Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◎張宗隆
記錄◎江委螗
（二）新約聖經：ùi口傳到約略主後110年
1.福音書：關係耶穌言行ê口傳（耶穌受死，主後33年）進前就有→各地區á-sī教區ê信仰見證kap傳統→約翰福音ê神學性福音書
比論講，耶穌細漢ê時12歲ê記事、聖誕ê代誌，彼个時代ê人猶袂信耶穌，彼時猶無基督教，有口傳ê代誌。
這四本福音書記載ê代誌哪會有–ê無相siâng？有–ê寫耶穌拄著兩个目睭無看見–ê人，仝款–ê事件有–ê福音書寫一个。佗一个較著？
約翰福音書是上路尾才寫–ê。約翰福音書不只仔神學，內面ê記事可能毋是teh講歷史事實。就親像舊約欲表示ê是信仰、耶穌復活ê信仰，所發出ê氣力、意義。約翰福音書內底寫著一个神跡就會有一个解說，有時是神跡頭前會講著背景。
頭拄仔講著目睭無看見–ê，耶穌欲入去耶利哥醫治目睭無看見ê人，抑是佇路醫治ê？幾个人？路加福音記載一个，馬太福音記載兩个。我認為馬太福音記載兩个是複數。類似這款情形，其實耶穌醫治好足濟个人，複數–ê人。路加福音可能是講，彼个代誌彼个時陣一个。
馬可福音記載兩个兄弟仔——雅各kap約翰拜託耶穌做王，hō͘ in兩个兄弟仔做大臣，其他門徒就誠無歡喜。馬太福音是寫媽媽chhōa這兩兄弟仔拜託耶穌。所以是這兩兄弟仔家己來，抑是媽媽chhōa in來？馬可福音較早寫，也較樸素，所以可能是事實。到寫馬太福音ê時陣使徒ê地位已經予人足尊敬，欲kā𪜶thuh-chhàu嘛歹勢，所以講是𪜶媽媽chhōa來–ê。
馬可福音較代先寫–ê，毋過拉撒路復活ê代誌，是按怎kan-na約翰福音有？這是天大地大–ê代誌，哪有可能馬太、馬可、路加攏毋知？真有可能是神學上ê問題，拉撒路代表信靠主ê人所受著ê迫害，𪜶性命ê改變。約翰福音是足神學–ê，若換較批判性–ê角度來了解，拄拄仔欲表現耶穌復活遮爾寶貴ê信仰。
2.保羅書信
（1）可信度較懸ê批信——羅馬書、哥林多前書、哥林多後書、加拉太書、腓立比書、帖撒羅尼迦前書、腓利門書
中央有幾卷比福音書閣較早寫，內面有幾項有人懷疑是保羅所寫ê抑毋是，這七卷是保羅寫ê無毋著。
（2）保羅ê學生寫ê批信，受質疑ê批信——以弗所書、歌羅西書、帖撒羅尼迦後書、提摩太前書、提摩太後書、提多書。
是保羅以後，伊ê學生寫ê。一開始攏會寫「保羅……」，表示學生咧寫批ê時，是根據保羅ê神學、伊ê老師ê教示來寫。因為聖經研究中，遮–ê批信時代 tàu袂起來。
內面ê影響、有猶太人基督教ê教會。平平是基督徒ê教會，有–ê猶閣保留猶太人ê傳統、禮儀。保羅無可能寫這款，因為彼時代教會已經是外邦人基督徒占多數，猶太人欲信耶穌較困難；而且保羅足無愛法利賽派、猶太派欲將教會chhōa倒轉去守律法，保羅無愛hō͘基督徒去受猶太教ê傳統。這幾卷雖然是根據保羅ê神學，毋過有猶太教ê成分，用猶太人ê角度批評代誌。
3.使徒行傳
使徒行傳親像約書亞記，承接申命記。使徒行傳kap路加福音仝作者。內面有講著信靠主耶穌、順服主耶穌、領受聖神，初代教會ê發展。雖罔有一寡仔問題，但是大體上有真大ê進展。
內面寫著保羅佇羅馬受關監、軟禁，雖然被軟禁，但是福音大大開展，這是聖神ê工作。就親像約書亞初到迦南地了後直直發展。
申命記ê文學到列王記下卷ê時陣，寫著一个王會當kap巴比倫ê王做伙食飯——毋是佇王宮做伙吃桌，是巴比倫王室猶原發薪水、糧食予伊，這个王受著巴比倫王室ê好款待。雖然南部猶大或者是整個以色列攏滅亡，毋過這个王閣受著巴比倫王室ê好款待，表示閣有一絲絲仔希望，以色列人ê信仰袂按呢就無去，是足樂觀ê向望，所以保羅就kā申命記ê神學接起來。
路加福音hām使徒行傳無寫保羅死矣，其實知影保羅hō͘ Nero害死矣，毋過寫作是樂觀、開放性ê結束。
4.牧會批信：希伯來書到猶大書
雖然是基督信仰，毋過較倚猶太人ê傳統，是猶太人基督徒所寫ê批信。內面牽涉著教會已經受迫害ê時代，希伯來書、彼得前書就是這背景。希伯來書較早期，紲落來是彼得前書、啟示錄。
5.啟示文學：啟示錄（另外一款ê抗暴文學）
啟示錄kap但以理書仝款，內面有上等ê語言。「啟示」ê意思毋是忽然間上帝kā咱指點，是已經有這个物件上帝hō͘咱知影。啟示文學內底有足濟謎語，就是保守派毋知ê神學語言，因為若是明明寫出來會hō͘統治階層ê人知影你咧罵政府，就kā你掠、kā你thâi。所以啟示文學ê謎語咱就愛有新ê理解。
巴克萊(William Barclay)攏總有十七本新約ê注解，基督教文藝出版社出版，雖然有較舊，毋過對聖經研究有幫贊。伊有講原文ê意思、也會講時代背景。其中啟示錄有上下兩本，解說謎猜。 (後期koh刊)
