Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎做工á人台語工作室
【漢羅】
Chhāi，有幾lo̍h種意思，sòa–落-來咱liâu-liâu-á來講。
Chhāi thiāu-á，to̍h是土腳挖一khang，kā thiāu-á tâi一部分–入-去，hō͘ thiāu-á khiā ē直，khiā ē chāi，咱話ē-tàng án-ne講：「地理sian–ê講咱ài chhāi一支大thiāu，chiah ē消災改厄，m̄-koh伊講ài chhāi ê所在是路ê正中nē，我看iáu-bē改tio̍h厄，我ē先去lòng tio̍h頭。」
Koh來，chhāi kah chhāi-chhāi lóng是無tín-tāng ê意思，親像「你koh chhāi tī hia teh創啥？Koh m̄緊來kā王董–ê seh多謝？」Tī chia，to̍h是講人khiā–leh lóng m̄振動，有時leh kâng ge，chhāi tī hia換做chhāi佛á，ûn-ná是kāng意思。陳雷sian–ê ê「講古小火車」，mā有一句「神神chhāi hia坐，m̄知teh想啥。」Chia ê chhāi mā是無tín-tāng ê意思，話句真súi，mā tī chia hâm各位分享。Nā是chhāi-chhāi ê用法，人chhāi-chhāi，目神chhāi-chhāi，頷頸á chhāi-chhāi lóng有leh講。
Koh一種是khǹg ê意思，像講「Chia ài chhāi 2塊椅á，hia mā kāng款。」Tī故事內底寫–tio̍h-ê，「Kā桃á chhāi tī桌頂。」Mā是chit種意思。
Koh來，to̍h是khǹg ho͘好koh beh ka拜ê意思，像講chhāi神明，chhāi佛á，chhāi公媽。有一句俗語kài出名，「一人一家tāi，公媽隨人chhāi。」To̍h是leh講，kā ka-tī ê tāi-chì管hō͘好to̍h好，m̄-thang chhap siuⁿ chē，chhap過頭，chhap kah ùi別人in tau–去。
Koh一款是講人真lò、真大漢。話ē-tàng án-ne講：「籃球選手lóng一chhāi真大chhāi，kah in講話，頭lóng tio̍h khiàn-khiàn，頷頸á ē痠。」
【Pe̍h-ōe-jī】
Chhāi, ū kúi-lo̍h chióng ì-sù, sòa–lo̍h-lâi lán liâu-liâu-á lâi kóng.
Chhāi thiāu-á, to̍h sī thô͘-kha ó͘ 1 khang, kā thiāu-á tâi chi̍t pō͘-hūn–ji̍p-khì, hō͘ thiāu-á khiā ē ti̍t, khiā ē chāi, lán ōe ē-tàng án-ne kóng: “Tē-lí sian–ê kóng lán ài chhāi chi̍t ki tōa thiāu, chiah ē siau-chai kái-eh, m̄-koh i kóng ài chhāi ê só͘-chāi sī lō͘ ê chiàⁿ tiong nē, góa khòaⁿ iáu-bē kái tio̍h eh, góa ē seng khì lòng tio̍h thâu.”
Koh lâi, chhāi kah chhāi-chhāi lóng sī bô tín-tāng ê ì-sù, chhin-chhiūⁿ “Lí koh chhāi tī hia teh chhòng sáⁿ? Koh m̄ kín lâi kā Ông-táng–ê seh to-siā?” Tī chia, to̍h sī kóng lâng khiā–leh lóng m̄ tín-tāng, ū-sî leh kâng ge, chhāi tī hia ōaⁿ-chò chhāi pu̍t-á, ûn-ná sī kāng ì-sù. Tân Lûi sian–ê ê “Kóng-kó͘ Sió-hóe-chhia”, mā ū 1 kù “Sîn-sîn chhāi hia chē, m̄-chai teh siūⁿ sáⁿ.” Chia ê chhāi mā sī bô tín-tāng ê ì-sù, ōe-kù chin súi, mā tī chia hâm kok-ūi hun-hióng. Nā sī chhāi-chhāi ê iōng-hoat, lâng chhāi-chhāi, ba̍k-sîn chhāi-chhāi, ām-kún-á chhāi-chhāi lóng ū leh kóng.
Koh chi̍t chióng sī khǹg ê ì-sù, chhiūⁿ kóng “Chia ài chhāi 2 tè í-á, hia mā kāng-khoán.” Tī kò͘-sū lāi-té siá–tio̍h-ê, “Kā thô-á chhāi tī toh-téng.” Mā sī chit chióng ì-sù.
Koh lâi, to̍h sī khǹg ho͘ hó koh beh ka pài ê ì-sù, chhiūⁿ kóng chhāi sîn-bêng, chhāi pu̍t-á, chhāi kong-má. Ū chi̍t kù sio̍k-gí kài chhut-miâ, “chi̍t lâng chi̍t ke tāi, kong-má sûi lâng chhāi.” To̍h sī leh kóng, kā ka-tī ê tāi-chì koán ho͘ hó to̍h hó, m̄-thang chhap siuⁿ chē, chhap kòe-thâu, chhap kah ùi pa̍t-lâng in tau–khì.
Koh chi̍t khoán sī kóng lâng chin lò, chin tōa hàn. Ōe ē-tàng án-ne kóng. “Nâ-kiû soán-chhiú lóng chi̍t chhāi chin tōa chhāi, kah in kóng-ōe, thâu lóng tio̍h khiàn-khiàn, ām-kún-á ē sng.”
