Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎黃明勝
踮佇教室，逐工都有一對一對chiâⁿ幼秀ê目睭，偷偷咧問一个問題：「我，敢有價值？」有ê囡仔成績好，煞驚人嫌伊驕傲；有ê囡仔恬恬坐佇後壁，連攑手tō感覺千斤重。咱大人知影，這个世代ê囡仔，佇比較、排名、目光ê競爭中，真容易袂記得——家己原本就是一个值得hông疼、hông肯定ê人。
俗語講：「人無千日好，花無百日紅。」人生有起有落，這是自然。較重要ê是，囡仔跋倒ê時陣，敢有人kā伊牽起來，對伊講：「你毋是失敗，你是tng teh行學習ê路。」佇我ê教室內面，我真愛聽囡仔講家己。我會hō͘ in紹介家己ê興趣、家己ê優點。有一个囡仔畫圖畫kah真好，伊用鉛筆畫出一个世界，同學拍噗仔ê時陣，我看著伊ê目睭仁teh發光，若像頭一擺發現：原來我嘛有會hō͘人欣賞ê所在。
一句好話，真正會救一个心。所擺，我佇班級設一个「好話牆」，hō͘囡仔寫hō͘同學ê呵咾、感謝、鼓勵。有囡仔寫：「你上課攏會kā我tàu-saⁿ-kāng。」有囡仔寫：「你走標真拚。」一張一張ê紙條仔，是囡仔saⁿ-kap替彼此炤光ê燈。我也教囝仔佇靜靜ê時陣看家己。用反省日記寫今仔日ê努力、挫折、成長。有一个囡仔寫：「今仔日我袂閣驚數學。」我知影，這一句，比一百分閣較有價值，因為伊開始相信：我會當變閣較好。目標毋免大，「一步一腳印」就有夠額。
考試進步一分、敢佇眾人面前講一句話，攏是囡仔替家己thia̍p ê一塊一塊信心ê磚仔。有tang-sî-á，囡仔嘛需要佇困難ê中間證明家己。小組討論、合作解決問題，in會發現：「我ê想法有人欲聽。」「我也會當對這个世界有貢獻。」我嘛鼓勵in去試看覓教室外ê活動。毋是為著名次，是為著佇舞台、佇比賽場、佇眾人面前，看見一个閣較勇敢ê家己。準講無tio̍h thâu-miâ，敢徛佇彼个所在，就是對自我價值ê一種宣言。
佇一个saⁿ-kap支持ê班級，囡仔學會曉：我袂孤單。朋友ê笑、同窗ê鼓勵，攏是自信ê養分。做老師，我毋是欲起造完美ê囝仔，我是欲陪in學會曉疼惜家己。佇一个囡仔知影：「我值得hông尊重、hông期待、hông愛」，伊就有氣力去面對世界。向望逐个囡仔，攏會使佇我ê教室看見——家己，其實是一个會發光ê人。
