口述◎張宗隆
記錄◎江委螗
佇咱人生ê中間，kā聖經重新讀一遍，對聖經有新ê理解。用我家己做例，我細漢ê時，感覺聖經寫–ê攏是歷史事實，毋過我chit-má ê認捌就毋是按呢。有人會想講，若按呢，聖經ê權威佇叨位？毋拘，咱若sió-khóa了解聖經ê性質，咱是毋是會用新ê角度、新ê態度重新koh讀聖經？
我對聖經ê分類是用時代環境來分，hâm傳統分類無相siâng，希望我ê分類ē-tàng幫贊咱讀聖經ê時，對時代背景有較了解。
聖經ê紹介
▍聖經是一phō（部）叢書，是基督信仰上基本ê經典
聖經是百科全書，總是，按呢講ê意思毋是講你欲chhōe啥物款ê問題攏ē-tàng ùi聖經內面chhōe–tio̍h。聖經內面足濟文學類型，嘛包含tng-sî ê科學觀念、歷史觀念等等，通講是一種雜菜滷，甚至兩个人立場無siâng，欲對聖經內揣根據，攏可能揣會著根據。欲按怎？聖經就是這款冊，也予人感覺真奇怪ê冊。
聖經是基督教ê經典。聖經內面ê舊約是猶太教kap基督教ê經典。平平講基督宗教，佇中文ê翻譯，基督教是新教，天主教是另外一个宗教。總是，遮所講ê基督宗教，新教kap天主教攏是Christianity，是基督信仰。傳到東方，稱呼無相siâng，其實攏是一家人，親像加爾文所講ê：咱敬拜上帝毋是kan-na佇教會敬拜上帝，敬拜是普世ê教會做伙敬拜，包括已經轉去上帝遐ê聖徒嘛做伙敬拜。加爾文hō͘咱知影「普世性」，信耶穌ê人，無論是東正教、天主教攏是一家人，基督信仰是普世–ê。聖經就是「基督信仰一家人」ê根據。
基督宗教是一个有經典ê宗教。欲讀、解釋、了解聖經愛注意，袂使kan-na照家己ê想法。咱會使有家己ê詮釋，毋過若欲分享出來，著愛有正規ê解釋或是程序。這就是詮釋學，是佇神學上較麻煩嘛較深ê問題。
▍聖經是經歷真長ê年代，對真濟角度kap立場收集資料、著作、編寫而成ê經典
聖經是經過足長–ê時間寫出來ê。保守派認為對創世記到申命記這五卷攏是摩西寫–ê。這中間其實經過幾若百冬寫出來–ê，可能是為著欲建立一個權威，所以才講是摩西寫–ê。咱若有這款理解，咱就ē-tàng較開放來讀聖經。
聖經內底有足濟作者，有無sio-siāng ê歷史背景、環境、年代、生活情形，收集資料、著作、編寫出來–ê。聖經是足複雜–ê一本冊。咱個人讀經、靈修ê時，當然ē-tàng真直接講，我受感動，我ê領受ê是啥物，總是咱靈修ê時陣，真需要對上帝求幫贊，對聖神領受感動。
一、新教ê聖經是新約聖經kap舊約聖經；天主教閣包括次經
咱(新教)差不多無咧用次經，只有佇研究聖經ê時陣需要知影背景ê時，次經ê年代幫贊咱了解。也是對舊約進入新約ê期間，對猶太教ê信仰做補充。
（一）舊約聖經：對口傳時期到約略主前165年，大部分攏經歷著作、修訂ê過程。
舊約聖經對口傳到馬加比運動，kap但以理書有關係。有幾若百年ê時間寫出來。口傳是佇猶袂有文字，或者是用喙講，對一个世代傳一个世代，包括故事、歷史故事、神話故事。佇口傳ê中間，會用「外邦」人─猶太人、閣較以前ê以色列人，甚至以色列以前ê人就有ê資料。所以口傳是啥物時陣開始，已經足歹講。
關係咱ê聖經，咱是先有信仰，才有這个經典。毋是一个經典出現矣，再抽內面ê精神，才有信仰。先有信仰，才佇文學上有紀錄、傳達。
1.律法書：創世記到申命記，「五經」
五經是寫出來閣經過幾若个修改、加添才完成–ê。研究舊約是較複雜–ê過程。創世記到申命記咱號做「五經」。五經佇文學上有文獻來源。有–ê學者無承認理論來源，認為猶袂完全。總是咱若用文獻來源來講五經，五經差不多有四个來源，這款理論目前大部分人攏接受：
(1)上主派文獻─（Y/J典）─約略主前950年所羅門時代完成，屬以色列統一王國而偏南部的傳統（含遊牧時期傳統）。
希伯來語翻譯作英語是Y開始，華語或者是台灣話是「耶和華」；用J是拉丁語。大概是所羅門時代完成，是以色列統一王國南部ê傳統。
