Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
台南市永康國小五年7班ê學生 指導老師：蘇晏德
我ê小弟ê寶物
◎黃丞
我ê小弟真古錐，伊上愛伊ê狗布尪仔，每日nā到厝就會the̍h伊ê狗布尪仔，無論拍電動、看影片抑是食飯ê時陣，伊攏會抱伊ê狗布尪仔，伊ê狗布尪仔手the̍h一ki骨頭寫三字「別惹偶」，有夠古錐，莫怪小弟會買這隻狗布尪仔。伊是小弟去ka頭毛ê時陣，阿爸買ê。小弟足歡喜，轉去厝就拜託阿母幫伊洗伊ê狗布尪仔，洗好ah，小弟就ta̍k日抱伊ê狗布尪仔去睏。
小弟若無這隻狗布尪仔就睏bē去，因為伊上愛伊ê狗布尪仔，小弟ta̍k日攏會抱伊ê狗布尪仔，那隻狗布尪仔就是伊上愛ê寶貝。
阿爸細漢ê代誌
◎楊宗旻
阮ê阿爸足愛kā阮講伊細漢ê代誌，有一擺伊kā阮講伊細漢ê時陣真gâu讀冊，以前考試lóng是一百分，但是伊ê老師對伊真歹，所以伊當時無kah意伊ê老師，m̄-koh伊chit-má大漢ah，伊顛倒感謝伊ê老師。阿媽kā阮講，阮阿爸細漢ê時陣足古錐，但是伊暗時beh睏ê時陣足驚無人陪伊睏，因為伊暗時足驚烏。阿媽mā kā有阮講，阿爸有一段時間猶會歹阮阿媽，有一段時間猶一直叫阮阿媽chhōa伊去se̍h夜市。每一擺阮聽完故事，感覺故事裡ê阿爸真正足古錐、koh也足趣味，kah我有一點點仔sêng。
阮兜ê人
◎董涵蕎
阮全家有阿爸、阿母和阿兄，我ê阿爸生做koân-koân koh粗勇，m̄-koh伊是一個溫柔ê阿爸。我kah意伊ê雙手，kah意伊用雙手攬–我，我tú-tio̍h困難時陣，伊會幫助我，當我傷心ê時陣，伊會鼓勵我抑是安慰我，伊是我ê避風港，為我做足濟代誌，我kah意伊，我kah意伊對我ê愛。
我ê阿母生做súi噹噹，伊kah意跳舞，ta̍k工攏會去學跳舞。伊是一个家庭主婦，攏會kā厝整理kah清清氣氣，hō͘厝變作親像阿母kāng款súi噹噹，我kah意伊暗時講故事時ê快樂時間。
我ê阿兄生做足緣投，伊是一个kah意運動ê人，伊tī學校kah意拍籃球。雖然伊有時陣會欺負–我，m̄-koh我猶是kah意kah伊sńg。
我kah意我ê全家，in hō͘我溫暖，我感謝in，感謝in陪我做伙成長。
鬧熱ê金門
◎洪萱儒
金門雖然是一ê庄跤，市區卻真鬧熱。阮去市區進前，阿母、阿媽kah阮去公車站hia等公車來，等到阮攏beh睏ah，公車才來，坐車愛13 kho͘，三个人愛39 kho͘。阮坐車到市區，hō͘阮足神奇ê代誌就是路真彎，坐到阮ê頭足gông。車到ah，阮看著賣足chē物件，阿媽買蚵仔、èng菜，猶有足chē，買轉去愛炒ê菜。菜買了ah，阮就去貢糖店買貢糖，貢糖店猶有賣牛肉乾，he是觀光客買ê所在，阮買五包牛肉乾佮11包貢糖，阮無khǹg tī阿母ê厝，全部用店內提供ê物流公司寄轉去台南，阮買完轉來厝，感覺金門ê市區真鬧熱。
我ê阿母
◎詹宗矩
我ê阿母ta̍k工攏會陪我寫功課，伊對我足好–ê閣會教我bē曉ê功課，嘛會煮飯hō͘我ê阿爸、小妹閣有我食。我ê阿母煮ê肉燥飯上好食，伊煮ê時陣，阮厝攏會有足芳ê肉燥味，我ê阿爸佮有我攏足愛食這項。
我ê阿母有時陣對我足好–ê，嘛有時陣對我足歹–ê，考試ê時陣，若是我考了足好，阿母就會hō͘我零星錢去買物件。若是我考足bái，我ê阿母就會罵我，m̄-koh罵完以後，伊就會kā我講beh按怎寫。我ê阿爸嘛會教我讀冊ê方法，講我後一擺愛加油。
我ê阿母對我足好ê，所以我大漢以後，一定beh轉來照顧我ê阿母，感謝阿母平時對我ê照顧。
我ê阿公
◎戴榛嫻
我ê阿公有十ê孫仔，自我細漢阮阿公就足疼我ê，chài我去買物件，se̍h夜市、閣去in朋友厝裡食茶……。伊啥物物仔攏留hō͘我食，hō͘我看。伊做啥物代誌頭一个就是想tio̍h我，hit ê時陣，我腹腸無hiah-nī闊，根本m̄知影按怎kā伊講多謝，到chit-má才知影愛kā伊講一聲多謝。但是，我是一个 m̄敢講話足直接ê人，m̄知影beh按怎kā伊講，心內偷偷仔kā伊講。一直到chit-má阮阿公破病ah一mī耳仔無聽tio̍h，我就問我ê阿母：「阿公敢會離開咱？」阿母講：「一定會，每一个人一定愛行chit條路，所以妳chit-má愛把握時間。」阿母閣講m̄免擔心，阿公一定會kā病治好。猶有，阿公以前攏會來阮厝食牛肉，我tī邊仔彈鋼琴hō͘伊聽，但是chit-má伊ê工課愈來愈無閒，真希望伊ē-tàng閣像以前kāng款來阮厝sńg。
