Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lîm Jū-jîn
Má-lī-a kéng-tio̍h siōng-hó ê hok-hūn (Lō͘-ka Hok-im 10:42), chit ê sìn-sit tāi-ke lóng chin se̍k. Góa tùi chú-ji̍t-o̍h kàu taⁿ, thiaⁿ kòe iú-koan chit ê sìn-sit ê káng-tō ū kui cha̍p pái. Ē-sái kóng lóng chheng-chàn Má-lī-a bêng-tì ê soán-te̍k. Ū chi̍t-kóa gî-būn ká-ná m̄-bat kóng–tio̍h. Ná-chún Má-tāi kah Má-lī-a lóng soán-te̍k hit–ê siōng-hó ê hok-hūn, Iâ-so͘ kám-m̄-sī ài iau pak-tó͘? Má-tāi kám m̄-chai pôe Iâ-so͘ khai-káng khah khin-khó? Chún-kóng Iâ-so͘ bô lâi, góa mā chai, chē phòng-í kò͘ tiān-sī pí chhoân saⁿ-tǹg khah sù-sī. Iâ-so͘ kah-ì lán chhiūⁿ Má-lī-a kéng siōng-hó ê hok-hūn, he̍k-chiá sī sêng-tam chek-jīm ê Má-tāi?
Lán sî-siông bīn-tùi soán-te̍k. Ū–ê soán-te̍k sī “lêng-ha̍p iû-hì”. Kán-tan kóng chiū-sī só͘-ū ê lâng tit-tio̍h ê chóng-sò͘ sī kò͘-tēng–ê. Chi̍t ê lâng ke the̍h it-tēng chō-sêng pa̍t-lâng kiám the̍h. Chit-chióng chêng-hêng beh án-chóaⁿ soán-te̍k? Bīn-tùi tōa-kiáⁿ ē-tàng tit-tio̍h ê chiok-hok, Ngá-kok tit-tio̍h bú-chhin Lē-pek-ka kó͘-lē, iōng khi-phiàn ê chhiú-tōaⁿ tit-tio̍h lāu-pē ê chiok-hok. Tong-jiân, chiàⁿ-pâi ê tōa-kiáⁿ Í-sò chiū sit-khì i èng-kai tit-tio̍h ê chiok-hok. Án-ne, Ngá-kok ê soán-te̍k kám sī Siōng Chú khòaⁿ chòe hó–ê?
Ū-ê soán-te̍k tùi pa̍t-ê-lâng pēng bô bêng-hián ê éng-hióng. Tān-í-lí soán-te̍k kan-ta chia̍h-chhài lim-chúi, m̄ chia̍h ông-kiong ê chia̍h-mi̍h kap chiú. Tng i chò chit-ê soán-te̍k ê sî, i ū khó-lū tio̍h kàm-hō͘ ê lâng ê li̍p-tiûⁿ. (Tān-í-lí-su 1:8-16) Tān-í-lí soán-te̍k ê m̄-sī it-poaⁿ lâng khòaⁿ chòe siōng-hó ê hok-hūn, hoán-tò khah chhin-chhiūⁿ hi-seng. Án-ne Tān-í-lí kian-chhî i ê sìn-gióng, tông-sî bô hō͘ kàm-hō͘-jîn pháiⁿ-chò, chit ê soán-te̍k èng-kai sī Siōng Chú só͘ hoaⁿ-hí–ê.
Mô-se goân-pún ē-tàng soán-te̍k lâu tī Ai-ki̍p ông-kiong hiáng-siū êng-hôa hù-kùi. I khiok soán-te̍k kap Í-sek-lia̍t lâng tâng siū-khó͘. I chiâⁿ-chò Siōng-tè só͘ sú-iōng ê léng-siù, tòa-niá peh-sìⁿ chhut Ai-ki̍p. “I khòaⁿ ūi-tio̍h Ki-tok siū lêng-jio̍k pí Ai-ki̍p ê châi-pó khah pó-kùi, in-ūi i gióng-bōng chiong-lâi ê pò-siúⁿ.” (Hi-pek-lâi-su 11:26) Chit-ê lē kèng-ka bêng-pe̍k chí-chhut Mô͘-se kam-goān siū lêng-jio̍k mā m̄ soán it-poaⁿ lâng khòaⁿ chòe hó ê châi-pó.
