Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎鄭加典
上主拯救ê路程
一脈相續無時停
先知懺語有講明
應允彌賽亞降生
本有君王ê才情
願做羊羔來表明
佇受刣ê地靜靜
合嘴剪毛ê面前
為拯救罪人犧牲
佇十字架頂受釘
救贖功勞ê過程
來看耶穌ê生平
耶穌生平ê代誌
是對加利利開始
招集門徒近倚祂
無嫌抓魚毋識字
耶穌殷勤來教示
教育門徒識真理
親身示範閣裝備
遍行加利利海邊
門徒受差行出去
走遍四圍ê鄉里
醫病趕鬼傳道理
一切遵趁主指示
堅持信念與意志
較贏撒但ê陷阱
無為做大心偏移
甘願謙卑像孩兒
耶穌帶來新向望
拯救人類ê苦痛
勞苦重擔攏解放
心靈自由得輕鬆
可惜固執猶太人
信仰堅持無相同
執守律法無放鬆
忽略救恩新向望
祭司頭及法利賽
想空想縫來陷害
窘逐耶穌無數擺
直到各各他受害
救贖恩典主安排
猶太人拒絕不該
拯救人子受迫害
道成肉體𣍐理解
救贖工程無延誤
因為復活主耶穌
重新啟發眾信徒
五旬節開新出路
聖神充滿來幫助
門徒信心得堅固
對耶路撒冷起步
直到地極無盡途
Siōng Chú chín-kiù ê lō͘-thêng
It-meh saⁿ-sòa bô sî thêng
Sian-ti chhàm-gú ū kóng-bêng
Eng-ún Bí-sài-a kàng-seng
Pún ū kun-ông ê châi-chêng
Goān chòe iûⁿ-ko lâi piáu-bêng
Tī siū-thâi ê tōe chēng-chēng
Ha̍p-chhùi chián-mn̂g–ê bìn-chêng
Ūi chín-kiù chōe-jîn hi-seng
Tī si̍p-jī-kè téng siū tèng
Kiù-sio̍k kong-lô ê kòe-thêng
Lâi khòaⁿ Iâ-so͘ ê seng-pêng
Iâ-so͘ seng-pêng ê tāi-chì
Sī tùi Ka-lī-lī khai-sí
Chio-chi̍p bûn-tô kūn-óa I
Bô hiâm lia̍h-hî m̄ bat jī
Iâ-so͘ un-khûn lâi kà-sī
Kàu-io̍k bûn-tô͘ bat chin-lí
Chhin-sin sī-hoān koh chong-pī
Piàn liâⁿ Ka-lī-lī hái-piⁿ
Bûn-tô siū chhe kiâⁿ chhut-khì
Cháu-piàn sì-ûi ê hiong-lí
I-pēⁿ kóa-kúi thoan tô-lí
It-chhè chun-thàn Chú chí-sī
Kian-chhî sìn-liām kap ì-chì
Khah-iâⁿ Sat-tàn ê hām-chíⁿ
Bô ūi chòe-tòa sim phian-î
Kam-goān khiam-pi chhiūⁿ hâi-jî
Iâ-so͘ tòa lâi sin ǹg-bāng
Chín-kiù jîn-lūi ê khó͘-thàng
Lô-khó͘ tāng-tàⁿ lóng tháu-pàng
Sim-lêng chū-iû tit khin-sang
Khó-sioh kò͘-chip Iû-thài lâng
Sìn gióng kian-chhî bô saⁿ-tâng
Chit-siú lut-hoat bô pàng-sang
Hut-lio̍k kiù-un sin ǹg-bāng
Chè-si-thâu kap Hoat-lī-sài
Siūⁿ -khang-siūⁿ-phāng lâi hām-hāi
Khún-tio̍k Iâ-so͘ bô-sò͘-pái
Tit-kàu Kok-kok-tha siū-hāi
Kiù-sio̍k un-tián Chú an-pâi
Iû-thài lâng kū-choa̍t put-kai
Chín-kiù Jîn-chú siū pek-hāi
Tō chiâⁿ jio̍k-thé bōe lí-kái
Kiù-sio̍k kang-têng bô iân-gō͘
In-ūi koh-oa̍h Chú Iâ-so͘
Têng-sin khé-hoat chèng sìn-tô͘
Gō͘-sûn-cheh sin khui chhut-lō͘
Sèng-sîn chiong-móa lâi pang-chō͘
Bûn-tô͘ sìn-sim tit kian-kò͘
Tùi Iâ-lō͘-sat-léng khí-pō͘
Tit kàu tōe-kek bô chīn-tô͘
