◎鄭雅怡
踏話頭
2025年joa̍h–lâng，我tiāⁿ-tiāⁿ去中北部支援大罷免。台南hām嘉義做風颱、做大水了後，我mā有去tàu整理環境。感謝上帝hō͘我chiah-ê機會thang為tio̍h台灣服務。大罷免雖然挫敗，m̄-kú對tī台灣社會整體ê動員hām團結，tek-khak有正面koh chhim-oán ê影響。以下通過批信來記錄這段過程hām感想。
大家平安：
6月23到28是中北部幾ā個艱難選區二階罷免連署書收件、補件ê上尾坎站。我決定koh去台中支援兩三日。6月23代先去中三選區。6月24透早我tùi台中坐火車去中二區ê Soa-la̍k支援，雖然joa̍h ka̍h，thiám ka̍h，m̄-kú感覺chiâⁿ甘甜、充實，因為看tio̍h Soa-la̍k ê勢面jia̍t-phut-phut，phēng兩月日前初初來chia做志工，hit款冷清稀微ê慘境，有影差天kap地。二階連署若通過，這站所有ê tio̍h-bôa就有值ah！何況這日tiong-tàu koh接tio̍h電話，邀請我一日後去上蓋艱難ê中八選區tàu-kha-chhiú，我規個人續cheng-eng–起來。中八是我一直teh聽候消息、chiâⁿ想beh去ê選區。感謝上帝ê應允kap呼召，hō͘我ê祈禱得chiâⁿ。
1. 2025.6.23. 中三選區潭-á-kîⁿ (潭仔墘/潭子)
進前我bat來潭-á-kîⁿ罷免總部，就是台中市議員蕭隆澤ê服務處，支援幾ā擺。6月23早起óa 10點，一下到位，我隨發現chia ê亭á-kha chiàⁿ-pêng頭前面ê桌頂排列ê tah-chóa，soah有中國國民黨殖民威權獨裁者蔣介石、蔣經國ê siōng！Koh引用in ê話，bē輸in爸á囝支持民主hām反共！我看了chiâⁿ艱苦心，kā一位年歲hām我差不多ê在地志工P tâu：「Án-ne bē-sái–chit！Bē-sái為-tio̍h beh siâⁿ正藍軍hām藍ê選民來罷免，就無顧是非。台灣人ài有正確ê歷史認知，mài koh hông騙，mā mài koh kā人騙ah。蔣–家in爸á囝tī二二八、白色恐怖ê時，明明to迫害、殺害chōe-chōe台灣人民，包含外省族群，in thái有siáⁿ-mi̍h民主ê信念?KMT hoah反共mā是用來騙台灣人–ê，siáⁿ-mi̍h『反攻大陸』、『反共復國』攏mā為tio̍h beh維持in ê政權。我所知，上òaⁿ 到1958年，蔣介石走路來台灣了無kah十冬，hín韓戰tú-á soah，蔣介石就kā美國國務卿John Dulles掛保證，伊絕對bē去phah中共ah，mā tòa伊hām Dulles ê共同聲明中án-ne表示。」
我真正為tio̍h這擺罷免hām此後台灣ê發展teh khòa-hoân（掛煩）。台灣人若繼續對歷史無知，抑是tài歷史失憶（amnesia of history），續無才調建立正確ê歷史認知，由在人操弄、宰制咱ê心靈，恐驚咱ê後代會koh tú-tio̍h hông殖民，類似二二八、白色恐怖ê大苦難。
6月21中三罷團群組有發訊息，講愈óa補件期限，就愈chōe人chông出來連署，致使這站總部chiâⁿ ka-ia̍h。我kā Thâm-á-kîⁿ總部兩日六個輪班lóng thiam滿ah。總–是6月23這日來連署ê選民無預期–ê hiah-ni̍h chōe，koh，有ê在地志工hām新志工無thiam排班表就走–來，soah變做腳手siuⁿ chōe。是講，到上尾階段ta̍k-ê kâng心beh來支援，mā bē-sái kâng嫌–chit。6月23下晡hām我tong-ti̍t ê 少年查埔同工kā我建議，中三志工lâng-gia̍h有夠ah，看我隔轉日beh去中八–bô？