Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
> Chèng-tī Siáu-lâng
Chi̍t pang lo̍h lâm ê hóe-chhia nih, chi̍t ê a-kong-á thoa chi̍t chhia hôe-siu-phín, chhùi nih put-sî ngāu-ngāu-liām kóng: “Tú-chiah Má Eng-kiú chiah kiò tiān-ōe hō͘ góa, goán kóng chi̍t-khùn, liâm-piⁿ ōaⁿ Chu Li̍p-lûn khà hō͘ góa, góa kā i kóng ài án-chóaⁿ chò chiah hó.” Kui-lō͘ chhi-chhi chhū-chhū, kóng kah ná chin ê leh, góa siūⁿ khí-lâi mā ài chhiò. Tâi-oân lâng ū kàu lī-hāi, liân khioh jī-chóa ê lāu-lâng tō ū châi-tiāu kah chóng-thóng kap tóng-chú-se̍k kóng tiān-ōe, Tâi-oân eng-kai sī choân sè-kài it-lia̍p-it ê bîn-chú kok-ka, jîn-bîn chiah sī kok-ka ê thâu-lâng lah!
> Chi̍t lia̍p tō hó
Chē hóe-chhia ê sî, keh-piah chē chi̍t tùi má-sun-á, a-má chin ū chhiò-sîn, gín-á ba̍k-chiu tōa lúi koh kó͘-chui, in nn̄g lâng ná khòaⁿ hong-kéng ná khai-káng. A-má ê chhiú–nih the̍h chi̍t pau thn̂g-á, sun-á ê ba̍k-chiu put-sî ē khòaⁿ tùi hit pau thn̂g-á khì. Sun-á kā a-má kóng: “A-má, thn̂g-á m̄ hó chia̍h siuⁿ chē oh, chi̍t lia̍p tō hó!” A-má tō the̍h chi̍t lia̍p thn̂g-á chìⁿ loeh sun-á ê chhùi–nih. Hóe-chhia khin-khin khong-khong kè-sio̍k ǹg chêng kiâⁿ, kòe chi̍t-khún-á kú, sun-á kā a-má kóng: “Thn̂g-á siáⁿ-mi̍h kháu-bī?” A-má kóng: “Chhì-pho.” Sun-á kóng: “Chin hó chia̍h neh! M̄-koh m̄ hó chia̍h siuⁿ chē! Chi̍t lia̍p tō hó!” A-má koh sàng chi̍t lia̍p ji̍p-khì i ê chhùi–nih, tō án-ne chi̍t pái koh chi̍t pái, chi̍t lia̍p tō hó! Chiong-kî-bóe hit pau thn̂g-á lóng chia̍h liáu-liáu ah !