以色列毋是單一ê民族，有十二支族，閣分南爿，特別是猶大支族做中心；其他屬於北部。真正有去埃及ê是猶大支族，其他ê支族是可能是原底tòa佇迦南地ê人，才漸漸受著猶大支族對上帝ê體驗、接受𪜶ê信仰，融合起來。𪜶佇遊牧時代、曠野ê經驗，較濟是記載佇上主派文獻內面。
(2)上帝或神派ê文獻─（E典）─約略主前750年耶羅波安二世ê時完成，屬於以色列國北部支族ê傳統。
中文聖經，有–ê講「上帝」、有–ê講「神」，佗一个稱呼才著？這佇翻譯聖經ê時有討論，中國江北，「上帝」是眾神明中間ê一个，比論講「玄天上帝」，「神」是上大。江南若講著「神」，就是真濟神，四界攏有神；若講著「上帝」，「上帝」是上大。若聖經翻譯用「神」，就是受中原文化ê影響。佇西洋就無「上帝」kap「神」ê分別，聖經ê原文就是“Elohim”。
(3)申命記派ê記載（D典），約略北以色列耶羅波安二世（約略主前783～743年）繁榮時代末期到亞述帝國消滅北以色列ê時代完成（主前721年）。
較濟是照Elohim上帝典ê資料，閣再經過申命記ê經典。大約是北部以色列耶羅波安二世到滅亡，以及一部分是到巴比倫亞述時期寫–ê。
(4)祭司派文獻（P典），約略主前500年，聖殿重建完成（約略主前520～516年）了後。
所羅門ê聖殿hō͘巴比倫毀滅掉了後，波斯王古列hō͘猶大人倒轉去鄉土起聖殿。主前520年到516年，第二个聖殿起好，恢復祭司ê禮儀、獻祭ê禮儀了後，才寫–ê。內面真濟是關係禮儀，包括年齡。我細漢ê時陣讀創世記心內有疑問，內面講著挪亞ê大船，有–ê寫清氣ê七對、無清氣ê一對，有–ê kan-na寫攏是一對。這就是耶和華典kap祭司典兩个kap做伙，經典ê派別無相siâng閣濫做伙。
(5)匯編，祭司派做總整理，保留頭前三个傳統，閣做小寡調整。咱若讀五經會使用較開闊–ê心態來讀，若有拄著矛盾ê，會使問牧師或者是神學院ê老師。你就會感覺足心適–ê！
2.歷史冊：約書亞記到列王紀上下，屬佇申命記派傳統；歷代志上下屬佇祭司派傳統。內面所根據ê神學無相siâng：
約書亞記是根據申命記ê神學來寫ê，就是善有善報、惡有惡報。約書亞記講起摩西過身了後，約書亞chhōa以色列人占迦南地，𪜶敬虔順服上帝ê旨意、照律法，所以攻打迦南地完全順利。這個律法就是根據申命記，所以有人講「摩西六經」。閣過來是士師記、撒母耳記、列王紀上下卷，攏是申命記神學。
歷代志上下是祭司典文獻神學，內底有記真濟ê禮拜、族譜ê代誌。列王紀記載南北分開ê故事，北部以色列所有ê王攏是bái–ê，南部猶大有幾个好ê王，攏佇列王紀寫出來。歷代志kā好–ê王保留落來，列王紀上下kā𪜶thuh-chhàu講，𪜶猶有缺點。聖經就是咧講所有ê人無一个完全好–ê。申命記神學講，逐家佇上帝面前攏是罪人，嘛有濟濟缺點，好ê王也有缺點，按呢幫贊咱閣較謙卑。甚至佇創世記約瑟記事內面，約瑟真偉大，毋過伊也有欠點，嘛是罪人。讀聖經愛知影背景、立場。
3.先知書：有以賽亞書、耶利米書、以西結書、何西阿書到瑪拉基書（無包含約拿書）
以賽亞書，有三个以賽亞，毋過第二个、第三个無知影名，所以佇聖經內面，第一以賽亞是出現佇第八世紀ê先知。
4.猶太教著作：佇主前538年波斯王古列hō͘猶大人對巴比倫倒轉去家己ê鄉土，有先知哈該、撒迦利亞、以斯拉、尼希米，形成猶太教。以斯拉記、尼希米記、以斯帖記是猶太教建立了ê作品。
5.智慧文學：約伯記、詩篇、箴言、傳道書、雅歌、哀歌
傳道書是受著希臘文化ê影響，有輪迴ê觀念。和合本攏講耶利米哀歌，哀歌毋是耶利米寫ê，佇希伯來語原文是寫哀歌、希臘文ê譯本才加添「耶利米」。蘇格蘭宣教師巴克禮來台灣傳福音，伊翻譯白話字也是哀歌。彼tang陣𪜶已經不止仔有聖經批判學ê訓練，所以咱無欲用「耶利米哀歌」，是哀歌。
6.猶太革新派文學：路得記、約拿書、第三以賽亞書（以賽亞書56～66章）
