Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Tī Ji̍t-pún tī-lí Tâi-oân ê sî-tāi, A-hoat chím sī chi̍t ê kan-khó͘ ê chng-kha gín-á, tùi la̍k chhit hòe khí, i ta̍k-kang ê thàu-chá tī thiⁿ-phú-kng ê sî, tō ài khan gû khì chia̍h chháu, sui-bóng ka-kī pak-tó͘-iau mā ài hō͘ gû seng chia̍h-pá, gû nā chia̍h-pá chiah ū khùi-la̍t tàu choh-sit, tùi chia mā chai-iáⁿ hit-chūn ê gû pí gín-á khah kè-ta̍t, in-ūi gû chí-ū chi̍t chiah, gín-á ū cha̍p ê !
Khan-gû ê iân-lō͘ ū sî ē ū o͘-chhiu kap pe̍h-lēng-si lâi tòe lō͘, chng–nih ê khan-gû gín-á, mā chi̍t ê chi̍t ê chhut-hiān; to͘-chhī ê gín-á sī pâi-tūi khì tha̍k-chheh, chng-kha gín-á sī khan-gû khì chia̍h-chháu, ah! che sī nn̄g chióng bô kāng-khoán ê ha̍k-si̍p.
Khan-gû ê sî kin kiâⁿ kin chhiùⁿ-koa kap pêng-iú kóng gō͘-sì-saⁿ, gû teh chia̍h-chháu ê sî, gín-á khì lia̍h chhân-kap-á kap hô͘-liu thang chah tńg-khì hō͘ tōa-lâng chú, ē-po͘-sî gû choh-sit tńg–lâi ài khan gû khì tōa-kau sńg-chúi sé-sin-khu, chit-chūn goán mā lo̍h khì kau–nih bong lâ-á kap khioh chhân-pe, chi̍t-tiám-á tō bô phah-sńg sî-kan, ji̍t-chí ná khe-chúi, chi̍t ji̍t chi̍t ji̍t kòe, sui-jiân chhù–nih chin sàn-chhiah, m̄-kú tàⁿ-thâu lóng tī tōa-lâng hia, gín-á bô-hoân bô-ló, ji̍t-chí iû-goân kòe liáu kam-tiⁿ.
Chá-khí khan-gû tńg–lâi liáu-āu chá-tǹg ê ám-môe-á kín-kín khoán lōe pak-tó͘ lāi, chiap-sòa ài khì koah ti-chhài kiáu han-chî-chhiam, kûn chò chi̍t tōa-tiáⁿ lâi khoán-thāi ti-á chia̍h, ti-á nā chhī hō͘ pûi-pûi bē ū hó kè-siàu, chiah ē-tàng kòe chi̍t ê thò-tòng ê nî !
Kóng tio̍h A-hoat chím-á ê miā-ūn sī chin kham-khia̍t, saⁿ-hòe sí lāu-pē, tī tōa-ka-têng nih tō hō͘ lâng khòaⁿ-bô-ba̍k-tē, i ê lāu-bú àm-sî ài khì lia̍h chúi-ke bē lâi chò só͘-hùi, in-ūi bô châi-tiāu kā gín-á chhī hō͘ pá, ko͘-put-chiong kā i sàng lâng chhī, hoan-tńg-nî, lāu-bú thiaⁿ lâng kóng cha-bó͘-kiáⁿ hō͘ ióng-pē khó͘-to̍k, ū chi̍t pái in-ūi i khàu bē soah, ióng-pē hoat sèng-tē chhōe ke-tà kā i khàmtī lāi-té, sì-kho͘-liàn-tńg khǹg tiū-chháu pàng hóe sio, tì-sú ian phōng-phōng-hun lâi hèⁿ-kiaⁿ i, lāu-bú thiaⁿ tio̍h án-ne ê tāi-chì chin m̄-kam tō chiong i thó–tńg-lâi, bô-jōa-kú koh chiong i sàng hō͘ pa̍t-lâng chhī.
Lō͘-bóe A-hoat chím ê kiáⁿ lóng lî-kha-chhiú kiàn-li̍p ka-têng liáu-āu, i tòe kiáⁿ khì chhī-lāi tòa, chhù-piⁿ chio beh khì A-lí-san khòaⁿ ji̍t-chhut, i chiū chò-hóe chē iû-lám-chhia khì iû-lám, tē jī kang ê thàu-chá , ta̍k-ke e-e-tīn-tīn kiâⁿ tùi soaⁿ-téng beh khòaⁿ ji̍t-chhut, ji̍t-thâu chi̍t ê chhut-hiān, tāi-ke tōa-siaⁿ hoah-hiu phah-pho̍k-á, A-hoat chím kóng “Chin hó chhiò, góa khah-chá chhī gû ê sī, ta̍k-ji̍t mā khòaⁿ ē tio̍h chit-khoán ê ji̍t-chhut !”
