Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
客語散文
◎劉菊英
幸福个婚姻做得長長久久个祕訣就係「愛」。「愛」這隻字有，包容、體諒、同理心等等意涵，做得分兩公婆相互忍讓、共下學習、共下成長。婚姻係上帝所設立个聖潔盟約，係家庭个基石。聖經有記載，人還吂出娘肚之前，上帝早早就已經安排另外一半好勢好勢。故所，上帝摎𫣆enˊ安排个另外一半，𠊎俚做毋得儘採來離開，愛用盡心力來護等上帝所賞賜个緣份。
婚姻，係來自兩個無共樣个家庭、無共樣个文化背景个人所組成个，就算共樣係講客話个兩個家庭，有共樣个客家傳統，毋過習慣上還係多多少少有一息差別。𠊎就係活生个例仔。𠊎從嫁入老公屋下，一直摎家官、家娘共下歇，好得老人家盡惜心臼，做得講係客家人个傳統，乜係最溫暖个生活方式。
𠊎一旦就盡感謝吾家娘，佢教𠊎學會改菜壢、種菜、縈草結…這兜田頭地尾个事頭。𠊎兩子家娘當多話好講，逐擺共下縈草結，抑係在菜園改菜壢、挷草，無斯灶下擇菜，不時都聽得著𠊎兜个笑聲，看起來感情當合線。毋過，就算有相同文化背景个人，共下生活難免乜會堵著無共樣看法摎做法个時節，逐儕人都有自家个看法摎堅持。
有一擺，𠊎用莧菜煮麵線湯，因為逐日食冬瓜湯食到畏胲畏胲，想講該無來用莧菜煮麵線湯換樣，定著會當受歡迎。吂知，吾家娘看啊著莧菜煮麵線，聲音冷泧泧仔講：「新腔个採茶，鬥柄个灼嫲，第一擺看著人莧菜拿來煮麵線湯喔！」家娘雖然無壞意，毋過厥面一下就冷膣冷滑無半滴笑容，害𠊎嗄毋知愛仰結煞正好，笑容乜跈等收起來，歸个就無伸紋了。
老公下班轉來，一入屋就緊講「還香哦！還香哦！仰恁香啊！」看𠊎無聲無說，感覺著怪怪，佢遽遽行到吾身邊，講笑話分𠊎聽。毋過無論佢講个笑話有幾好笑，𠊎還係笑毋出來，面項怕比冰角還較冷。
佢無再過講話，轉身去間肚拿一隻鏡仔，放在吾面前，當當𠊎看著鏡仔肚自家个恁媸个樣相，忍毋核嗄「噗」一聲笑出來，哈！這一笑就將所有个委屈掃淨淨了！好得知吾性體个老公出手相救，免得一場尷尷尬尬毋得煞棚。老古人講：「近水知魚性，近山識鳥音」一滴都無差。
這隻鏡仔，毋單分𠊎看著自家發閼个媸樣，也照出吾老公高雅个涵養。聖經加拉太書第6章第2節有記載：「你兜各人个重擔愛互相擔當，恁樣，就完全了基督个律法。」故所，兩公婆在婚姻肚愛互相擔當，正做得長久長久。