猶太教已經建立矣，毋過有一寡仔人對猶太教ê作風無贊成，因為感覺應該愛改革，因為咱ê上帝毋是親像猶太教經典所講ê上帝。路得記、約拿書這兩卷就是將牆thiah開。路得記、約拿書差不多是主後470年寫出來；第三以賽亞是第二个聖殿差不多起好勢ê時寫–ê。
以斯拉記、尼希米記內底有限制，猶大人若kap外邦人通婚袂使入來聖殿、袂使敬拜上帝，外族人嘛袂當來。路得記hām約拿書認為無應該按呢，將這个圍牆攏thiah起來。
路得記hām約拿書毋是歷史事實，會使講是小說，是猶太教ê小說，是神學–ê文學、神學型–ê故事。路得記kan-na有掠著一个歷史事實─大闢王有一个祖先是外邦人。伊欲kā猶太人講：咱上siàu-liām、上尊敬、上敬虔ê大闢王也有外邦人ê血統，是按怎猶太教就限制東、限制西，才會使來聖殿、敬拜上帝？就用這个歷史事實來寫故事。對歷史事實來講這無及格，毋過伊是咧寫信仰，通過這个小說來寫信仰。
約拿書寫北部以色列主前721年hō͘亞述國消滅，所致排斥遮ê外邦人，「咱遮–ê厝邊、逐國、逐民族有影kā咱欺負、侵犯，對民族性來講是冤仇人，所以咱mài hō͘伊入來聖殿、敬拜上帝，𪜶無資格。」按呢講敢著？
人攏是上帝創造ê人，是按怎咱就kā伊排斥？上帝叫一个先知約拿，是歷史上真正有這个先知。伊用真實ê人物寫神學故事、信仰故事──用巴比倫神話內面ê海怪，海怪是反對上帝ê勢力，上帝竟然會當差這个歹物仔，將約拿吞落去。因為約拿無欲kā猶大人ê冤仇人亞述人傳福音。後來約拿hō͘海怪吐出來，就去猶大人ê冤仇人彼爿傳福音，對國王到人民攏悔改。上帝就是遮爾開闊ê上帝，用這款情形來改變猶太教ê信仰。
歷史上有海翁將人吞落去，去hŏng救起來。佇咱ê常識，無可能將先知約拿吞落去三工閣救起來，毋過就是有掠魚ê人掠著這尾海翁，將人救起來。其實上帝ê偉大、權能毋免靠這種萬分之一ê代誌來證明，所致就愛反倒轉來想：寫約拿書ê目的是啥物？這毋是歷史事實，毋過用這來了解上帝ê權能連反對祂–ê，祂攏會當來利用。以前亞述消滅北部以色列，遮攏是上帝ê器具──為著教示猶大人，𪜶嘛需要捌上帝、通好佇上帝ê教示內面。咱就按呢來了解，毋通kan-na辯講彼尾魚有影無影，一个人入去腹肚內底敢有法度三工？這毋是聖經ê重點，尤其是靈修ê時，著用新ê角度來理解、體會路得記、約拿書咧講啥物。
7.啟示文學（抗暴文學）：但以理書
頭起先亞述消滅北國以色列、南國巴比倫，所有猶大人、以色列人攏掠去巴比倫──就是今仔日ê伊拉克。波斯（今日伊朗）皇帝塞魯士tháu-pàng濟濟民族hō͘ in轉去鄉土。猶大人、以色列人是足濟民族ê一部分，也享受到塞魯士ê慷慨kap款待。後來波斯hō͘亞歷山大帝消滅，亞歷山大帝死後希臘帝國分做四國，若用以色列迦南地來講，主要有敘利亞hām埃及兩个國咧相戰。
用迦南地來比喻就親像台灣，台灣是足濟帝國想欲占──西班牙、荷蘭……到今–ê中國、美國、日本攏想欲對台灣有控制權。迦南地佇西亞世界，佇歐洲ê東爿，是兵家必爭之地、交通攏會經過，所致敘利亞帝國kap埃及帝國攏想欲占領以色列迦南地，佇鬥爭中間所發生ê代誌。
影響猶大人上濟–ê是敘利亞，特別是西流古帝國真歹款待猶大人，後來祭司馬加比家族chhōa猶大人反抗。因為敘利亞欲消滅猶太教，消滅信仰了猶大人ê文化自然無去，不只壓迫猶大人，甚至佇聖壇獻豬，猶大人無咧食豬，所以祭司馬加比家族高呼猶大人反抗，到敘利亞帝國明顯失敗ê時產生但以理書。
後來敘利亞完全hō͘馬加比家族、猶大勢力趕出去ê時，產生以斯帖記。以斯帖記講到「普珥節」，佇猶大歷史無，佇波斯ê完整記錄內面嘛無以斯帖王后ê名，所以這原來是神學故事。
但以理書就是咧寫猶大人敬拜上帝所受ê迫害，差不多後壁一半咧寫南北兩个王國──敘利亞王國kap埃及王國鬥爭ê情形。咱所知影ê埃及豔后Cleopatra也有佇但以理書內面，毋是用這个名，是伊ê角色佇內面小寡仔有講著。 (後期koh刊)
