Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chhòng-sè-kì 39: 17
Lí só͘ tòa-lâi lán chia, hit ê Hi-pek-lâi ê lô͘-po̍k, kàu góa chia, beh hì-lāng góa.
◎黃汝誠
Chit-má ê gín-á tī ha̍k-hāu lóng-ū teh kà sèng-pêng-hoat, kà in kóng nā-ū tī ha̍k-hāu lāi-té á-sī ha̍k-hāu gōa-kháu ū lâng kā lí kāng, hō͘ lí kám-kak bô sóng-khoài, lí ē-sái kā lāu-su kóng, chit-má che-sī ū hoat-lu̍t kui-hoān–ê.
Góa khòaⁿ Ji̍t-pún lâng chá-khí-sî siōng-pan ê sî-chūn chē tiān-chhia, lâm-lâm lú-lú oe-oe-kheh-kheh, chiⁿ koh chài chiⁿ, chiⁿ kah beh chhut-chiap, tiān-chhia ê mn̂g mā kuiⁿ bōe khí–lâi, chit-ê sî-chūn, chām-bū-goân chhiú kòa pe̍h-sek ê chhiú-lông-á, sak chèng-lâng ê kha-chhng á-sī seng-khu, chhia-mn̂g chiah-ū hoat-tō͘ kuiⁿ-khí–lâi. Chit-ê tāi-chì, múi chi̍t kang, múi chi̍t sî, múi chi̍t pang chhia tī Ji̍t-pún lóng leh hoat-seng; sòa–lo̍h-lâi, koh khah chhì-khek–ê, to̍h-sī chhia-siuⁿ lāi-bīn ê lâm-lâm-lú-lú ê sin-khu khòe tàu-tīn, lâng he̍k-sī bīn-tùi-bīn, he̍k-sī kha-chhng-phóe ǹg pa̍t-lâng, bô-lūn chóaⁿ-iūⁿ, thâu-chêng sin-khu kap āu-piah kha-chhng lóng ē hō͘ lâng kheh–tio̍h, chit-ê sî-chūn lí nā kám-kak tó-ūi bô sóng-khoài, lí ē-sái tōa-siaⁿ hoah kiù-miā 嫌がらせ kóng góa bô sóng-khoài, tān-sī, chē-chē lâng lō͘-bé bô-khì pò-àn. Kun-kù thóng-kè, siū-hāi-chiá to-sò͘ lóng-sī lú-sèng pêng-iú.
M̄-koh tāi-chì mā-ū bô-kāng-khoán–ê, chit-pái siū-hāi-chiá sī lâm-sèng, ū lú-chú choan-bûn chhōe ta-po͘ ha̍k-seng gín-á, ēng i ê heng-khám khì oe ha̍k-seng, sīm-chì ēng i ê hā-thé hit tè téng-téng ê kut-thâu kā ha̍k-seng ti̍t-ti̍t lu, i ti̍t-ti̍t lu, sòe-kiáⁿ mā m̄ chai siáⁿ-mi̍h tāi-chì, tān-sī, i nā khì lu chèng-ti̍t ê ta-po͘-lâng, ta-po͘-lâng ē kóaⁿ-kín sóa-khui á-sī bīn oa̍t chi̍t ê hong-hiòng lâi pó-hō͘ ka-tī, lú-chú chit-sî kiàn-siàu tńg siū-khì, tōa-siaⁿ ho̍a 嫌がらせ.
Hó-ka-chài, Tâi-pak-chhī chiah 240 gōa bān lâng nā-niā, siōng-pan chē tiān-chhia, sui-bóng lâng chē, tān-sī bōe-kóng kha-chhng sio oe-khoeh, koh in-ūi tāi-ke lóng ē-hiáu khiâ o͘-tó-bái, só͘-í chhin-chhiūⁿ tī Ji̍t-pún ê tiān-chhia lāi-té hoat-seng ê chit-khoán tāi-chì lán khah bōe tú-tio̍h.
Kóng-tio̍h o͘-tó-bái, Ji̍t-pún lâng mā chin him-siān lán Tâi-oân lâng, in teh kóng, khòaⁿ lán Tâi-oân lâng khiâ o͘-tó-bái, chē āu-piah ê ta-po͘ á-sī cha-bó͘ siang-lâng kheh chò-hóe, chiok chhin-bi̍t, o͘-tó-bái sio-chài, āu-pêng hōaⁿ thâu-chêng, mā-ū tiong-ng koh gia̍p gín-á, si̍t-chāi chin chhin-bi̍t, mā si̍t-chāi chin gûi-hiám.
