Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎做工á人台語工作室
【漢羅】
今á日beh紹介ê語詞是khăn-jió͘，khêng實像chit款詞，是tī日本時代，台語kah日語sio thàu-lām ê產物，有1-kóa日語內底有，m̄-koh台語內底無–ê，chŏaⁿ直接kā日本話the̍h入來台語講，吸收做台語ê 一部分。Tī chia ē-sái講幾ê例，凡勢ta̍k-ke mā有聽–過，親像siat-chuh，hăn-tó͘-luh，khăng-páng chit種–ê，lóng算是日來詞。
Chit款話，tī goán chit iân ê人koh tiāⁿ-tiāⁿ有leh講，m̄-koh，凡勢是ē-hiáu講日語ê老輩–ê漸漸無–去，chit kóa語詞mā jú來愈罕得聽–tio̍h，só͘-pái，chit-má chià chit ê機會koh來kā ta̍k-ke紹介–chi̍t-ē。
話koh講倒–轉-來，chit ê khăn-jió͘ nā tī故事內底所講–ê，「Nah ē hiah緊to̍h去hō͘ khăn-jió͘–去！」Tī chia，是解決、完成ê意思，to̍h是leh講白話字nah ē hiah好學，A郎sûi to̍h學ē-hiáu。
Koh另外chi̍t ê意思，to̍h是leh講人已經過身–a，但是，nā用khăn-jió͘ chit塊詞，hit ê人一定m̄是咱kài親近ê人，凡勢咱koh ē感覺hit ê人kài顧人怨，屬tī害á hit款–ê，用khăn-jió͘來講khah無hiah尊重。話ē-sái án-ne講：「你講A林á–o͘h？前chi̍t-chām-á kah人冤家，去hông khăn-jió͘–去-ah。」
【Pe̍h-ōe-jī】
Kin-á-ji̍t beh siāu-kài ê gí-sû sī khăn-jió͘, khêng-si̍t chhiūⁿ chit khoán sû, sī tī Ji̍t-pún sî-tāi, Tâi-gí kah Ji̍t-gí sio thàu-lām ê sán-bu̍t, ū 1-kóa Ji̍t-gí lāi-té ū, m̄-koh Tâi-gí lāi-té bô–ê, chŏaⁿ ti̍t-chiap kā Ji̍t-pún-ōe the̍h ji̍p-lâi Tâi-gí kóng, khip-siu chò Tâi-gí ê chi̍t-pō͘-hūn. Tī chia ē-sái kóng kúi ê lē, hoān-sè ta̍k-ke mā ū thiaⁿ–kòe, chhin-chhiūⁿ siat-chut, hăn-tó͘-luh, khăng-páng chit chióng–ê, lóng sǹg sī Ji̍t-lâi-sû.
Chit khoán ōe, tī goán chit iân ê lâng koh tiāⁿ tiāⁿ ū leh kóng, m̄-koh, hoān-sè sī ē-hiáu kóng Ji̍t-gí ê lāu-pòe–ê chiām-chiām bô–khì, chit kóa gí-sû mā jú lâi jú hán-tit thiaⁿ–tio̍h, só͘-pái, chit-má chià chit ê ki-hōe koh lâi kā ta̍k-ke siāu-kài–chi̍t-ē.
Ōe koh kóng tò–tńg-lâi, chit ê khăn-jió͘ nā tī kò͘-sū lāi-té só͘ kóng–ê, “Nah ē hiah kín to̍h khì hō͘ khăn-jió͘–khì!” Tī chia, sī kái-koat, oân-sêng ê ì-sù, to̍h sī leh kóng Pe̍h-ōe-jī nah ē hiah hó o̍h, A-lông sûi to̍h o̍h ē-hiáu.
Koh lēng-gōa 1 ê ì-sù, to̍h sī leh kóng lâng í-keng kòe-sin–a, tān-sī, nā iōng khăn-jió͘ chit tè sû, hit ê lâng it-tēng m̄-sī lán kài chhin-kīn ê lâng, hoān-sè lán koh ē kám-kak hit ê lâng kài kò͘-lâng-oàn, sio̍k tī hāi-á hit khoán–ê, iōng khăn-jió͘ lâi kóng khah bô hiah chun-tiōng. Ōe ē-sái án-ne kóng, “Lí kóng A-lîm-á–o͘h? Chêng chi̍t-chām-á kah lâng oan-ke, khì hông khăn-jió͘–khì-ah.”
