Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
文圖◎蕭景宗
《羅華改造統一書翰文》（以下簡稱本冊）是先父讀台南一中ê時期，偶然佇台南ê二手冊店買tio̍h–ê，近日整理舊厝ê時陣佇伊ê冊櫥仔ê藏書中間發現，冊櫥仔內嘛有《甘字典》、日文片假名標註ê台語生活對話教材本等等台語文相關書籍。ùi藏書ê中間thang知先父ùi青年時期就對探索自學讀寫台語文顯出興趣。
本冊ê著者劉青雲佇自序中間寫伊出冊ê動機背景、印刷校正kap出版致謝：
「Ōe記得16年前，我對台南長老教中學，轉校去京都同志社普通部ê時陣，無tàng去揣有一个會曉教故土ê字音解說ê先生，也無通去得著買入獨習自在ê參考書。所以m̄-nā讀冊上，又koh每擺欲舉筆寫批，大大感覺tio̍h困難。Kai-tsài倚靠羅馬字來得著kap朋友親戚通信，免失落人情。對an-ni不只感覺tio̍h有案出形成獨習練達漢文ê音說，kap速成習得書翰文ê必要，che就是我著作chit本冊ê動機啦！
到tī 4年前，我ùi慶應義塾大學畢業，得著有機會，專心研究，著手著作，chit-má得著做成，無想頇顢，印刷出版，也thang講達我早年ê理想啦！若是chit本冊驚了有無周至，毋敢家己滿足，獨獨向望若ōe得做利益世人應用ê材料，就真歡喜啦！
另外ài beh講ê，chit本冊tī形成上kap印刷校正上受tio̍h我ê窗友陳君大鑼，苦心協力，深深表感謝ê意思啦！
特故意ài koh寫ê，是得著商務印圖書館主任、諸位先生kap排字部諸君，格外ê親切，不只感謝啦！
西紀1924年12月
著者寫 」（註1）
本冊見證台灣一百冬前日治時期ê社交、就學、商業、體育、信仰等社會文化kap日常生活情景，對當時簡易華語文言文kap台語白話字ê讀寫交通kap融合推廣做出相當貢獻。這本冊ē-tàng發行siau-siû（銷售），也顯示日本政府對台灣人學習讀寫華語文言文kap台語白話字並無打壓禁止。頭一篇序文是著者讀ê日本前慶應義塾大學總長（校長）鎌田榮吉作序，寫佇「大正十三年九月」；第二篇序文是福建地區遠近馳名ê醫家，福建同安修志局總纂（總編）吳錫璜作序，寫佇「中華民國十三年十一月」；這本冊是上海寶山路商務印書館印刷，chiah koh hō͘新樓書房佇「西紀一九二五年二月十五日發行」（版權頁）。本冊中間出現大正、民國和西紀（元）三種紀年方式，顯示日治時期太平洋戰爭iáu-bē爆發ê時陣，日本政府對文化界使用多元紀年有寬容，著者是日本國民，將著作交hō͘中華民國ê上海商務印書館印刷，chiah進口到日本國台南ê新樓書房發行，間接反應日中關係iáu-bē惡化，日中兩國民間交流密切ê現象。
本冊ùi序文到各種社交場景主要用華語文言文書寫見本文章，用白話字注音、註解。白話字註解用台語口語，讀起來真簡明。舉例一篇個人感覺真有意思ê範文，第27頁第三部招聘類〈招聘野球團渡臺〉，台語白話字如下：
「慶應大學部野球團諸位好ê鑑察，恭敬所beh講ê，近來節氣到春天，氣候卡燒烙，運動第一合宜。所以阮台灣體育會，拍算定著 tī明年ê春天ài beh開野球試合大會。前明治、法政chiah ê大學bat過來台灣kap阮chia各野球團試合。猶bat看恁貴團來遠征。早早聽tio̍h恁貴團是通各ê第一出名。的確有好ê模樣thang叫醒阮本島ê球界。也thang大刺激各學校ê學生。論到chit ê大會是體育發達ê起見。敢望恁大家出馬加添勢力。互阮chit ê會得一時ê鬧熱，是所迫切向望ê啦！獨獨望恁回覆消息指示阮知，專專用chit ê排列通知，順續請問恁讀冊ê平安。」（註2）
這篇文章反映1920年代台灣野球（棒球）運動ê興盛。當時台灣體育會（1920年成立）時常邀請日本內地ê名門大學球隊來台灣交流，文章內面顯出當時台灣人對日本野球強權學校ê仰望，可見台灣人kah-ì野球是1920年代就已經佇全台運動會釘根，漸漸傳承到今仔日出現全民痟野球ê現象。
本冊kap一般教導怎樣寫批ê見本無仝，它有強烈ê台灣基督長老教會（PCT）詞彙用語kap台華跨語言文化交流ê色彩，用台語白話字來註解華語文言文短文書信，通講是上等ê台灣本土語言特色ê社會文化教材。今將《羅華改造統一書翰文》捐贈hō͘ PCT歷史檔案館，作保存100冬前台灣語文hām社會文化ê歷史扉頁。
註1.2.：原文是華語文言文，本文作者譯作台語漢字。
