◎葉國基
敢是3月天 ê 春雷 tân？
敢是隔壁莊 teh 娶新娘？
遠遠傳–來是嘣嘣叫 ê 聲，
啊，是 he 夭壽兵仔 teh 彈銃。
驚惶 ê 靈魂 一暝無眠，
等待天光 ê 心情有夠長。
惡夢，永遠 ê 記持 khǹg tī 胸坎。
枉屈，敢真正 tio̍h 愛放水流遠？
一港一港 ê 紅血
印落去後山 ê 田園，
一滴一滴 ê 目屎
滴落去冷 ki-ki ê 枕頭。
天 tú 光，沉重 ê 牛車路
載–轉-來是三個守寡 ê 絕望，
後山 ê 精英一人拍二槍。
上帝啊，上帝啊，這敢攏事實？
月娘，bih-tī 菅芒後流目屎，
日頭，歇 tī 烏雲頂毋敢出–來。
驚惶 ê 查某人，大門鎖 ân-ân。
傷心 ê 土地，苦難 ê 島嶼，
歷史 ê 過客，受埋葬 ê 故事。
歡喜 ê 莊頭變做死氣 ê 街路，
啥物是祖國，祖國佇 tó-loh？
阿娘啊！
Beh 嚎 tō 儘量嚎，
Beh hoah tō 儘量 hoah，
毋 thang 勉強，毋 thang 壓制，
講甚麼咱 tō 用疼痛相款待？
講甚麼咱 tō 用寬容相往來？
（作者為前世界台灣同鄉會聯合會會長）
