Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Iâu Chì-liông
母親偉大 眾人知
阿爸較無喙水 無人愛
母親節
序細 齊轉來
請食 腥臊龍蝦
父親節
厝內 恬恬
走甲 無半个
天公伯啊
按呢 敢有公平
母親ê 疼痛
咱才 轉大人
阿爸ê 關心
咱 才會起身
無人疼惜ê 囡仔
孤單暗chīⁿ 目屎輾
阿母啊 阿爸
無論 啥節日
阮攏 足感謝恁
毋免 龍蝦好物
毋免 糖甘蜜甜
阮若牽著恁ê 手心
若看著恁ê 目神
阮就 知影
恁對阮 深沉ê疼
永遠囥佇 心裡
【Pe̍h-ōe-jī】
Bó-chhin úi-tāi chèng lâng chai
A-pa khah bô chhùi-súi bô lâng ài
Bó-chhin-cheh
Sī-sè chiâu tńg-lâi
Chhiáⁿ chia̍h chheⁿ-chhau liông-hê
Hū-chhin-cheh
Chhù-lāi tiām-tiām
Cháu kah bô poàⁿ ê
Thiⁿ-kong-peh ah
Án-ne kám-ū kong-pêⁿ
Bó-chhin ê thiàⁿ-thàng
Lán chiah tńg-tōa-lâng
A-pa ê koan-sim
Lán chiah ē khí-sin
Bô lâng thiàⁿ-sioh ê gín-á
Ko͘-toaⁿ àm-chīⁿ ba̍k-sái lìn
A-bú ah A-pa
Bô-lūn siáⁿ cheh-ji̍t
Góan lóng chiok kám-siā lín
M̄-bián liông-hê hó-mi̍h
M̄-bián thn̂g-kam bi̍t-tiⁿ
Goán nā khan–tio̍h lín ê chhiú-sim
Nā khòaⁿ–tio̍h lín ê ba̍k-sîn
Goán tō chai-iáⁿ
Lín tùi goán chhim-tîm ê thiàⁿ
Éng-oán khǹg tī sim–ni̍ĥ