Hia是現此時上欠志工而且選情上蓋危急ê所在。我就緊問高雄ê罷團，看beh按怎樣hām中八連絡。In kà我兩種法度。一項是直接申請加入中八罷團，另外一項是連絡民進黨一位負責teh連繫中八ê黨工。中八罷團到6月25 chiah hām我連絡。民進黨ê黨工雖然隨hām我連絡，講大概會安排去豐原，koh講有人會khà手機仔hō͘ 我。M̄-kú過十外日，我teh寫這篇筆記ah，to iáu無DPP ê人khà手機á來。聽候消息ê時陣，我mā有teh考慮，敢beh改做去中二ê Soa-la̍k
4月26我頭一擺來台中支援ê時，就志願去Soa-la̍k，到tī 26冬前我bat去兼課一學期ê鄉里。無疑悟有影hông分配到hín去教英語ê靜宜大學大門頭前ê擔á位，hām在地一位chiâⁿ phah拚，hoa̍t-phoat koh好笑神ê組長 “Sió-khóa”做伙khiā街頭gia̍h牌仔。到天暗收擔，同工kā伊tàu收ke-si，一項á一項搬chiūⁿ伊ê車，見證伊ê辛苦。我一直期待thang kap “Sió-khóa” koh saⁿ見。6月24 Soa-la̍k tùi早起9點到boeh-暗-á 7點有辦兩場街頭gia̍h牌宣講，tú好ha̍h我ê to͘-ha̍p……
6月23這日tī Thâm-á-kîⁿ 總部，下晡時來tàu-kha-chhiú ê hit个o͘-jí-sáng無來。伊姓吳，細漢tòa tī屏東縣枋寮。見擺伊來，我lóng hām伊做伙gia̍h牌á hoah口號，ná開講，chiâⁿ心適。平平南部人，講khah有話，koh-khah重要–ê，是伊lóng hām我講台語。Thâm-á-kîⁿ在地民眾明明to講台語，總–是chia ê志工差不多lóng講華語。我iáu是堅持講台語，thang hō͘ in練習。其實hām in同工，我tiāⁿ-tiāⁿ感覺家己ná親像「異鄉人」；bô-tiāⁿ有一日台灣人tòa台灣故鄉，顛倒ná像tī異鄉外邦teh流浪ah。Taⁿ O͘-jí-sáng無來，我感覺淡薄仔失落，m̄-kú照原gia̍h牌仔、hoah台語口號，koh比永過hoah ê句khah長，mā包含khah chōe內容。Hit个少年ê志工ká-ná去驚–tio̍h，問講台語beh講kah親像我án-ne，敢是ài特別訓練–過?我tī心肝內苦笑。Hit暝7點收工，阮做伙坐火車到台中。Chiâⁿ感謝伊iáu願意thi-thi thū-thu̍h hām我講台語。
半暝我頭一擺看tio̍h中三志工LINE群組起冤家，有影chhoah-chi̍t-tiô。外位志工hām在地志工相罵kah chiâⁿ厲害。敢會知影in teh-beh大冤家，chiah叫我去別個選區? 在地志工久長承擔chiâⁿ重ê工作量，甚至tio̍h koh面對當地烏暗勢力ê威脅，in ê壓力m̄是外口人ē-tàng體會–ê。長期活tī重擔下面，mā khah容易起衝突。做一個外來支援者，我在來無愛介入在地罷團ê內部爭端，因為中途chiah加入，m̄知頭也m̄知尾， 無應當koh hiâⁿ柴添火to̍h。何況我來chia是beh協助罷免，m̄是hòⁿ-hiân，抑是thiau-tî來製造事端–ê。大罷免若無成功，台灣就塗–去ah，準講罵贏，koh有啥意義? 內鬥、分派系大概是動物社會oh-tit避免–ê，總–是二階連署to iáu-bē通過，罷免iáu teh苦戰中間，ǹg望ta̍k-ê iáu是ài kā完成罷免掠做首要目標。
Hit暝我決定，隔轉日lù卡入去台中車頭ê月台進前，DPP若有hām我連絡，就坐山線去豐原，無–者，就坐成追線（成功－追分）去Soa-la̍k。 (後期koh刊)