Sèng-keng ê tiong-kan ū chin chē chit-khoán bí-hó ê si̍t-lē. Sèng-keng ê tiong-kan mā ū chi̍t-kóa–á chò chhut bô hó soán-te̍k ê lē.
Í-sek-lia̍t lâng chhut Ai-ki̍p, tī Iok-tàn hô tang-pêng Mô͘-ap pêng-goân chat-iâⁿ. Mô͘-ap ông Pa-le̍k phài sù-chiá khì iau-chhiáⁿ Pa-lân lâi chiù-chó͘ Í-sek-lia̍t lâng. Pa-lân chhōe-kiû Siōng-tè ê chí-ì. Siōng-tè bêng-pe̍k kā Pa-lân kóng, “Lí m̄-thang kap in khì, mā m̄-thang kā Í-sek-lia̍t jîn-bîn chiù-chó͘, in-ūi in sī góa só͘ chiok-hok–ê.” In-ūi án-ne, Pa-lân chiū bô chiap-siū iau-chhiáⁿ. Tē-jī-pái, Pa-le̍k ông phài khah chōe, khah tōa ê koaⁿ-goân, koh èng-ún kàu-gia̍h ê pò-siúⁿ lâi iau-chhiáⁿ. Pa-lân eng-kai chin chheng-chhó, Siōng-tè bô khó-lêng iông-ún Pa-lân chiù-chó͘ I só͘ chiok-hok ê Í-sek-lia̍t jîn-bîn. Tān-sī Pa-lân ê tham-liām hō͘ i soán-te̍k koh chi̍t-pài kiû-mn̄g Siōng-tè. In-ūi án-ne, Pa-lân chha chi̍t-tiám–á hō͘ Siōng Chú ê sù-chiá thâi–sí. (Bîn-sò͘-kì 22:1-33)
Sian-ti Iok-ná mā bat chò chhut m̄-tio̍h ê soán-te̍k. Siōng Chú tùi Iok-ná kóng, “Lí khì, khì Nî-nî-bî hit-ê tōa-siâⁿ, chhut-siaⁿ kéng-kài in.” Iok-ná bô beh chun-chiàu Siōng Chú ê chí-ì, soán-te̍k chē chûn tô-cháu. In-ūi chûn tú-tio̍h tōa hong-éng, Iok-ná hō͘ lâng lia̍h–khí-lâi hiat-lo̍h hái. Siōng Chú an-pâi chi̍t bé tōa-hî kā Iok-ná thun–lo̍h-khì. Iok-ná tī hî ê pak-tó͘ lāi kiû-kiò Siōng Chú. Siōng Chú chiū bēng-lēng hit-bé hî, kā Iok-ná thò͘ tī lio̍k-tōe. Siōng Chú ê ōe tē-jī piàn thoân hō͘ Iok-ná, kóng, “Lí khì Nî-nî-bî hit-ê tōa-siâⁿ, chiong góa kau-tài lí ê sìn-sit tùi in soan-pò͘.” Chit piàn Iok-ná m̄-káⁿ koh tô-cháu. I soán-te̍k chhìn-chhái èng-hù chi̍t–ê. Tio̍h saⁿ ji̍t chiah kiâⁿ ōe thàu ê Nî-nî-bî tōa-siâⁿ, Iok-ná thâu chi̍t ji̍t ji̍p-siâⁿ, soan-pò͘ kóng, “Koh sì-cha̍p ji̍t, Nî-nî-bî ōe húi-biat.” Jiân-āu chiū tán beh khòaⁿ Nî-nî-bî ê húi-bia̍t. In-ūi Nî-nî-bî lâng hóe-kái, Siōng Chú chiū kái-piàn sim-ì, bô chiong só͘ kóng ê chai-hō kàng-lo̍h. (Iok-ná-su 1~3 chiuⁿ)
Soán-te̍k sù-siông hoán-èng kè-ta̍t-koan. In lóng kā sìn-gióng pâi thâu-chêng. Só͘-í soán-te̍k ê sî bōe tiû-tî. Pa-lân tio̍h bô-kâng. I sui-jiân kèng-ùi Siōng Chú, tān-sī bô hoat-tō͘ tí-khòng châi-bu̍t ê ín-iú. Kè-ta̍t-koan bô kàu bêng-khak, chiah ē siūⁿ-khang-siūⁿ-phāng.
