Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Tiuⁿ Khái-têng
A-pa ū chi̍t-ê sé-khò͘ (SEIKO) ê sî-kó͘-á, i ê sek-chúi chhin-chhiūⁿ kàu-hun ê kin-chio kâng-khoán kim-n̂g, khòaⁿ–khí-lâi chin ū goân-khì. A-pa kià sî-kó͘-á tī-leh pòaⁿ-mê saⁿ-tiám, chiah ē-hù saⁿ-tiám-pòaⁿ Oân-lîm kó-chhài-chhī-á khui-chhī. M̄-chai-iáⁿ a-pa sī-m̄-sī kiaⁿ ka-tī khùn-kòe-thâu, bē-hù-chhī, choan-kang kéng chi̍t-ê siōng tōa-siaⁿ ê sî-kó͘-á. Liang. Liang. Liang. LIANG. LIANG. LIANG…… Tiām-chēng ê àm-mî hō͘ sî-kó͘-á ê siaⁿ thiaⁿ–khí-lâi koh-khah hiáng ah. Chhù–nih ê a-tī hâm góa tng hó-khùn mā lóng-ú thiaⁿ–tio̍h. Sî-kó͘-á chin ū cheng-sîn, jīn-chin kā a-pa, a-bú kiò chhíⁿ. Saⁿ-tiám khí-chhn̂g ê a-pa, a-bú, chi̍t-tiám-á to bô goân-khì.
Thiⁿ iáu-bē kng chiū-ài chhut-mn̂g, m̄-koán sī hân-liû á-sī lo̍h-hō͘-thiⁿ, lóng-sī phah-piàⁿ chi̍t-kang ê khai-sí. Tī chhài-chhī-á tōa-hàn ê a-pa sim-lāi mā-ū chi̍t-ê sî-kó͘-á, kā kóe-chí tōa-chhut ê kùi-cheh lóng kì-tiâu-tiâu. Kôaⁿ-thiⁿ ê liú-teng, joa̍h-thiⁿ ê soāiⁿ-á. Kó-chhài-chhī-á kui-nî-thàng-thiⁿ lóng-ú siōng tio̍h-sî ê chu-bī. A-pa sim-lāi koh-ū chi̍t-tiuⁿ tē-tô͘, chai-iáⁿ hó-chia̍h ê kóe-chí tó-ūi chhōe. Hong-khu ê phû-tô, Pang-soaⁿ ê ài-bûn. Bô bāng-lō͘ iā bô Google Map ê sî-tāi, a-pa ê tho͘-lá-khuh thang khì kàu ūi ê só͘-chāi tō ē-tàng kā kóe-chí chài tńg-lâi.
Poaⁿ lī-khui Oân-lîm ê sî-chūn, pôe-phōaⁿ a-pa chhiau-kòe saⁿ-cha̍p-tang ê saⁿ-tòng-pòaⁿ-á mā thè-hiu ah, lâu tī leh Oân-lîm ê siu-chhia-tiûⁿ. A-pa ê sî-kó͘-á chò-hóe lâi-kàu bô se̍k-sāi ê só͘-chāi, pôe-phōaⁿ a-pa chi̍t-kang kòe chi̍t-kang. Sui-jiân í-kēng m̄-bián kià sî-kó͘-á ah, a-pa mā-sī tiāⁿ-tiāⁿ hō͘ ka-tī kiò cheng-sîn. Tī àm-sô-sô ê kheh-thiaⁿ, chē tiàm phòng-í, sî-kó͘-á hâm a-pa chò-phōaⁿ, tán-thāi thiⁿ-kng.
