Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
口述◎張宗隆
記錄◎江委螗
關係耶穌降生ê記載
馬太福音ê記載是講主耶穌ê降生是馬利亞對聖神懷孕；路加福音記載聖神臨到馬利亞，馬利亞就受懷孕。所以咱kap普世教會做伙按呢告白：「阮信耶穌基督，上帝ê獨生Kiáⁿ咱ê主，祂對聖神投胎，對在室女馬利亞出世……」《使徒信經》。約翰福音無寫著主耶穌ê降生，是用真哲學ê描述講起講起主耶穌道成肉體，講著伊ê本質。馬可福音無記載主耶穌ê降生，因為是對主耶穌出來宣教開始記載，自然就無講著主耶穌ê降生。
約翰福音3章16～17節
今仔日所讀ê兩節聖經節是約翰福音第3章16～17節：「上帝連伊獨一ê子都賜互世間，欲互逐個信伊ê人免滅亡，反轉得著永遠ê活命，伊即呢疼世間！因為上帝差伊ê子來世間，毋是欲審判世間，是欲通過伊來拯救世間。」這兩節是有一遍有人客來訪問主耶穌，伊hâm人客咧交談分享，佇討論真長ê記事內面ê兩節若定。這ê人客是啥物人？
佇烏暗中ê法利賽派人尼哥德慕
此個人叫做尼哥德慕(舊譯「尼哥底母)」，是法利賽派ê人，有一暗伊來見耶穌。法利賽派ê人攏真嚴格遵守摩西ê律法，m̄-nā佇聖經內底摩西ê律法，嘛包括後來𪜶流浪去真濟所在所加添為著beh解說律法ê代誌──風俗習慣、傳統。法利賽ê人攏有遵守，會當講是品德真懸，真得著猶太人民ê敬重，閣尊重講𪜶是人民生活ê教師，是律法ê教師。聖經閣寫尼哥德慕是猶太人ê領導者──猶太人公會ê議員。公會是羅馬政府授權互猶太人管理宗教、生活事務ê最高機關。用台灣ê政治體制來比拚，伊是立法院兼司法院ê委員。伊閣是一ê足好額ê人（約翰福音19章39節）。
耶穌不過是一個社會基層ê人物，抵出來宣教，尼哥德慕是按怎暗時來揣耶穌？約翰福音有留一ê線索，是文學ê觀點嘛是咧表達信仰：暗時代表烏暗，尼哥德慕暗時來，表示伊猶是屬佇烏暗ê人、猶閣hō͘烏暗ê權勢控制ê人。主耶穌是真光、是人類ê光，尼哥德慕是屬烏暗，對伊ê心底、靈命真自然愛beh去揣耶穌，伊著ài對主耶穌才ē-tàng脫離烏暗入去光明，對主耶穌得著光明ê性命。
主耶穌ê身分
約翰福音3章2～21節，𪜶咧討論ê中間，內面ê 16～17節有透露主耶穌ê身分，假若真間接，毋過閣足直接。主耶穌佇間接ê中間講祂家己是上帝獨一ê kiáⁿ，上帝ê獨生kiáⁿ，上帝kan-na這ê kiáⁿ。真自然，主耶穌是上帝所疼、上疼，kap上帝上親密、上親近。
Hâm一ê少年家見面，普通時咱會按呢講：「哎唷！你有夠sêng恁爸爸！講話ê語氣、做代誌ê法度都攏sio-siâng。看著你kán-ná看著恁爸爸。」主耶穌就是按呢，祂所想ê是想上帝所想ê，所做ê是照上帝ê意思做，所以看著主耶穌就是看著上帝。主耶穌嘛按呢講（12章45節，14章9節）。Chia ê話實際上是beh thong-kòe文字表達：主耶穌kap上帝是仝質ê，本質、性質是sio-siāng，主耶穌kap上帝是一體ê。
