Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎久保光彥
“Góa si̍t-si̍t-chāi-chāi kā lí kóng, lí siàu-liân ê sî ka-kī hâ io-tòa khì ài khì ê só͘-chāi; m̄-kú nî-lāu ê sî, lí ōe chhun siang-chhiú hō͘ lâng pa̍k, kā lí thoa kàu lí bô ài khì ê só͘-chāi.” Iâ-so͘ kóng chiah-ê ōe sī chí Pí-tek ōe án-chóaⁿ sí lâi êng-iāu Siōng-tè. Kóng soah, Iâ-so͘ kā i kóng, “Lâi tè góa!” Pí-tek oa̍t-tńg-sin, khòaⁿ-tio̍h Iâ-so͘ só͘ thiàⁿ hit-ê bûn-tô͘ tè tī āu-bīn. I bat tī boán-chhan ê sî the-óa Iâ-so͘ ê heng-chêng, mn̄g kóng, “Chú ah, sī sím-mi̍h-lâng beh chhut-bōe lí?” Pí-tek chi̍t-ē khòaⁿ-tio̍h i chiū mn̄g Iâ-so͘, “Chú ah, chit-ê lâng ōe án-chóaⁿ?” Iâ-so͘ ìn i kóng, “Góa nā ài i oa̍h kàu góa lâi, kap lí ū sím-mi̍h koan-hē. Lí lâi tè góa!” (Iok-hān Hok-im 21:18-22)
Bô-lūn Ki-tok-tô͘ ā-sī it-poaⁿ ê lâng, lán lóng siông-siông kap pa̍t-lâng pí-phēng ka-tī ê jîn-seng á-sī sìn-gióng seng-oa̍h.
Ū-sî-á góa ka-tī ê jîn-seng khòaⁿ–khí-lâi pí pa̍t-lâng ê khah hó. Ū-tang-sî-á pa̍t-lâng ê jîn-seng pí góa ê khah hó-khòaⁿ.
Ki-tok-tô͘ ê tiong-kan mā ū chit khoán ê chêng-hêng. In-ūi lán lóng kiōng-tông seng-oa̍h tī pêng-iú, ka-cho̍k, kàu-hōe, siā-hōe ê tiong-kan, bô-hoat-tō͘ lī-khui chit khoán ê būn-tê.
Tān-sī, lí nā ū chit khoán pí-kàu ê būn-tê, ū-tang-sî-á hit-ê būn-tê khó-lêng piàn-chòe khah giâm-tiōng ê cheng-sîn-siōng ê ap-le̍k. Só͘-í lán tio̍h-ài chù-ì.
Lán lóng chai-iáⁿ Pí-tek sī Iâ-so͘ ê bûn-tô͘ tiong-kan siōng te̍k-pia̍t ê chi̍t ê. Chiong-lâi Pí-tek ē chiâⁿ-chòe chi̍t-ê ín-chhōa Iâ-lō͘-sat-léng kàu-hōe ê lâng.
M̄-koh tī Sèng-keng ê tiong-kan, lán chai-iáⁿ Pí-tek ū chiok-chē sit-pāi ê kò͘-sū.
Iâ-so͘ hō͘ lâng tèng-sí tī si̍p-jī-kè téng chìn-chêng, Pí-tek kā Iâ-so͘ kóng, “Nā it-tēng tio̍h kap lí chòe-hé sí, góa mā choa̍t-tùi bōe m̄ jīn lí!” (Má-khó Hok-im 14:31)
M̄-koh, lán lóng chai-iáⁿ Pí-tek koh lâi chiū beh m̄ jīn Iâ-so͘. “Góa m̄-chai Iâ-so͘ sī siáⁿ lâng!” Che sī Pí-tek kā lâng kóng–ê. Pí-tek si̍t-chāi ûi-pōe Iâ-so͘ ah. Pí-tek bat m̄ jīn Iâ-so͘ saⁿ-pái. Tān-sī, Iâ-so͘ koh-oa̍h liáu-āu, tāi-seng khoe-ho̍k I kap Pí-tek ê koan-hē.
