Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◎張宗隆
記錄◎江委螗
Ⅱ 聖經ê性質
一、聖經是「上帝ê神『感動』寫ê」（提摩太後書3章16節，TTV；和合本：「上帝所默示ê」）
聖經是上帝所「默示」、「啟示」、「感動」ê，攏是原文翻譯出來–ê。「感動」是啥意思？有人講：「舊約ê先知，親像chit-má我欲寫這个物件，我規个人攏無意識，上帝就叫我寫，記錄上帝傳落來ê密碼，因為聖經是上帝所感動、所啟示ê，所以攏總袂毋著。」按呢講敢著？
其實毋免想kah遐爾神祕，特別是舊約ê先知，是社會、宗教、倫理ê評論家，彼時代發生啥物問題、信仰發生啥物問題，伊有感想，感覺是hō͘上帝感動、上帝交待伊愛講–ê，就開藥方、甚至用歹喙罵出來，將遮ê寫落來。我感覺舊約內底上歹喙ê先知是耶利米，現代台語譯本翻譯kah較「露骨」。歹喙ê意思毋是咧chhoh，是講出來誠無客氣。其他先知嘛是。
先知、寫某一卷ê作者，攏毋是親像打字機攏無意見。先知是評論家，攏頭殼清楚koh gâu觀察。福音書、舊約五經、歷史冊，作者調查資料、訪問、聽厝邊隔壁ê，寫起來。in寫ê物件攏有經過時代ê考驗──經過幾百年收集、整理起來，信仰團體、逐所在無論是北部–ê、南部–ê、猶太教、基督教……大家共同接納。《彼得福音》、《羅馬福音》就無收佇聖經。
五經，有–ê是北部傳統，有–ê是南部傳統，平平攏是信靠上帝。祭司派ê人用in ê立場、領受上帝ê啟示、收集資料（對傳說）寫–ê。福音書嘛是。毋過人佇思考觀察中間，真歹分別這敢是對上帝來–ê，可能有一部分是觀察來–ê，毋是突然有靈感。對規ê範圍講起來，攏是上帝ê感動、啟示，所以是先有信仰才有著作，是上帝「通過」人所寫–ê，加減會毋著。
二、就信仰ê觀點記述kap論述
有ê講「聖經無謬論」，認為聖經連一橫一點攏無毋著。加爾文講「聖經內底有錯誤，毋過規本聖經無錯誤」。咱先看歷史紀錄就知舊約ê記載是無合事實，譬喻以斯帖無佇名單內面、無此个人。對信仰來講是著–ê，內面寫ê攏是咧見證福音、見證信仰。咱著愛了解聖神ê感動，毋是將作者當做無意識ê打字機。
福音書ê作者可能tòa佇無仝所在，有一寡仔神學ê解說，作者是代表伊後面ê教團──伊所屬ê信仰團體。伊咧見證伊ê信仰團體，寫主耶穌ê教示、祂行過ê路，以及解說。聖經足多樣性，kan-ta文學ê對應就足無相siâng，解說仝一件代誌也有無仝角度，地區信仰團體ê資料及理解嘛有無仝。
(一)主要teh見證信仰kap培育信仰，以及做信仰實踐ê教導。
特別是對細漢囡仔、初信ê人ê教導。苦勸舊約時代ê猶大人、以色列人愛實行上帝ê教示。新約khiā佇信仰做評論，有ê是通過劇中ê人物講出來，比如列王紀、撒母耳記評論所羅門。
舊約時代ê王，好–ê王kan-ta佇南部猶大，北部以色列無，因為南部猶大有聖殿，上主tòa佇聖殿內面，表示上帝同在。啥物時陣以色列人體會上帝？毋是kan-ta佇迦南地或者是聖殿以前ê鄉土，是佇巴比倫才知影原來上帝嘛佇遮。
Khiā佇信仰來講，北部無好ê王，南部kan-ta八个好–ê，好ê王應該國勢愛足強–ê。歷史記載顛倒毋是，其實有一寡bái王ê國勢足強，比如耶羅波安二世。Khiā佇信仰ê立場， in無忠誠敬拜上帝、順服上帝，所以是bái王。
以chit-má來講，中國假若足有錢–ê，其實是政府足有錢，人民足散赤，是倚政府ê紅二代、富二代、軍二代、政二代才有錢，雖然土地遐大、四界一帶一路，若親像足好額，毋過是無神論、無人權，所以這个國家真bái。咱khiā佇自由、民主、人權、信仰ê立場，拒絕這款ê國家。
(二)聖經內容有史實紀錄、有歷史背景ê信仰故事、改換時代ê歷史故事、對神話轉化ê神學故事，以及掠對上帝忠誠做標準ê評論。
譬喻路得記kan-ta掠著一點──大闢有一个祖先是外族人。上帝足開闊，咱偉大ê王in祖先是外族，上帝嘛hō͘外族ê子孫作咱ê王，koh是咱上尊敬、欣賞、數念ê王。
我做神學生ê時，考古學佇較早南國kap北國交界ê所在挖著馬寮，是不止仔大ê飼馬ê所在，老師講彼陣ê研究大概是所羅門ê時代。因為聖經記載所羅門時代有國際貿易，ùi埃及、別國進口馬仔，飼馬hō͘外國來買。後來考古學發見，毋是所羅門時代，是瑪拿西時代。瑪拿西ê物件寫過來所羅門，時間、空間有調整來寫信仰ê故事。
考古學袂當代表一切，不過大闢彼時代ê耶路撒冷所揣到ê蓋、phiat-á，無像聖經所寫ê大闢時代遐爾榮華富貴。即呢貴重ê物件，愛到瑪拿西、希西家時代。用考古學來講，大闢、所羅門時代可能是傳說，傳說毋是無，而是用希西家、瑪拿西時代南國猶大榮華富貴–ê時代ê代誌、人寫轉去大闢kap所羅門ê時代。
