【舉目向山】真正的勇者

台南西拉雅族人高舉標語表達想恢復原住民身分的訴求。(攝影/林宜瑩)

詩篇68篇19節;使徒行傳4章1~21節

◎舒度‧大達(總會原宣教育幹事)

1627年,荷蘭宣教師甘治士(Georgius Candidius)跟隨荷蘭東印度公司來到台灣,開始向南部的西拉雅族人傳福音,西拉雅族嘛成作台灣第一批得著福音的人。今年(2017年),抵好是福音傳來台灣390週年,咱除了感謝天頂的阿爸父上帝,互咱有機會為著這獻上感恩,嘛感謝耶穌基督的疼以及聖神的幫贊,佇390年前透過荷蘭的宣教師,將福音的種子撒佇台灣這塊土地,特別是撒佇西拉雅族人的心內。
自16世紀,台灣就被稱作Formosa,意思是「真媠的島嶼」,一直到今仔日,真多佇海外的台灣人教會,嘛號名叫作Formosan church。互咱更加歡喜的,是福音佇台灣這塊土地釘根、發芽、成長,不但為西拉雅族帶來祝福,嘛互台灣各族群,無論是平地人、客人或是原住民攏得著恩典,實在值得咱獻上感恩,謳咾上帝。

受掠作奴隸的歷史

今仔日咱所讀的詩篇68篇,互咱進一步了解以色列的三段歷史:第一段歷史是摩西的時代,上帝的百姓受著埃及法老的迫害,成作奴隸,摩西帶領百姓出埃及,佇曠野流浪40年。這是以色列人作奴隸,流浪無根的歷史。第二段歷史是士師時代,這段歷史閣卡悽慘無望,以色列無論佇文化、教育、政治,甚至是宗教,攏無一個好的領袖引導帶領,所以常常受異邦的統治,及異教徒的欺負。這段歷史,會當講是以色列成作遊民、孤兒和受放拺的歷史。第三段歷史是大衛王的時代,彼時以色列不時受到耶布斯和非利士人的侵略和欺負,甚至象徵上帝同在的約櫃,嘛互對敵非利士人搶走,常常互對敵恥笑。對上帝百姓來看,這三段是真重要的歷史,所以怹常常佇敬拜中,透過詩歌、祈禱和讀經來記念。

佇初代教會的時代,猶太人的社會情境嘛仝款受到外邦的羅馬統治和殖民。猶太人佇政治上無主權、經濟上成作弱勢、社會上受邊緣化,甚至佇文化和教育上,嘛互希臘和羅馬的文化影響及同化。對使徒行傳來看,佇宗教頂面,跟隨耶穌的門徒嘛受到猶太教徒大大的逼害。彼得和約翰為著傳耶穌復活的福音受掠,佇公會中審判,受到恐嚇,閣入獄受關(使徒行傳4章1~3節)。

可見上帝百姓的歷史,是充滿苦難的歷史,無論佇政治、經濟、社會、文化、教育、宗教等等,攏遭遇多多的困境和苦難,會當講是受掠作奴僕的歷史,受外來政權統治的歷史。

事實上,宗教無自由抑是宗教迫害,一直到21世紀的今仔日猶原存在,而且不時佇世界的真多所在發生。咱西拉雅族的歷史嘛仝款是安呢。

佇受壓迫歷史中的使命

咱來看台灣,豈有比以色列較好?咱原住民所面對的歷史,和以色列百姓是不是相款?台灣受外來政權統治400年,除了平地人,咱原住民嘛是被殖民的對象,佇經濟上成作邊緣化的族群,佇政治上嘛無法度發聲,欠缺管道參與,佇主流社會福利的意識形態下面,會當講是弱勢。

簡單來說,原住民的歷史,是一個被殖民喪失主權的歷史;原住民的歷史,是一個被邊緣喪失主人身分的歷史;原住民的歷史,是一個被宰制成作附庸的歷史;原住民的歷史,是一個被弱化成作奴隸的歷史。
此款情境,對咱西拉雅等平埔族群來講,閣卡嚴重。統治者刁工無愛熟識咱,咱欲追求正名,統治者嘛無誠意欲接納咱。所以咱無論是佇政治、經濟、社會、教育、文化、宗教等,受到真多的無公平,以及有形無形的迫害。面對這種情形,咱欲按怎樣成作真正的勇者,成為咱族群的福氣?這就是咱的時代使命。

決心成作真正的勇者

上帝的百姓以色列雖然佇埃及成為奴隸,但是上帝知影怹的苦難,所以呼召摩西帶領以色列百姓出埃及、過紅海,以及引導上帝的百姓佇西奈山和上帝立約,領受十條誡命。佇士師的時代,雖然上帝的百姓親像遊民和孤兒,上帝嘛呼召士師底波拉和巴拉將軍,帶領怹從迦南的人手中解放,重新得到自由的生活。佇大衛王的時代,上帝仝款差遣大衛戰勝耶布斯和非利士人,從怹的手中將約櫃討回來,帶去錫安山,宣告上帝是以色列人的主,以色列是上帝正港的百姓。佇羅馬政權統治下,耶穌的門徒雖然受著多多迫害,尤其是宗教頂面的迫害,上帝親自和耶穌的學生同在,引導怹佇受害的中間,一切平安順事。門徒受掠得著解放,福音受壓制得著報揚。

