Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎黃欽書
Tān-í-lí su 2: 1
Nî-pò͘-kah-nî-sat chē-ūi tē-jī-nî, Nî-pò͘-kah-nî-sat bāng-kìⁿ; sim peh-pak bōe khùn-tit.
Tān-í-lí su 2: 5
Ông kóng, Hit ê sū góa í-keng bōe-kì-tit lah; lín nā bô chiong góa só͘ bāng-kìⁿ kóng hō͘ góa thiaⁿ, sòa kóe-bêng i, chiū beh chiong lín ê bah koah chhùi-chhùi, iā lín ê chhù beh chòe pùn-sò-tui.
Í-chá thiaⁿ goán bó͘ kóng-kòe in bú-á tī pòaⁿ-mî chin kāu bîn-bāng kiam ē-kóng bîn-bāng-ōe, ū-sî ná chhin-chhiūⁿ hām lâng teh oan-ke hoa̍h kah chin tōa-siaⁿ án-ne.
Tùi kin-nî khai-sí góa tī pòaⁿ-mî ū hoat-hiān goán thài-thài ē kóng chi̍t-kóa thiaⁿ bōe chheng-chhó li-li-lu-lu ē bāng-ōe, góa teh siūⁿ, i mā tài-tio̍h in bú-á ê chèng-thâu. Tng i kán-ná teh kóng bîn-bāng-ōe ê sî-chūn, góa ē tiām-tiām-á thiaⁿ, bē kā chhá–khí–lâi, kàu-tī i khai-sí hoat-chhut ki-ki-kiò ê siaⁿ-im, góa to̍h-ē kā i ê thâu-khak-óaⁿ so-so-leh, hō͘ i Put-ti put-kak chhéⁿ–khí-lâi …… I ē khì pàng chi̍t pû jiō koh tńg–lâi kè-sio̍k khùn. Thiⁿ-kng-chá i ē kā góa kóng i cha-mî koh tú-tio̍h pháiⁿ-lâng.
Goán bó͘ ê sim-lāi nā bô pêng-an, i ê chhú-lí hong-sek lóng-sī khì Koan-im-sī chhōe su-hū thè i chè-kái, che-sī i sò͘-cha̍p-nî-lâi ê si̍p-koàn. I kā góa kóng, nā-sī khì chhōe i-seng, i-seng lóng ē khui tìn-chēng-che hō͘ lâng chia̍h, án-ne bô khah khùiⁿ-oa̍h .
Lâng chò-bîn-bāng ū-sî ē kì kah chin-chheng-chhó, ū-sî chhéⁿ–khí–lâi to̍h bōe kì-tit liáu-liáu. Nî-pò͘-kah-nî-sat ông ka-tī kā pòaⁿ-mî bāng-kìⁿ ê tāi-chì phah-m̄-kìⁿ koh ngē beh chhōe-lâng mn̄g i tàu-té chòe siáⁿ-mi̍h bāng, lán pēng bô hoat-tō͘ chhin-chhiūⁿ i ū chit khoán ê koân-le̍k.
Tú-tn̄g góa lāi-sim nā bô pêng-an ê sî, góa lóng ē kî-kiû Siōng Chú ēng kám-siā ê kî-tó hām Chú kau-thong, lō͘-bōe góa ē kóng “sī beh chiàu Lí ê chí-ì m̄-sī chiàu góa ê.” Bān-hāng tāi-chì góa lóng beh tùi I kám-siā. Tī chit-hong-bīn goán bó͘ nā-sī tú-tio̍h bô pêng-an, i tāi-khài ê pān-hoat sī seng-tī lāi-sim àm-liām Se̍k-kàu(釋教) la̍k-jī-chin-giân, chit-sî góa hi-bāng i mā ē-tàng tit-tio̍h pêng-an.
Thiⁿ-pē A-pa, góa beh chhiùⁿ-koa o-ló Lí, o-ló Lí sī choân-ti choân-lêng ê Tōa-chú-cháiⁿ, tī góa seng-khu-téng hoat-seng ta̍k-hāng ê hó tāi-chì á-sī pháiⁿ tāi-chì, pòaⁿ-mî chò hó-bāng ā-sī phái-bāng, che lóng ū Lí ê hó chí-ì.
