Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Lô-khó͘ pē tāng-tàⁿ ê lâng lóng tio̍h lâi góa chia, góa beh hō͘ lín an-hioh. Tio̍h pē góa ê taⁿ, lâi tùi góa o̍h, in-ūi góa ê sim un-jiû khiam-sùn. Án-ni, lín ê sim-sîn chiū ōe tit-tio̍h an-hioh. Góa ê taⁿ ha̍h-ēng, góa ê tàⁿ chin khin. ( Má-thài 11:28-30 )
◎Ông Bí-su
Tè-kok ê taⁿ
Choh-sit-lâng iōng gû-taⁿ kā nn̄g chiah gû kho͘ chò-hóe, kiò gû choh-sit, mā koat-tēng gû beh sái ùi tó-ūi. Kū-iok Sèng-keng ê tiong-kan, put-sî iōng gû-taⁿ lâi pí-phēng kok-ông hē tī jîn-bîn ê tāng-tàⁿ. Siōng chhut-miâ ê lē, I Lia̍t-ông-kì 12:3-12 kì-chài: “Iâ-lô-phò-àm chiū kap Í-sek-lia̍t choân-hōe lâi kìⁿ Lô-phò-àm, kā i kóng, Lí ê lāu-pē hō͘ goán pē kan-khó͘ ê taⁿ; lí ê lāu-pē só͘ hē tī goán ê khó͘-kang, kap tāng ê taⁿ, kiû lí kiám-khin, goán chiū ho̍k-sāi lí……Tē-saⁿ ji̍t Iâ-lô-phò-àm kap chèng peh-sìⁿ kàu Lô-phò-àm hia, chiàu ông só͘ bēng-lēng kóng, Tē-saⁿ ji̍t koh lâi góa chia. Ông ēng pháiⁿ siaⁿ-sàu ìn peh-sìⁿ, pàng-sak lāu-lâng só͘ hiàn ê kè-chhek; chiàu siàu-liân lâng ê kè-chhek tùi peh-sìⁿ kóng, Góa ê pē hō͘ lín pē tāng ê taⁿ, góa beh ke-thiⁿ lín ê taⁿ; góa ê pē ēng piⁿ kéng-kài lín, góa beh ēng giat-á-thâng kéng-kài lín.” (Pa-khek-lé pán)
Tē jī ê lē sī Í-sek-lia̍t lâng tī Ai-ki̍p chòe lô͘-châi. “Góa sī Iâ-hô-hoa lín ê Siōng-tè, bat chhōa lín chhut Ai-ki̍p tōe, bián-tit lín chòe in ê lô͘-po̍k; Góa bat chām-tn̄g lín ê taⁿ ê soh, hō͘ lín théng-sin lâi kiâⁿ.” (Lī-bī-kì 26:13, Pa-khek-lé pán)
Tē saⁿ ê lē sī Pa-pí-lûn iōng tāng-tàⁿ ap-pek Í-sek-lia̍t lâng, iōng ke̍k-tāng ê taⁿ kòa tī lāu-lâng ê sin-chiūⁿ. Í-sài-a 47:6, Siōng-tè kóng: “Góa ū tùi góa ê chú-bîn hoat siū-khì, hō͘ ka-kī ê sán-gia̍p siū lêng-jio̍k, kā in kau tī lí ê chhiú-tiong. Lí bô tùi in si lîn-bín, sīm-chì ēng chin tāng ê taⁿ hō͘ lāu-lâng phāiⁿ.” (Pa-khek-lé pán)
Iâ-so͘ ê thiaⁿ-chiòng oa̍h tī Lô-má tè-kok ê si̍t-bîn thóng-tī tiong-kan. Ông hō͘ jîn-bîn pē ê gû-taⁿ sī pháiⁿ-mi̍h-á. Koan-hē tè-kok ê tī-lí, in lóng se̍k-sāi kah ū chhun. Sò͘ pah-nî ê tiong-kan, bô kâng ê tè-kok chi̍t ê chiap-sòa chi̍t ê, bô-lūn pún-cho̍k á-sī gōa-pang, tè-kok chi̍t ê koh chi̍t ê thong-kòe chong-kàu, chèng-tī, siā-hōe kap keng-chè ê chè-tō͘ kā Iû-thài lâng si̍t-bîn, lóng kā tāng-tāng ê taⁿ hē tī Iû-thài lâng ê sin-chiūⁿ. Tùi lán lâi kóng, lán tùi chit khoán ê taⁿ mā kāng-khoán bô chheⁿ-hūn.
