Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎做工á人台語工作室
【漢羅】
今á日咱beh紹介ê詞是「頓胸坎」。這ê頓ê意思其實有幾lo̍h種，頭起先，咱來看故事內底所講–ê，「1手頓胸坎」，tī chia，頓to̍h是用手出力搥ê意思，咱koh講chi̍t-ê例，「氣kah頓桌á」，to̍h是出力搥、phah桌á，總講to̍h是對chi̍t-ê平面ê物件出力去接觸，像講「頓腳」，to̍h是受氣ê時，腳去出力chàm土腳。最後講chi̍t-ê例，「He物件hiah重，m̄-thang用頓–ê，輕輕á hē，無桌á ē hō͘你頓歹–去。」Nā用頓這ê動作，一般ē phŏng–chi̍t-ē大大聲按呢，nā用khǹg–ê to̍h khah無聲。
Koh chi̍t種是雄雄坐–落-去，像講「伊雄雄頭眩目暗，khiā bē在，人chŏaⁿ頓tī土腳peh bē khaih。」Mā有其他ê用法，像講「Nā有kiáu thang poa̍h，伊頓–leh to̍h m̄走–ah。」Chia ê意思是講，真痴迷，坐–leh to̍h m̄離開按呢。
頓koh有印ê意思，像「頓印á」、「頓手模」、「頓票」這款–ê。主要to̍h是有chi̍t-ê模á，ka ùn色，印去咱beh印ê所在按呢。
【Pe̍h-ōe-jī pán】
Kin-á-ji̍t lán beh siāu-kài ê sû sī “tǹg-heng-khám”. Chit ê tǹg ê ì-sù kî-si̍t ū kúi-lo̍h chióng, thâu-khí-seng, lán lâi khòaⁿ kò͘-sū lāi-té só͘ kóng–ê, “chi̍t chhiú tǹg-heng-khám”, tī chia, tǹg to̍h sī iōng chhiú chhut-la̍t tûi ê ì-sù, lán koh kóng chi̍t-ê lē, “Khì kah tǹg toh-á”, to̍h sī chhut-la̍t tûi, phah toh-á, chóng-kóng to̍h sī tùi chi̍t-ê pêng-bīn ê mi̍h-kiāⁿ chhut-la̍t khì chiap-chhiok, chhiūⁿ kóng “tǹg kha”, to̍h sī siū-khì ê sî, kha khì chhut-la̍t chàm thô͘-kha. Chòe-āu kóng chi̍t-ê lē, “He mi̍h-kiāⁿ hiah tāng, m̄-thang iōng tǹg–ê, khin-khin-á hē, bô toh-á ē hō͘ lí tǹg pháiⁿ–khì.” Nā iōng tǹg chit ê tōng-chok, it-poaⁿ ê phŏng–chi̍t-ē tōa-tōa siaⁿ án-ne, nā iōng khǹg–ê to̍h khah bô siaⁿ.
Koh chi̍t chióng sī hiông-hiông chē–lo̍h-khì, chhiūⁿ kóng “I hiông-hiông thâu-hîn-ba̍k-àm, khiā bē chāi, lâng chŏaⁿ tǹg tī thô͘-kha peh bē khaih.” Mā ū kî-thaⁿ ê iōng-hoat, chhiūⁿ-kóng “Nā ū kiáu thang poa̍h, i tǹg–leh to̍h m̄ cháu–ah.” Chia ê ì-sù sī kóng, chin chhi-bê, chē–leh to̍h m̄ lī-khui án-ne.
Tǹg koh ū ìn ê ì-sù, chhiūⁿ “tǹg ìn-á”, “tǹg chhiú-bô͘”, “tǹg phiò” chit khoán–ê. Chú-iàu to̍h sī ū chi̍t-ê bô͘-á, ka ùn sek, ìn khì lán beh ìn ê só͘-chāi án-ne.
