Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎做工á人台語工作室
【漢羅】
今á日咱beh紹介–ê是「仙」。Chit ê仙ta̍k ê lóng知影to̍h是神仙，to̍h是講人經過修煉，bē老bē死。Che khah sêng是一種概念，lóng是故事teh講–ê，科學上，無人ē-tàng稽考是真是假，一般咱nā講「伊去做仙–a。」是leh講chit ê人已經離開凡塵，iā to̍h是死–去ah。
當然chit ê仙to̍h ē hông the̍h來做比喻，酒仙，kiáu仙，鴉片仙to̍h是講真愛食酒、poa̍h-kiáu、食毒ê人。假仙，m̄是講人扮做神仙，是leh講人真gâu做表面、真gâu激khong激戇、tìⁿ m̄知按呢。像講：「明明to無kài熟sāi，ta̍k遍見面，to̍h beh假kah ná像真思念按呢，實在有夠假仙。」Mā有講假仙假tak。老劍仙是leh講一 ê人思考周至，經驗豐富，老江湖。話ē-tàng按呢講：「伊he老劍仙，你騙伊bē tio̍h–lah！」
Koh有一種是一寡職業ê稱呼，有尊敬ê意思，親像「相命仙」、「地理仙」。
最後beh講–ê是咱故事內底hit句話，「仙講to m̄聽！」Tī chia ê意思to̍h是khah án-chóaⁿ講攏無效，神仙來mā無法度處理。親像「仙考to考無。」「仙講to̍h講bē了。」「伊真好膽，仙háⁿ to bē驚。」
【Pe̍h-ōe-jī 】
Kin-á-ji̍t lán beh siāu-kài–ê sī “sian.” Chit ê sian ta̍k ê lóng chai-iáⁿ to̍h sī sîn-sian, to̍h sī kóng lâng keng-kòe siu-liān, bē lāu bē sí. Che khah sêng sī chi̍t chióng khài-liām, lóng sī kò͘-sū teh kóng–ê, kho-ha̍k siōng, bô lâng ē-tàng khe-khó sī chin sī ké, it-poaⁿ lán nā kóng “I khì chò sian–a.” Sī leh kóng chit ê lâng í-keng lī-khui hoân-tîn, iā to̍h sī sí–khì-ah.
Tong-jiân chit ê sian to̍h ē hông the̍h lâi chò pí-jū, chiú-sian, kiáu-sian, a-phiàn-sian to̍h sī kóng chin ài chia̍h chiú, poa̍h-kiáu, chia̍h-to̍k ê lâng. Ké-sian, m̄ sī kóng lâng pān chò sîn-sian, sī leh kóng lâng chin gâu chò piáu-bīn, chin gâu kek khong kek gōng, tìⁿ m̄-chai án-ne. Chhiūⁿ kóng: “Bêng-bêng to bô kài se̍k-sāi, ta̍k piàn kìⁿ-bīn, to̍h beh ké kah ná chhiūⁿ chin su-liām án-ne, si̍t-chāi ū kàu ké-sian.” Mā ū kóng ké-sian-ké-tak. Lāu-kiàm-sian sī leh kóng chi̍t ê lâng su-khó chiu-chì, keng-giām hong-hù, lāu kang-ô͘. Ōe ē-tàng án-ne kóng: “I he lāu-kiàm-sian, lí phiàn i bē tio̍h–lah!”
Koh ū chi̍t chióng sī chi̍t kóa chit-gia̍p ê chheng-ho͘, ū chun-kèng ê ì-sù, chhin-chhiūⁿ “siòng-miā sian”, “tē-lí sian”.
Chòe-āu beh kóng–ê sī lán kò͘-sū lāi-té hit kù ōe, “Sian kóng to m̄ thiaⁿ!” Tī chia ê ì-sù to̍h sī khah án-chóaⁿ kóng lóng bô-hāu, sîn-sian lâi mā bô hoat-tō͘ chhú-lí. Chhin-chhiūⁿ “Sian khó to khó bô.” “Sian kóng to̍h kóng bē liáu.” “I chin hó táⁿ, sian háⁿ to bē kiaⁿ.”