“Lô-khó͘ pē tāng-tàⁿ ê lâng lóng tio̍h lâi góa chia, góa beh hō͘ lín an-hioh. Tio̍h pē góa ê taⁿ, lâi tùi góa o̍h, in-ūi góa ê sim un-jiû khiam-sùn. Án-ni, lín ê sim-sîn chiū ōe tit-tio̍h an-hioh.” Iâ-so͘ beh siúⁿ-sù chi̍t ê sin ê taⁿ hō͘ lán, chit ê taⁿ kah tè-kok ê taⁿ bô kāng-khoán.
Tè-kok ê taⁿ sī pō-le̍k–ê, sī tham-loân–ê. Tè-kok ê ông hē tī jîn-bîn ê taⁿ, hō͘ lâng m̄-chiâⁿ lâng, lâng chiâⁿ-chòe ông ê lô͘-châi, chiâⁿ-chòe ông ê ke-si. Tè-kok ê taⁿ hō͘ lâng bô thang an-hioh:
Ai-ki̍p-ông kā in kóng, “Mô͘-se, A-lûn, lín sī-án-chóaⁿ kiò chit-ê peh-sìⁿ mài choh-kang? Tńg-khì choh-kang!” Ai-ki̍p-ông koh kóng, “Hiān-chāi, chit-ê bîn-cho̍k lâng chiah chōe, lín kèng-jiân kiò in thêng-kang.” Hit-ji̍t, Ai-ki̍p-ông bēng-lēng Ai-ki̍p ê tok-kang kap Í-sek-lia̍t ê kang-thâu, kóng, “Lín mài koh chhin-chhiūⁿ í-chêng khoán be̍h-kó hō͘ chit-ê peh-sìⁿ chòe chng-á; be̍h-kó, hō͘ in ka-kī khì khioh. Tio̍h iau-kiû in chòe kap í-chêng kâng-khoán sò͘-bo̍k ê chng-á, liân chi̍t tè to bōe-kiám–tit. In pîn-tōaⁿ, só͘-í tōa-siaⁿ iau-kiû beh chhut-khì ǹg in ê Siōng-tè hiàn-chè. Tio̍h hō͘ chiah-ê lâng chòe khah tāng ê kang-chok, hō͘ in thiám kah bōe khì thiaⁿ lâng sái-lōng.” (Chhut Ai-ki̍p Kì 5:4-9)
Mô͘-se kap A-lûn khì kìⁿ Ai-ki̍p-ông, tùi i kóng, “Siōng Chú — Í-sek-lia̍t ê Siōng-tè án-ni kóng, ‘Tio̍h hō͘ góa ê chú-bîn khì khòng-iá siú-choeh kèng-pài góa.’” Ai-ki̍p-ông Hoat-ló hē tī Í-sek-lia̍t lâng ê taⁿ hō͘ Í-sek-lia̍t lâng bô hoat-tō͘ khì kèng-pài Siōng-tè, bô thang an-hioh. Tāi-ke mái siūⁿ kóng, lâng sī put-tit-í, góa sī siū pek-hāi, sin-put-iû-kí, bô-ta-ôa. Chóng–sī, nā-sī lâng í-keng chòe lô͘-châi chòe koàn-sì, kú–lâi chiū seⁿ chòe hiah-ê kā i pek-hāi ê lâng kāng-khoán kāng-khoán, ùi sin-chiaⁿ nî-thâu choh kàu nî-bóe, ta̍k-kang choh, ùi thàu-chá choh kàu pòaⁿ-mî, choh kah koàn-sì koàn-sì, choh kah bē-hiáu hioh-khùn, mā m̄-chai-iáⁿ hioh-khùn sī siáⁿ-mi̍h. Goân-té, lâng èng-tong kā lâng tòng-chòe lâng, chóng–sī, lâng hoán-tńg kā ka-tī tòng-chòe lô͘-châi kap ke-si-thâu-á, jio̍k-thé kap cheng-sîn lóng sêng-siū tè-kok ê taⁿ. Nā-sī te̍k-kok kiò lán chòe–ê, lán tio̍h koai-koai-á chòe, m̄-thang hoán-khòng, nā-bô, lán lóng ē sí kah chiok pháiⁿ-khòaⁿ nā-tiāⁿ.
