Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳金順
北投溫泉鄉
講溫泉，論溫泉。台灣地，溫泉鄉，逐四界。草山溫泉、關仔嶺溫泉、礁溪溫泉、知本溫泉，攏有跤踏ê痕跡，浸身軀ê氣味。硫磺味，佇北投溫泉鄉行踏，定著對鼻空鑽入咱ê肺。
第一出名地獄谷。頭擺離溫泉池遮爾近，池水沖沖滾，白煙蓬蓬坱，會得用「雺煙散霧」（bông-ian sòaⁿ-bū）形容。翕三張相，齊有動態ê美感。園區門喙大石寫「地熱谷」，往過溫泉池四箍輾轉無圍閘，設使無細膩跋落內底，敢猶有命通唱〈溫泉鄉ê gì-tah〉？
大粒石頭較過一塊仔，設一池台灣島形ê「淨手礦泉湯」，咱手勻聊仔浸咧，拉圇仔袂燒kah衝煙。地獄谷屬青磺泉，是天然湧泉。水色半透明薄青仔薄青，硫磺味嶄然仔重。
拜四下晝，人來客去，出入內外，百外外人，規个園區敢若市場。不而過，雖罔ka-ia̍h，煞有一款講通和ê恬靜。啥物號人都有，袂輸聯合國咧。
硫磺谷，佇地獄谷東北爿2公里外。郊外罔郊外，少人行踏加誠自然款。目睭相一下，伊ê溫泉池的確有地獄谷ê五倍大。
這爿看過去，彼爿看過來，土地拋荒，岩石赤身。伊ê緣故是以早掘硫磺佮地熱作用所致。烏陰天有烏陰天ê媠。我ê相，掠出煙霧雲影層次。
硫磺谷屬白磺泉，是人工溫泉。水色白透黃，淡薄仔硫磺味。下早時仔，空氣清新。三五个仔旅客，跤踏實地，輕鬆快意。欲行入硫磺谷頭到，有一窟免費ê浸跤池，這款天時，雙跤燒烙偌好你敢知？
對地獄谷行出來700公尺，光明路邊上懸彼棟溫泉飯店，號做日勝生加賀屋。這款地帶，富戶人誠捷來，散良人袂自在。伊ê邊仔，彼塊無成公園較成遺址ê零星地，往過是「天狗庵」ê所在地。
1896年，平田源吾（1845～1919年）佇遮設台灣頭一間民營溫泉旅社。Chit-má，古石階猶佇咧，thèng好見證時代ê遷變。平田源吾毋但設溫泉旅社，1905年募款起普濟寺，服侍湯守觀音，保庇在地溫泉業發展。1909年伊接紲發行《北投溫泉誌》，成做重要ê北投溫泉歷史研究文獻。
井村大吉（1874～1927年），嘛是對北投溫泉有貢獻ê人物。1910年，伊擔當台北廳長，為著迎接皇太子裕仁，kā瀧湯浴場改建做北投溫泉公共浴場。1913年，北投溫泉公共浴場起好，設佇同齊完工ê北投公園內底。
Chit-má，彼棟古早款ê紅磚仔建築，外口濟濟人咧排列ê所在，號做北投溫泉博物館，往過就是北投溫泉公共浴場。
博物館免門票，入場鞋仔褪起來捾佇手裡，照排列行來柴櫃換穿淺拖。內底規大片tha-thá-mih，在你坐咧頂面歇睏。嘛有一窟長條形水池，設欄杆遮閘，干焦觀看袂當落去浸跤。展覽物件真濟，咱人無偌清彩，咻一下行出場。
北投溫泉鄉，毋是專有名詞。終戰到kah 1968年，號做北投鎮，台北縣界管。現此時，北投區土地56平方公里，24萬外人。捷運淡水信義線佇北投設八个站：關渡站、忠義站、復興崗站、北投站、奇岩站、唭哩岸站、石牌站、明德站。這搭，古早是Basay族北投社徛居地。
西螺文化鎮
