án-ne，我tō叫張同學，明á載去kā你會失禮。Lín以前tō是好朋友，我相信張同學一定想beh以後ē-tàng koh kah你做伙sńg。」
「… … 受氣mài到日落?我kám做ē到?」
「我kā你講，che足濟人lóng做ē到。」
「你ná知影足濟人做ē到? Á in是靠siáⁿ-mi̍h氣力去做?」
「聖經以弗所書4章26節，án-ne寫：受氣m̄-thang到日落。足濟人聽過聖經chit句話，足濟人相信聖經án-ne講，一定是足濟人lóng做ē到，所以，你nā相信你做ē到，你nā有信心你做ē到，你tō一定做ē到。」
「Chiah簡單?」
「Hèⁿ ! Tō是chiah簡單。」
「M̄是ài足有修養，修練kah道德足好ê老人，chiah做ē到?」
「M̄免。你nā是有信心你做ē到，你tō做ē到。」
「好，我來試看māi咧。」
「林同學，你án-ne講，你tō做bē到。」
「是án-chóaⁿ按呢tō做bē到?」
「若是kan-taⁿ siūⁿ kóng bóng 試看māi leh，你m̄是真正有信心。」
「好，我chit-má有百分之百ê信心，一直到日落。」
隔tńg工，chit二个細kiáⁿ koh開始烏白sńg，sńg kah起冤家，tī運動埕jiok-來-jiok-去，嬉嬉嘩嘩，全校ê老師kah同學，看tio̍h攏ná笑ná hàiⁿ-thâu。