Beh chòe chhut chi̍t ê hó ê soán-te̍k bōe-sài kan-ta khòaⁿ gán-chêng ê lī-ek, siāng-bô mā tio̍h siūⁿ khah hn̄g, khó-lū tāi-kè kap hō͘-kó. Ngá-kok nā khó-lū–tio̍h su-iàu tô-miā jī-cha̍p-nî, i kám koh beh cheng-chhú chiok-hok?
Tāi-ke lóng chai, hun-iàn he̍k-chiá sī chhan-hōe, chē tōa-ūi ē-tàng tit-tio̍h siōng-hó ê thāi-gū. Pu̍t-tàn hiáng-siū siōng ko-kip ê ho̍k-bū, sīm-chì chhài-sek mā sī te̍k-pia̍t chún-pī–ê. Tān-sī Iâ-so͘ khǹg lán m̄-thang kéng tōa-ūi lâi chē. Lán nā hō͘ lâng tùi tōa-ūi chhiáⁿ–lo̍h-lâi, tō chin kiàn-siàu. Lán nā ū chē tōa-ūi ê chu-keh, chū-jiân ū lâng ē chhiáⁿ lán khì chē tōa-ūi. (Lō͘-ka Hok-im 14:7-11)
Lâng khòaⁿ chòe hó ê soán-te̍k bô it-tēng tòa-lâi hó ê kiat-kó. Iâ-so͘ kóng, chin-chōe lâng kéng mn̂g khoah, hó kiâⁿ ê lō͘. Hit-tiâu lō͘ khiok thàng kàu bia̍t-bông. Iâ-so͘ kiò lán tio̍h tùi hit-ê oe̍h ê mn̂g ji̍p–khì, in-ūi thàng kàu oa̍h-miā hit-ê mn̂g oe̍h, hit-tiâu lō͘ sòe, chhē–tio̍h ê lâng chin chió. (Má-thài Hok-im 7:13, 14) Iâ-so͘ koh kóng, “Lín tiong-kan bô-lūn sím-mi̍h lâng, nā bô pàng-sak ka-kī só͘ ū ê it-chhè, bōe-tàng chòe góa ê bûn-tô͘.” (Lō͘-ka Hok-im 14:33) Chit-tiâu chòe Iâ-so͘ bûn-tô͘ ê lō͘ khak-si̍t chin pháiⁿ kiâⁿ. Iâ-so͘ ka-kī chòe lán ê bô͘-iūⁿ, I kéng chi̍t tiâu siōng oe̍h, siōng pháiⁿ kiâⁿ si̍p-jī-kè ê lō͘.
Iok-su-a tòa-niá Í-sek-lia̍t lâng chìn-ji̍p Ka-lâm tōe liáu-āu, Siōng Chú hō͘ Í-sek-lia̍t lâng hióng-siū thài-pêng. Keng-kè chi̍t tōaⁿ chin tn̂g ê sî-kan, ti̍t-kàu Iok-su-a nî-lāu. Tī Iok-su-a lîm-chiong ê sî-chūn, i chū-chi̍p Í-sek-lia̍t chèng chi-cho̍k ê tiúⁿ-ló, cho̍k-tiúⁿ, sím-phòaⁿ-koaⁿ, í-ki̍p koaⁿ-tiúⁿ lâi. Iok-su-a tùi só͘-ū ê jîn-bîn kóng, “Nā-sī lín bô ài ho̍k-sāi Siōng Chú, kin-á-ji̍t lín tio̍h kéng lín ài-beh ho̍k-sāi–ê; khòaⁿ sī lín lia̍t-chó͘ tī Iù-hoat-la-tí hô hit-pêng só͘ ho̍k-sāi ê sîn-bêng, á-sī lín khiā-khí chit-ê tōe ê A-mô͘-lī lâng ê sîn-bêng. Lūn-kàu góa kap góa ê ke, goán koat-toàn beh ho̍k-sāi Siōng Chú.” (Iok-su-a-kì 24:15) Hôe-èng Iok-su-a thê-chhut ê thiau-chiàn, góa beh kóng, “Góa kap góa ê ke, goán koat-toàn beh ho̍k-sāi Siōng Chú.” Lí be̍h chóaⁿ-iūⁿ soán-te̍k?
