◎翁博文
耶穌預言受難門臨 十字架陰影愈迫近
耶路撒冷苦難之路 耶穌定意前往上路
面臨冤屈死亡威脅 被出賣受謀害浩劫
受難之城耶路撒冷 耶穌入城明確決定
耶穌謙卑騎驢入城 萬人夾道喝和散那
耶穌入城光彩榮耀 衣裳鋪路民眾歡跳
進入聖殿四處查看 買賣攤販牛羊若山
賊 siū 市場詐騙集團 耶穌拆毀趕出攤販
法利賽人希律黨徒 設詭計奉命見耶穌
揣話柄欲陷害耶穌 耶穌看透陷阱內幕
納稅互該撒納毋納 銀幣人像替主回答
將該撒 ê 物互該撒 將上帝 ê 物互上帝
撒都該人謀除耶穌 復活問題挑戰耶穌
撒都該人毋信復活 人死復活無嫁無娶
恁錯了又完全錯了 上帝權能恁攏 bōe 曉
上帝是活人 ê 上帝 祂毋是死人 ê 上帝
密謀緝捕處死耶穌 祭司長下令行極步
使徒猶大出賣耶穌 為錢 ê 緣故結束師徒
客西馬尼痛苦卑微 懇切祈禱順服到死
心肝憂傷到欲爆裂 主接苦杯聖父旨意
猶大唚主套做暗號 帶兵丁攑槌閣攑刀
深夜掠主押送公會 誣陷罪名處死定罪
彼拉多總督細審問 連希律嘛查無罪狀
彼拉多提特赦慣例 試互耶穌釋放機會
群眾卻喝釘死耶穌 彼拉多卻討好無步
宣布判處耶穌死刑 當場交互部下執行
耶穌揹負十架刑具，前往刑場，被釘堅佇各各他山頂。戴莿冕旒，受鞭拍，受呸涎，受凌辱，受詈罵。
十字架頂主流寶血救贖咱，替咱受苦到此款。數念主救贖功勞，立志一生緊隨耶穌ê 腳步，謹行永恆天國之路。
（作者為基督徒）