Iâ-so͘ Ki-tok ê taⁿ
Iâ-so͘ kóng: “Lâi góa chia.” Iâ-so͘ ê sim un-jiû khiam-sùn. Un-jiû khiam-sùn ê taⁿ sī sím-mi̍h khoán ê taⁿ? Tè-kok ê taⁿ hō͘ lâng bô thang hioh-chhoán, Iâ-so͘ ê taⁿ beh hō͘ lán tit-tio̍h an-hioh. Lâng kū-choa̍t an-hioh, in-ūi í-keng chòe lô͘-châi chòe koàn-sì ah: “Chì-koân ê Siōng Chú — Í-sek-lia̍t sîn-sèng ê Siōng-tè án-ni kóng, ‘Lín ê tit-tio̍h kiù chāi-tī oa̍t-tò-tńg kap an-hioh; lín tit-tio̍h khùi-la̍t chāi-tī pêng-chēng kap sìn-khò; chóng-sī lín bô beh.’” (Í-sài-a 30:15, Pa-khek-lé pán) Tâi-oân lâng keng-kòe bô kâng chèng-koân hē tī lán sin-chiūⁿ ê taⁿ, tī chhim-khek thé-hōe Tiong-kok Kok-bîn-tóng ê 228 tó͘-sat kap Pe̍h-sek Khióng-pò͘ liáu-āu, chai-iáⁿ ài ha̍k-si̍p “ū hīⁿ, bô chhù” kap “kek-tiām-tiām”, choan-bū piàⁿ keng-chè, chiâⁿ-chòe choan-cheng ê hōe-siā cheng-seⁿ (しゃちく) ti̍t-kàu kòe-lô-sí (かろうし).
Sat-ka-lī-a 9:9 kóng-khí khiam-sùn ê ông: “Sek-an ê chú-bîn ah, tio̍h hoaⁿ-hí khoài-lo̍k! Iâ-lō͘-sat-léng ê chú-bîn ah, tio̍h hoan-ho͘! Lí khòaⁿ, lí ê kun-ông lâi lah! I sèng-lī khái-soân; i khiam-sùn khiâ-lû, chiū-sī khiâ lû-á-kiáⁿ.”
Lâi pē Iâ-so͘ ê taⁿ, chiap-siū Siōng-tè ê kok ê tī-lí, hō͘ lán ū un-jiû kap khiam-sùn. Lán ân-tòng-tòng ê keng-kah-thâu chiah ū hioh-khùn, tēⁿ-tiâu-tiâu ê kûn-thâu-bú chiah thang pàng hō͘ lēng. Iâ-so͘ hō͘ lán taⁿ ha̍h-ēng. Lâng su-iàu chiap-siū tī-lí, sin ê Mî-sài-a, sin ê ông ê thóng-tī, Iâ-so͘ chai-iáⁿ lâng su-iàu hioh-khùn, lâng ê jio̍k-thé kap sim-sîn lóng su-iàu an-hioh.
Pêng-chēng ê lâng chai-iáⁿ chóaⁿ-iūⁿ chhoán-khùi. Tâi-oân-ōe kóng “hioh-chhoán,” lán hioh-khùn ê sî-chūn ē-tàng hó-hó-á chhoán-khùi. Bunun ōe kóng “Mihumisang”, chiū sī lí ū teh chhoán-khùi–bô? Bô an-hioh, bô chhoán-khùi. Lán chhiùⁿ-koa ê sî-chūn lóng chin tùi-tiōng chhoán-khùi, lán gîm-chhiùⁿ sèⁿ-miā ê koa, Siōng-tè siúⁿ-sù ê oa̍h-miā ê koa, hō͘ lán tī Chú Iâ-so͘ Ki-tok hioh-khùn, chhoán-khùi.
Lâi pē Iâ-so͘ Ki-tok ê taⁿ
Ha̍k-si̍p Chú Iâ-so͘ Ki-tok, lán lâi pē I ê taⁿ, chhin-chhiūⁿ Lo̍h Î-tō bo̍k-su kun-kù N̂g Chiong-hui bo̍k-su tùi sîn-ha̍k kàu-io̍k ê īⁿ-siōng─Ki-tok-tô͘ sim-chì ê ióng-sêng, Sîn-ha̍k sim-chì ê ióng-sêng í-ki̍p Ho̍k-sāi sim-chì ê ióng-sêng─chit saⁿ têng ê ióng-sêng só͘ siá ê koa “Ki-tok sim-chì chòe góa oa̍h-miā”:
1. Ki-tok sim-chì chòe góa oa̍h-miā,
taⁿ góa teh oa̍h m̄-sī ūi góa.