約翰福音1章1～5節：「創世以前就有道，道及上帝同在，道是上帝。伊佇創世以前就及上帝同在。上帝通過伊創造萬有；一切被造ê逐項攏是通過道來創造。佇伊內面有活命；此個活命是人類ê光。此個光佇烏暗中啲照，烏暗毋曾贏過光。」這五節，佇咱基督信仰、聖經內面非常重要，毋過無好理解，人ê語言遮爾有限，無法度表達上帝。「道可道非常道，名可名非常名。」彼ê道、真理，你若用話會當kā講盡，彼ê就毋是道、毋是真理。咱有限ê人無論用偌濟語言beh表達上帝攏表達袂清，咱kan-ta會當倚靠聖神ê感動，hō͘咱ê心靈漸漸領悟。
上帝疼世間
約翰福音第3章16節，現代台語譯本用台灣話語法將原文ê意思表達出來，若照原文ê字排，就是「上帝遮爾疼世間：」下面咧說明，按呢翻譯怪怪，若是寫文章猶ē-sái，若讀出來就sa無。上帝遮爾疼世間，按怎疼？
Siōng-tè liân I to̍k-it ê Kiáⁿ to sù hō͘ sè-kan, beh hō͘ ta̍k-ê sìn I ê lâng bián bia̍t-bông, hoán-tńg tit-tio̍h éng-oán ê oa̍h-miā, I chiah-ni̍h thiàⁿ sè-kan！
咱ê話是按呢講：連啥物啥物都hō͘咱ah，伊即呢疼世間！
永遠ê活命
啥物是「永遠ê活命」？咱講「永生」，啥物號做永生？靈魂不滅，若靈魂不滅，咱過身了攏會變做魔神仔、孤魂野鬼，無依倚。你若靈魂不滅閣過來就愛進入輪迴，可能出世做蠓蟲、精牲。若ē-tàng出世koh做人就足好命，毋過嘛是佇人生ê苦海內面，輪迴毋知愛幾遍，有一日若照華語講ê「功德圓滿」，就會當脫離輪迴。脫出輪迴beh去tó-ūi？佛家講就是空、虛。
有人講beh去天堂。天堂是新約彼ê時代希臘羅馬神話內面ê天堂？抑是道教、中國神話內面ê天庭？抑是進入聖經講著ê「天堂」？「天堂」若準互咱小可理解死後欲去ê所在，毋過聖經至少佇字面上無「天堂」此個詞。和合本有兩位(希伯來9章24節；彼得前書3章22節)，卻是真無適當ê翻譯。巴克禮譯本、天主教思高本、和合本修訂版、現代中文譯本、現代台語譯本攏無此個譯詞。原文ê意思根本就毋是天堂啊！按呢我是beh去tó-ūi？
到底啥物號做「永生、永遠ê活命」？Kám-sī長生不老？長生不老有好無？會活kah tòng-bē-tiâu。活愈久罪愈「重」，罪上加罪，彼時咱才知，原來人會死是上帝ê祝福。啥物是永遠ê？有啥物是永遠存在、活teh？只有上帝是永遠存在、永遠bōe hiú-nōa、bōe敗壞，是永活。獨獨上帝ê性命是活ê，主耶穌beh hō͘咱知影上帝繼續teh治理，teh疼咱人類、世界、宇宙。祂m̄-nā疼團體，嘛疼每一ê人，嘛kā咱治理、引chhōa。永遠ê活命就是分享上帝ê性命，咱活佇這世間，對信耶穌基督開始就得著上帝性命ê本質。按呢，咱就會當hâm上帝永遠做伙、上帝hâm咱同在、hâm咱tòa做伙。上帝hō͘主耶穌臨到世間，降世是ài咱thong-kòe信耶穌基督得著上帝性命ê本質，活落去。
