◎林碧堂
台灣聖經公會2025年10月出版《聖經──現代台語譯本羅馬字漢字語詞對照》（Sèng-keng─Hiān-tāi Tâi-gú E̍k-pún Lô-má-jī Hàn-jī Gú-sû Tùi-chiàu，下稱《語詞對照》）。翻譯小組向望這本語詞對照互讀者閣較清楚《現代台語譯本漢羅版聖經》（下稱《現代台語譯本》）所使用 ê 羅馬字 kap 台語漢字 ê 意思。
參與《現代台語譯本》翻譯小組24冬久 ê 張宗隆牧師講：「翻譯聖經ê時陣，發現有 ê 聖經 ê 字詞真困難用台灣話來表達，所以想真久。咱嘛有保留一寡較古早 ê 話，向望互較少聽著 ê 現代讀者有傳承 kap 了解。有當時仔咱讀聖經會走音去，因為咱受華語 ê 影響真大，咱翻譯 ê 時會盡量照台灣話 ê 語法翻譯。我佇做兵進前攏是讀白話字 ê 聖經，是因為中國國民黨政府禁止白話字；我佇軍隊內底𣍐（bōe）當用羅馬字 ê 聖經，我才開始讀和合本。閣因為我自細漢到今，攏佇台灣受教育，我較無親像對美國、英國、日本接受神學教育了後轉來台灣 ê 牧者 á-sī 教師，in講 ê 台灣話較會受著別款強勢語言文法 ê 影響；我佇這个小組內底參與真長 ê 時間，大概攏是用這款 ê 立場，向望咱 ê 台灣話有文化 kap 歷史 ê 傳承，嘛互讀者對聖經有了解，所以，我繼續參與這本語詞對照 ê 編寫。」
台中教育大學梁淑慧教授講：「這本《語詞對照》攏總收錄1萬687 ê 字詞，照羅馬字 ê 排列作索引，利便用羅馬字來查考。有一寡台語辭典是照部首，有 ê 是照筆畫，有 ê 是照注音符號。咱這本《語詞對照》用羅馬字來排列本身就有歷史 ê 傳承（《甘字典》kap《Maryknoll台英辭典》），內面有羅馬字、台語漢字、經文舉例，以及中文意思。事實上，無論是教會內 á 是教會外 ê 讀者，攏會發現宗教 ê 用詞較毋是日常生活中間 tiāⁿ-tiāⁿ 出現–ê ，《語詞對照》互教會內 ê 人較明白《現代台語譯本》 ê 用字 kap 用法，互教會外 ê 人熟似台語聖經，幫贊攏總 ê 讀者認捌聖經 kap 基督徒 ê 信仰。」
《現代台語譯本》所使用 ê 台語漢字，kap 教育部編訂 ê 《臺灣閩南語推薦用字》並無完全仝款，《語詞對照》會另外用中括符[ ]，kā 教育部 ê 推薦用字標示出來；親像編號3132，白話字是 hō͘-mn̂g-á，台語漢字是雨濛[毛]仔，經節舉例是申命記32章2節，中文 ê 意思是毛毛雨。若白話字拼音 kap 教育部拼音有出入 ê 時，會另外用小括符( )標示出來，譬論講編號8737，白話字 soa-bô͘（bo̍k），台語漢字是「沙漠」，經節舉例是以賽亞書43章19節以及耶利米書25章24節，中文意思是沙漠、曠野。
梁淑慧講：「《語詞對照》有聖經 ê 例句，通成做編寫台語─台語辭典 ê 基礎。而且， chit-má 真濟所在有開設台語班，有教育系統培育出來 ê 師資；所以《語詞對照》互讀 ê 人較了解這兩款系統。」張宗隆講：「佇真濟所在，官方 ê 腔口會用首都 ê 腔口做標準音；親像日本是用東京做標準音，英國是用倫敦做標準音。另外，真濟國家政府對語言發展 ê 介入非常 ê 深，想欲用國家強制 ê 力量來掌握語言 ê 發展。總是，咱 ê 聖經翻譯是真正有歷史佮文字 ê 考查，是濟濟專家 ê 參與所產生 ê，是欲互教育部做參考–ê。咱無 kan-taⁿ 照中華民國教育部所發展 ê 系統來做。」（作者為長老教會牧師）