Sok-chō jîn-keh, kam-goān siū-khó͘,
bô kiû su-lī, ūi lâng lâi oa̍h;
Hû-chō͘ jio̍k-sió, koàn-kò͘ pi-bî,
ko-kú kong-gī, jîn-ài chhiong-móa.
[Ho̍k-koa]
Khún-kiû Sèng Sîn, kàu-tok ín-chhōa,
Ki-tok te̍k-sèng chiâⁿ-hêng tī góa.
2. Sîn-ha̍k sim-chì chòe góa su-sióng,
taⁿ góa teh siūⁿ m̄-sī góa siūⁿ.
Ki-tok ê sim chòe góa ê sim,
khiam-pi sūn-ho̍k, hi-seng bô͘-iūⁿ;
Ba̍t-pâng lêng-siu, piⁿ-phah ka-tī,
hoán-séng keng-sin, put-toān tui-kiû.
[Ho̍k-koa]
3. Ho̍k-sāi sim-chì chòe góa kang-chok,
taⁿ góa teh chòe m̄-sī góa chòe.
Ki-tok sū-kang un-khûn si̍t-chiān,
pah-poaⁿ un-sù, hun-hióng chhek-ōe;
Soan-kàu bo̍k-ióng, chok-ga̍k, hia̍p-tâm,
kàu-io̍k, gián-kiú, ho̍k-bū, chai-pôe.
[Ho̍k-koa]
Ū hioh-chhoán, lán chiah ē chai-iáⁿ sím-mi̍h sī chin-chiàⁿ ta̍t-tit lán phah-piàⁿ ê chiàn-tiûⁿ. Nā-sī lán bô-êng kah bô hoat-tō͘ chhoán-khùi, lán kî-si̍t sī m̄-chai ka-tī ê jîn-seng tàu-té beh chhòng siáⁿ, sī teh bo̍k-bo̍k-siû. Nā-sī lán an-hioh tī Chú Iâ-so͘, taⁿ I ê taⁿ, chiū bōe khai-hùi sim-sîn tī m̄-sī o̍h-iūⁿ Chú Iâ-so͘ Ki-tok ê tāi-chì.
Má-thài Hok-im tē 12 chiuⁿ chiap-sòa an-hioh-ji̍t ê gī-tê. Iâ-so͘ ùi be̍h-á-hn̂g keng-kòe, I ê bûn-tô͘ in-ūi pak-tó͘ iau chiū tiah be̍h-sūi lâi chia̍h, Iâ-so͘ ín-iōng keng-bûn, kóng: “‘Góa ài lîn-bín, bô ài chè-mi̍h.’ Lín nā liáu-kái chit-kù ōe ê ì-sù, chiū bōe kā bô chōe ê lâng tēng-chōe.” Tī an-hioh-ji̍t, Iâ-so͘ lâi-kàu hōe-tn̂g, I i-tī chhiú khê–khì ê Lâng.
An-hioh hō͘ lâng tit-tio̍h pá-chiok, hō͘ lâng tit-tio̍h i-tī. An-hioh ê pún-chit sī lîn-bín, sī Siōng Chú tùi lâng ê lîn-bín, lîn-bín chē-chē hō͘ tè-kok tè kah bô thang hioh-chhoán ê lâng, lîn-bín lô-khó͘ pē tāng-tàⁿ ê jîn-bîn. Iâ-so͘ un-jiû khiam-sùn ê thiàⁿ-thàng, hō͘ lâng bêng-pe̍k Siōng-tè ê kok ê tī-lí kap I tùi sè-kan lâng ê thiàⁿ-sioh.
Gîm Sèng-si
141, Lô-khó͘ pē tāng-tàⁿ tio̍h chiū-kūn góa
Thó-lūn kap hêng-tōng
1. Ū hioh chiah ū chhoán, ū an-hioh chiah ū thang chhoán-khùi. Lí kám ū tông-ì? Chhiáⁿ hun-hióng lí ê keng-giām.
2. Tè-kok bô kā lâng tòng-chòe lâng, lâng chiâⁿ-chòe sò͘-jī, kì-hō kap lô͘-châi. Lán nā pē Iâ-so͘ ê taⁿ un-jiû khiam-sùn tòe I lâi o̍h, ē hoat-seng siáⁿ-mi̍h tāi-chì? Kap tâng-phōaⁿ chò-hóe lâi pē Iâ-so͘ ê paⁿ.