阿善師，電視劇《西螺七劍》。彼陣我6歲，敢若捌佇厝頭家娘in兜影過。這齣戲改編西螺七嵌ê典故。阿善師本名劉明善（1780～1867年），伊ê墓hông遷徙幾若擺，落尾鎮公所佇墓前起振興宮，廟裡服侍伊ê神像。
西螺大橋，攏嘛佇電視裡眼著，干焦知影是遠東第一大橋。這陣，才知1952年起好，長1939公尺，斯當時是全世界第二大橋，干焦輸予舊金山ê金門大橋。西螺大橋連接兩鄉兩縣，北爿彰化縣溪州鄉，南爿雲林縣西螺鎮。伊ê外觀大紅，親像鎮殿武士，遠遠就thèng好看見形影。
拜六中晝，薄日，酸風鑽筋骨。對老街行來西螺大橋，親目見證伊ê體態。大橋跤，園地曠闊，號做蝴蝶公園。規大片草埔，各式裝置藝術唌目。散步，走標，吹風，讀冊，攏是好地頭。
禮拜透早，天貓霧光。「西螺媽祖太平媽祈福馬拉松」對福興宮前起跑，無一時仔，走起去西螺大橋。參加遐濟擺走標賽，走過遐濟大橋小橋，敢是心理因素，抑是大橋直lòng-sòng ê緣故，感覺特別好走。
到kah半中站，對雲林縣界迒過彰化縣界，落西螺大橋無偌遠，閣peh起去溪州大橋。雖罔新橋phēng舊橋較長1 khí-loh，不而過，伊ê橋身殕殕，無啥特色。佇眾人眼內，猶是西螺大橋較gió-toh。彼早起對斗六盤台西客運，10點跤兜就到西螺轉運站。延平老街近近仔。西螺老街藝術節，彩排ê彩排，攢貨ê攢貨，一冬一擺氣力盡展。老街老厝滿滿是。擔頭，一身聖誕老阿伯，對一樓門額欲peh過女兒牆，樣相古錐趣味。相片貼面冊，逐家隨揤讚，閣分享別位嘛有這款形ê證據。東市場，佇對面。往過，遮是雲林縣南北貨買賣ê重要地。所在雖罔無闊，牆面留咧成做歷史文化見證。市場內外店家，現此時咧做文創商品佮農特產ê生理。
金玉成商會是老街罕有ê三樓厝。三棟一體，眾人攏喊做金玉成鐘樓。斯當時，咧做鐘錶佮金仔買賣，kā時鐘囥佇厝尾頂，毋但唌目閣兼廣告。Chit-má是西螺老街ê代表，鐘錶收擔，厝主換人，改名鐘樓咖啡。這日，鐘樓咖啡敢若無咧營業，抑是我戇目看袂出人咧賣咖啡。過晝，來對面德記咖啡館，佇亭仔跤啉一甌台灣咖啡。燒咖啡下佇桌頂，連鞭變拉圇仔燒，快速降溫ê記持深刻腦池。
路中央，大人囡仔提粉筆畫黃擦白，隨意kā佮意ê圖暫時留踮塗跤兜。自倚晝11點到欲暗5點，規條老街鬧熱chhih-chhah。音樂聲、噗仔聲，頂真演出、注神觀賞，毋免gâu人，自在展現。
泰山石敢當，1827年起造，懸五尺六寸，是全台灣上蓋大塊ê石敢當。自底chhāi佇濁水溪駁岸邊，落尾徙來老街頭前成百公尺，囥佇六角涼亭裡，四箍輾轉鬥鐵欄杆kā保護牢咧。「泰」、「石」、「敢」這三个刻字有奇巧，小弟莫講分明，有緣家己來探訪看覓。
廖重光（1875～1949年）雕像，離石敢當大概50公尺。這个雕像毋是四正坐佇遐，伊戴紳士帽、手牽三輪車，邊仔褪赤跤ê囡仔參伊相對目，後壁戴葵笠ê農婦手提稻仔，銅雕藝術ê手路活跳。廖重光捌擔當西螺公學校教員、西螺街長。對戰前到戰後，西螺大橋起造有伊奉獻ê影跡。
44000外人，敢猶號做小鎮？恁若問我：敢捌來過西螺鎮？兩擺齊是來這搭做臨時演員。老街、福興宮是彼時ê地場。