聖經有時代無相siâng ê所在、有小可改變，比如約拿書，約拿是第八世紀ê人，寫出約拿書是較慢–ê，作者毋是古早ê人約拿。
有ê是神話，神話毋是像「西遊記」飛山鑽地、一pha一萬八千里彼款空思妄想，神話是咧講天頂ê故事──其實是咧講現實ê人，特別是巴比倫ê神話。創世記第1章，猶有基督徒講，創世記ê「創造論」才著，「演化論」毋著；其實聖經毋是咧講科學，創世記第1章是信仰告白，hâm別个宗教對衝ê時，表達咱ê信仰：
以色列人受掠去巴比倫了後，巴比倫足文明，城牆若像拄天，塔足懸，人民食穿足豐富，足濟奴役受差教，以色列人佇迦南地根本看袂著，信仰就按呢受挑戰，認為in ê神遮爾偉大、有氣力，拍倒咱ê上主，才會這麼富裕，就來拜in ê各種神明──天、樹仔、動物……。有ê猶大人看著家己ê信仰kapin ê無相siâng，就通過創世記第1章講：in 咧拜天，天是咱上帝創造–ê、是被造物，咱無欲拜天，咱拜創造主─上帝─上主。暗時in驚東驚西、驚鬼神，咱有敬拜、信靠上帝–ê人袂驚，因為許個攏是咱ê上帝創造–ê，咱毋免驚。毋免看in是偌強、偌富裕ê人，其實in真無膽。日時、暝時ê時間攏是上帝創造hō͘咱ê，咱ē-tàng歇睏。咱敬拜ê是源頭，毋免tòe巴比倫拜遮ê星神koh siòng-miā（相命）、看出門欲按怎避免災厄……上帝創造咱足自由–ê，雖然咱受奴役毋過咱無驚惶，上帝kap咱同在。
創世記第10章講列國七十國，到11章敬拜巴比塔(巴別塔，巴比倫塔)──通天塔，普世ê中央有一个塔直直起到若拄天，通天塔迵到上帝遐，甚至kap上帝平gâu、平大，這就是帝國，欲hō͘攏總ê語言攏變做一个，欲統一、統治全世界。上帝欲毀掉這个魔道ê政權，上帝毋是愛一元化，祂愛多元，世間有足濟語言、民族、階級，攏是上帝創造–ê、所疼–ê。所以創世記毋是創造論、演化論，是神學、信仰告白。
台灣親像古早ê迦南地，巴比倫親像咱隔壁厝邊，伊逐項攏欲一元化、講普通話。這毋是上帝所愛，祂愛足濟語言。中國足驚足濟語言，所以欲統一、逐項控制，伊ê政策欲hō͘少數民族──新疆、西藏ê宗教變做中國共產主義，hō͘ in ê語言攏變做普通話，文化變做中國絕對化ê無神論。
創世記第1章1節到第2章4節是創造ê記事──宇宙是混沌、鹿糊糜、tâm-lok-lok；第2章4節開始有另外一个創造故事─講創造此个世界是大地ta-khok-khok，後來才有水氣。欲及演化論辯論，咱是欲用第1章ê創造論抑是第2章ê創造論？咱著愛轉來看，聖經是咧講信仰。
三、多元koh一致，一个主題koh有多元表達（diversity in unity, unity in diversity）
舊約攏咧見證上帝，見證踮佇耶穌基督內面ê上帝，簡單來講是見證耶穌，這位耶穌是上帝來到咱中間。福音書至少四本，內面加減吸收無仝ê傳統，這就是多元。保羅ê作品有真單純針對外邦人ê信仰，後來有猶太人基督徒、教會愈來愈大。代起先ê基督徒是猶太人，佇耶路撒冷信主–ê攏是猶太人，後來信耶穌ê猶太人無遐緊遐濟，因為in 看基督信仰是猶太教內面ê一派。猶太教信上帝，無法度接受耶穌也是上帝、聖神也是上帝。所以就是一个信仰有無仝ê傳統，koh有無仝時代ê演變，多元ê表達。
(一)無仝時期kap地區ê記載，見證仝一个信仰中心；上帝是「主角」。
聖經ê主角是上帝，嘛是咱信仰ê中心，多元無要緊，毋通磕一著就講別人是異端。上帝毋是kan-ta教會這个信仰團體ê，上帝袂hō͘咱綁牢咧，上帝嘛對未信者照顧、啟示，其實上帝是足大–ê。
荷蘭人來占領台灣ê時，in ê信仰是對加爾文落來–ê，所以1624年福音就來矣，佇這以前台灣敢無上帝？是台灣毋識上帝。今仔日台灣亂糟糟，上帝嘛kap台灣同在。上帝愛koh較濟人識祂，順服祂，敬拜祂。毋識上帝ê人，上帝猶原疼伊。
(二)多元記載ê細節差異，見證事實ê發生，mā顯出無仝年代kap地區ê信仰/神學詮釋。
福音書內面加減有無siâng ê所在，遮–ê攏咧證明有彼个代誌，無相siâng是因為地區ê傳統、信仰理解無相siâng，所寫ê記事、對信仰ê理解、論述、評論就無相siâng。聖經親像一个百科全書、文庫，佇無仝款ê聖經內容可能有無仝款ê教示。咱會當真有包容來讀聖經，佇逐款記事有得著甚麼領受，就通用按呢來祈禱。
(三)多元ê記事，見證上帝kap普世、個人ê關係。
聖經講起上帝及世界ê關係，講到及咱個人ê關係。上帝關心大世界嘛關心個人，此種多元ê記載會當幫贊咱ê信仰。 (全文結束)