Sī-án-chóaⁿ? Sui-jiân Pí-tek tī hoán-pòe Iâ-so͘ ê bûn-tô͘ ê tiong-kan, m̄-koh, Iâ-so͘ ū sià-bián Pí-tek.
Tī chia lán khòaⁿ tio̍h Iâ-so͘ ê bô-chīn ê thiàⁿ-thàng. Iâ-so͘ ê thiàⁿ si̍t-chāi hiah-nih tōa. Pí-tek ū keng-giām Iâ-so͘ ê sià-bián kah Iâ-so͘ ê khoe-ho̍k. Tān-sī hit khoán ê keng-giām í-āu, Pí-tek koh ū chi̍t pái sit-pāi.
Kin-á-ji̍t ê Sèng-keng kì-lo̍k Iâ-so͘ sià-bián Pí-tek ê kò͘-sū í-āu ê tāi-chì, chiū-sī Iâ-so͘ kap Pí-tek ê tùi-ōe.
Pí-tek it-tēng ū ùī Iâ-so͘ ê sià-bián tit-tio̍h kám-tōng. Iâ-so͘ ê khoe-ho̍k kap sià-bián it-tēng kek-khí Pí-tek hiàn-sin koh khah kian-tēng. Tān-sī Pí-tek beh lia̍h i ka-tī lâi kap kî-thaⁿ ê bûn-tô͘ chò pí-phēng.
Tī 19 chat Iâ-so͘ kā Pí-tek kóng koan-hē bī-lâi ê tāi-chì, sī Pí-tek ōe án-chóaⁿ sí. Lán bô hoat-tō͘ chai-iáⁿ Pí-tek ê siūⁿ-hoat. Tān-sī ē-sái kóng sī Pí-tek bô hoaⁿ-hí thiaⁿ hit khoán ê bī-lâi.
Só͘-í Pí-tek mn̄g Iâ-so͘ koan-hē hit ê hō͘ Iâ-so͘ thiàⁿ-sioh ê bûn-tô͘ ê tāi-chì. “Hit ê bûn-tô͘ ê bī-lâi sī án-chóaⁿ? I ê bī-lâi pí góa ê khah hó á-sī khah bái?” M̄-koh Iâ-so͘ kā Pí-tek kóng, kî-thaⁿ ê bûn-tô͘ ê bī-lâi kap Pí-tek bô kan-sia̍p, kap Pí-tek bô sím-mi̍h koan-hē.
Nā-sī kóng Pí-tek siūⁿ beh tè Iâ-so͘, bô-lūn sím-mi̍h tāi-chì ē hoat-seng, i mā ǹg-bāng kî-thaⁿ ê lâng lâi tè. Chóng–sī. Che sī Pí-tek ê būn-tê, m̄ sī kî-thaⁿ ê lâng ê.
Lán ê sìn-gióng seng-oa̍h ē hoat-seng chiok-chē ê tāi-chì. Góa ê keng-giām ū khó-lêng lí éng-kiú bē keng-giām–tio̍h. Ū ê lâng khó-lêng tú-tio̍h khah giâm-tiōng ê phòa-pēⁿ, chhù-lāi ê būn-tê, á-sī chhia-hō. Ta̍k-ke lóng bô kāng-khoán.
Lán ài ē-kì-tit, bô-lūn lán tú-tio̍h sím-mi̍h tāi-chì, siōng iàu-kín–ê sī lán ài kun-tè Iâ-so͘. Múi chi̍t ê lâng lóng ū te̍k-pia̍t ê sìn-gióng seng-oa̍h teh kun-tè Iâ-so͘. Só͘-í beh pí-phēng ka-tī ê kap kî-thaⁿ ê bô sím-mi̍h ì-sù, kî-si̍t sī bô-chhái-kang.
Tng lán beh the̍h pa̍t-lâng lâi pí-phēng ê sî, lán ê ba̍k-sîn siông-siông ē lī-khui Iâ-so͘. Só͘-í lán ài saⁿ-kap lâi khòaⁿ Iâ-so͘. In-ūi Iâ-so͘ kā lán kóng, “Lí lâi tè góa!”
