◎楊隆慶
台南市有一个佇世界提著設計獎ê「巴克禮紀念公園」。是按怎台南市ê公園是咧記念一个英國蘇格蘭來ê宣教師咧？清日「甲午戰爭」清國戰敗，kā台灣割hō͘日本。
日本軍隊對台灣ê北海岸上岸，一路落南。途中有拄著抵抗，爆發台灣史上悲慘ê「乙未戰爭」。真濟無辜、悽慘ê百姓喪失性命，毋過mā是無法度改變台灣hō͘日本殖民ê運命。一府、二鹿、三艋舺，以早台南府城是台灣上鬧熱ê所在。1895年日本軍隊咧欲到台南ê時，彼當時清國駐守台南ê「黑旗軍」統領劉永福，落尾成做台灣民主國總統。伊知影已經無法度挽回局勢。傳說講伊打扮做阿婆ê模樣，對安平港坐船落跑，落尾佇烏水溝去予日本軍艦chang–tio̍h。這就是「阿婆仔làng港」這句話ê由來。
日本軍隊本底叫是佇台南府城會拄著反抗，大將軍乃木希典拍算欲大軍攻入去城內。這ê時陣城內ê人攏感覺真驚惶。佇真危急ê狀況下，台南ê士紳就拜託巴克禮牧師代表府城ê百姓佮日本大將軍交涉。
巴克禮知影六工前拄發生「麻豆事件」，有19个台灣人hō͘台灣人家己thâi死，其中有8个人是信「番仔教」ê（當時ê台灣人kā基督教稱做番仔教）。「麻豆事件」ê起頭是人誤會講基督徒會𤆬日本軍隊入府城。其實這是「黑旗軍」咧使弄，「黑旗軍」kā對日本ê怨恨掠信番仔教ê人tú-siàu。巴克禮牧師真疼台南府城ê鄉親，無希望有人死傷，伊請台南士紳寫切結書，保證台南市民bē反抗。佇日本軍隊欲攻入城ê前一暗，巴克禮牧師一陣人佇危險ê中間對小南門出發，前往日本軍營，若親像行過死蔭ê山谷。佇二層行溪拄著日本軍隊，巴克禮牧師kap日本大將軍交涉，落尾日本軍隊和平入城，連一个死傷都無。
事後有人回想：
彼一暝當阮hō͘人放sak ê時
城內亂紛紛 城外大軍迫倚
有人選擇kap咱做伙
彼个人就是行踏規个南部山區
辛苦傳福音 煞hō͘人潑屎
潑kah滿面全屎湯mā bē受氣ê巴克禮牧師
巴克禮牧師m̄-nā化解一場真有可能發生ê大屠殺，伊mā創設台灣頭一間西式大學─台南神學院，kā西方「啟蒙運動」ê理性思考帶入台灣。佇神學院內底有教算術，mā有科學儀器hō͘學生關察日頭kap月娘，閣嘔心血kā聖經用PE̍H-ŌE-JĪ翻做台語ê版本，mā紲接馬雅各醫生推動「白話字運動」。
伊佇光緒11年6月閣開辦台灣第一份報紙─「台灣府城教會報」，現此時叫做「台灣教會公報」。「教會公報」有大量歷史文獻，除了傳福音、報導教會消息以外，mā報導一百四十年來台灣社會所發生ê代誌。
若欲了解台灣ê歷史kap學校歷史課無教過ê代誌，親像漢人kap平埔族、高山原住民互動ê情形，或是二二八事件受難者ê故事kap社會事件，佇「教會公報」攏有真濟資料通揣。
「教會公報」1885年開始用白話字報導，m̄-nā有本地消息，mā有世界ê新聞。1912年4月發生「鐵達尼號」沉船事件，6月「教會公報」就有刊載，公報亦有刊英國女王生日ê代誌。「教會公報」是彼當時台灣唯一報導世界消息ê報紙。
馬雅各醫生有捐一台印刷機，這是台灣頭一台印刷機（現子時保存佇高雄科學工業博物館）。巴克禮牧師專工轉去英國倫敦學欲按怎組合，才閣轉來台灣kā這台印刷機組合、鬥起來。台灣頭一份報紙─「台灣府城教會報」就是用這台印刷機印出來ê。
巴克禮牧師佇十六歲ê時就有寫獻身文欲傳福音，紲落來佇伊逐冬ê生日攏會閣寫一篇獻身文。伊本底是一个極優秀ê電學專家。
巴克禮牧師對伊所信仰ê造物主有堅定ê信，對台灣人有深深ê疼，對台灣這片土地有講bē盡ê情。這就是為怎樣「巴克禮紀念公園」欲用伊ê名來號名。