相款,咱西拉雅族為著信仰,為著族群的永續發展,咱的確要對今仔日聖經的教示,得著智慧和能力,成作真正的勇者。成作真正的勇者,就是雖然明白頭前有危險的嚴重性,猶原無驚惶,繼續勇敢向前。勇氣呣是為著自己的利益,是願意為真理、公義和愛,來獻出自己的生命。佇無望的時刻,無灰心喪志,勇敢面對,創造盼望;不屈服強權,不欺善怕惡。

咱要勇敢成作別人的福氣,站佇上帝的公義和弱勢者的立場,奉獻自己成作活祭。佇耶穌基督復活的信仰,發揮所有氣力,復振族群的文化、語言和民族性,貢獻國內和普世的族類。

感謝長期以來為西拉雅正名、復振文化的個人和教會,願上帝記念大家所做美好的事。

 

【舉目向山祈禱會】

序樂:

宣召:

吟詩:新《聖詩》320首〈O-hoa-he,拍鼓跳舞,彈琴謳咾〉

讀經:詩篇68篇19節;使徒行傳4章1~21節

信息:真正的勇者

吟詩:新《聖詩》519首〈為此塊土地阮誠心祈禱〉

為此塊土地阮誠心祈禱,願主的真理若光全地遍照
為此個城市阮謙卑懇求,願主賜活命互阮骨肉得救
(複歌)願全能天父上帝,祢聖國降臨;
願喪鄉及悲傷,攏離開阮心中。
願全能天父上帝,祢旨意得成;
願向望及喜樂,永遠惦阮心中。

祈禱:逐項祈禱完,吟唱〈為此塊土地阮誠心祈禱〉複歌一遍

1.為台灣原住民西拉雅族正名祈禱

慈悲痛疼的主,阮感謝祢,祢是創造萬物宇宙的上帝,嘛是生命的主。祢互世界充滿人類,和祢做伙管理祢所創造的一切,阮滿心感謝祢。台灣嘛是祢建立的國家,祢互這塊土地充滿多多族群,來享受祢極大的恩典。總是,因為政治,有多多族群失去怹的身分,無受著政府的承認,互祢所賞賜阮的名、文化和語言失落去,懇求祢出手幫助。祢知影西拉雅族是第一個得著福音的台灣族人,求祢賜福阮佇正名的運動中,有祢的同在,有祢氣力的幫助,互阮袂灰心喪志,恢復阮的名,將榮光歸互祢。奉主耶穌的名,阿們。

2.為西拉雅等平埔原住民族的語言和文化復振祈禱

天頂的主上帝,台灣原住民族,特別是平埔族,久長以來受外來政權統治,失去自己的語言和文化,造成族人對自己的身分沒自信。懇求主互阮有智慧和氣力,來復振阮的文化、語言、藝術和音樂。阮相信,祢是全能的上帝,阮欲倚靠祢來尋回阮的族群文化、語言、藝術和音樂。透過正名運動對內幫助族人提升自信和團結,對外成作台灣原住民和台灣社會的福氣。阮按呢祈禱,奉主耶穌基督的聖名,阿們。

3.為西拉雅的教會祈禱

西拉雅教會的主,阮滿心感謝祢,佇390年以前,祢早著呼召宣教師向阮的祖先傳福音,互祢的主權佇阮的生命內底。今仔日台灣基督長老教會內,有多多平埔族,特別是西拉雅族的信徒,感謝主,當政治放拺阮的時,祢一直和阮佇啲,永遠不棄拺阮。此時,阮欲懇求祢,互平埔族的教會成作台灣基督長老教會的福氣,嘛成作所屬中會的福氣,互阮的教會,無論佇總會或是中會,攏同心合一學基督,謙卑順服做忠僕。阮嘛懇求主,互阮的教會成作西拉雅族盼望的記號。阮按呢祈禱,奉主耶穌的聖名來求,阿們。

4.為台灣各族群祈禱

全世界人類的主,阮感謝祢,祢互台灣成為多元文化的所在,無論是外省人、福佬和客家,甚至因為婚姻和工作來台灣的新住民,攏因為祢的慈愛,阮成為此塊土地居起的人。阮需要祢的公義、祢的憐憫,以及祢的疼,互佇此塊土地所有的人,會凍彼此尊重相愛,並認同這塊祢所賞賜互阮的土地,嘛無因為族群、文化、語言、皮膚的不同,產生對立和傷害,反倒彼此接納和包容,欣賞和鼓勵。互祢的旨意行佇阮的中間,親像行佇天上。阮按呢祈禱,奉主耶穌基督的聖名求,阿們。

祝禱:

彼此請安:

廣告/手到心至抄寫本-箴言

我有話要說