有時咱會退步、有時咱會離開上帝，有時上帝ài咱按怎，咱偏偏無ài，一遍兩遍三遍……上帝性命ê本質咱會失去。總是，咱信耶穌基督、堅信，koh歡喜sūn-thàn上帝ê旨意，上帝性命ê本質就會愈來越加添，聖經所講ê長大成人、長大成熟。
上帝差伊ê Kiáⁿ來世間
上帝ê旨意hō͘主耶穌基督來做啥？約翰福音3章17節講：“In-ūi Siōng-tè chhe I ê Kiáⁿ lâi sè-kan, m̄-sī beh sím-phòaⁿ sè-kan, sī beh thong-kè I lâi chín-kiù sè-kan.”毋過佇聖經tiāⁿ-tiāⁿ讀著講上帝咧審判、耶穌咧審判。比如，舉行音樂會ê目的是beh hō͘人歡喜、提高咱ê水準，Kám-sī beh kā人審判、hō͘人艱苦？毋過聽無ê人聽kah足艱苦，是啥物人咧審判？另外一ê例：一ê公務人員攏無收紅包，煞受著人ê排斥、無受歡迎，按呢是啥物人咧審判啥物人？有守規矩ê成做𪜶ê審判，抑是捌ê人看著𪜶自我審判？
「……是beh通過伊來拯救世間。」按呢哪會有人會滅亡、落地獄（口語）？有ê人哪會bōe-tàng得著上帝thong-kòe主耶穌beh hō͘ i ê救恩？創世記第2、3章記載：人類ê始祖亞當、夏娃違背上帝ê命令，食無應該食ê果子。聖經用擬人化ê文筆表達上帝kap人ê關係：有一日黃昏，清爽ê時間，上帝來伊甸園散步，hâm亞當、夏娃講話，這遍是按怎彼兩ê無出來？上帝出聲：「你佇tó-ūi？」亞當講：「我佇園內聽著祢ê聲就真驚，因為我赤身露體就bih起來。」上帝ê to̍k-seⁿ Kiáⁿ就是耶穌基督來到這世間，有人有相信祂、接受祂做主就得救，對相信ê開始就得著上帝ê品質、得著上帝ê活命，成做上帝ê女兒，愈來愈活出耶穌基督ê款式。
上帝上大ê禮物─脫離烏暗
有人無beh接受上帝hō͘咱上大ê禮物，上帝上大ê禮物是，咱ê主耶穌beh hō͘人脫離烏暗進入光明。毋是主耶穌kā咱審判，是咱審判咱家己，咱無愛咱性命ê垃圾佇光明ê中間照出來。上帝臨在、掌權ê所在，就是滿滿ê光明，上帝遐邇燦爛ê光，屬烏暗ê人無法度承受。因為咱無接受上帝ê獨生Kiáⁿ，咱ê性命無得著潔淨、轉化，自然就領受袂著上帝ê性命。上帝beh拯救咱、hâm咱做伙，咱結果知難而退、感覺袂堪得就自動退出，只好bih佇烏暗ê所在流目屎，家己怨嘆、懊惱、咬牙切齒。上帝遮爾疼咱，祂一直講：來我遮，你來！上帝愛咱接受祂上大上珍貴ê禮物就是主耶穌，thong-kòe主耶穌咱得救，分享上帝ê性命。
尼哥德慕伊ê行為真高尚，伊嘛有社會地位，大家謳咾、尊敬，伊是人生有成就ê，毋過伊猶閣屬佇烏暗，hō͘烏暗ê權勢控制。就是講咱比尼哥德慕較高尚、受尊敬、受肯定，總是咱毋知會猶佇烏暗ê中間，hō͘烏暗kā咱遮khàm、控制bē？咱攏需要隨時接受主耶穌ê疼、赦免、拯救，倒轉來上帝ê面前，領受上帝性命ê本質，就一直會當得著上帝kap咱同在。一直hō͘上帝hâm咱tòa做伙，嘛是hō͘咱hâm上帝tòa做伙。
