Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎旭傑
咱定定會想，信仰上大ê危機是「迫害」。其實，迫害若來，代誌反轉較單純；因為咱清楚知影，彼是敵對，嘛知影家己一定愛徛hō͘在。毋過，摩西佇申命記13章，提醒百姓一項較不安、嘛較貼近現實ê代誌：上危險ê，往往毋是迫害，是「引誘」。
迫害會hō͘人驚；引誘會hō͘人感覺：「這無啥嚴重啦！」迫害是正面挵著；引誘是慢慢仔hō͘你oai-chhoa̍h（歪斜）去。親像一个teh行路ê人，伊kán-ná無越頭離開原本ê方向，kan-taⁿ是方向小寡仔偏去。起頭無感覺有問題，行久咧，才發現家己已經離目的真遠。真濟時陣，咱毋是某一工hiông-hiông決定毋信主。是佇不知不覺ê中間，hō͘別項代誌，代替上帝，抑是咱家己做主。
申命記13章內面，摩西一擺講出三種上容易hō͘人行oai-chhoa̍h ê情境；毋過，伊不斷質問百姓–ê，其實kan-taⁿ一个問題：「恁敢有盡心、盡性、盡意疼耶和華──恁ê上帝？」這嘛是今仔日咱愛面對ê問題：你，是teh跟綴啥人？
一、若是「屬靈經驗」引誘你離開上帝
摩西頭一个提起ê引誘，毋是對外邦人來–ê，嘛毋是對拜偶像ê敵人來–ê，反轉是對「先知」抑是「做夢ê人」來–ê。佇摩西彼个時代，「先知」kap「做夢ê人」這兩款人攏是百姓公認thang kap上帝交通ê中人。值得咱注意ê是，經文特別加一句：「in所行ê神蹟奇事有實現。」也就是講，這个神蹟毋是假–ê，是真正發生。問題出佇佗位？毋是佇「有準a̍h-sī無準」，是在佇「方向」。因為彼个人紲落來講：「咱來去敬拜服事恁毋識ê神明。」
這hō͘咱一个真重要、嘛真無自在ê提醒：神蹟奇事本身無一定是出佇上帝。咱直覺會先問：「有lêng-siàⁿ–無？」、「有應效–無？」毋過，摩西ài百姓先問一个khah根本ê問題：這个屬靈經驗是欲引導咱順趁上帝，抑是欲引導咱咱一步一步離開伊ê話？
今仔日，可能khah無人會直接對你講：「咱來拜其他ê神明啦。」不而過，引誘定定會用較溫柔、較合理ê款式出現：「只要有效果，應該就是上帝ê祝福。」「我心內若平安，應該就無問題。」「代誌遮爾順利，哪有需要問遮濟？」第3節講kah真清楚：「因為上主──恁ê上帝啲考驗恁。」這个考驗，毋是因為上帝毋知影答案，是欲hō͘咱家己清楚：咱真正信靠ê是上帝本身，抑是咱信靠其實是咱追求ê利益？第4節隨時將焦點giû轉來：「順從、敬畏、謹守、聽從、事奉、緊緊跟隨。」這毋是一時ê屬靈高峰，是一世人ê方向選擇。
佇看起來真lêng-siàⁿ、有效、閣合理ê選擇中間，你，是teh跟綴啥人？
二、若是「親情愛」取代上帝
第二種引誘，閣較困難。因為引誘你ê毋是講台頂ê牧師，是坐佇你ê隔壁、行佇你身邊，甚至是你上疼ê親人：「親兄弟、查某子、懷中ê某、親像家己性命ê朋友。」這个名單，是一个親密程度愈來愈深ê排列。
摩西特別加一句：「暗靜引誘你。」in毋是公開反對上帝，是近倚你、了解你，輕聲細說對你講：「上帝應該會體諒。」「毋免遮爾認真。」「為著咱ê關係，敢會使先放輕鬆一下？」摩西用真重ê話講：「恁毋通聽趁伊，毋通同情，毋通惜伊，嘛毋通掩護伊。」這毋是冷酷無情，是因為摩西知影：若是咱用任何一款關係來取代上帝，彼份愛本身就已經開始變質。奧古斯丁講過：「先疼上帝，你才會知影疼人應該tio̍h按怎疼。」經文毋是反對疼厝內 ê人，是拒絕用「疼」來做成毋順服上帝ê藉口。佇你上珍惜、上毋甘放ê關係中間，你，是teh跟綴啥人？
三、若是「流行文化」成做新ê權威
第三種引誘，可能是壓力上大 ê 。因為這回，引誘你ê毋是一个人，是「一整座城」。對象對個人變做群體，選擇ê情景對私下變做公共生活。經文講「無賴之徒」，無一定是指歹人，這可能是指一種生活狀態；一種無拍算beh hō͘上帝做主ê生活。In無一定大聲反對信仰，只是慢慢仔活做「逐家攏按呢」ê 款。久來，習慣就變做文化。所以經文才要求「細心查問」，因為這已經毋是少數人ê偏差，是生活ê結構出問題。
城tio̍h燒掉、袂使重建，毋是kan-taⁿ審判，是宣告：一个「無掠上帝做中心」 ê 生活模式，袂使hō͘伊繼續落去。這正正是咱今仔日上熟似ê壓力：無人強逼你否認信仰，只是你發現講──若你欲認真跟綴上帝，你會kap人「歹鬥陣」。申命記講kah真明：信仰袂使交hō͘「多數決」。佇「逐家攏按呢」 ê文化大湧中間，你，是teh跟綴啥人？
申命記13章，對頭到尾攏無hō͘咱一套複雜ê分辨技巧。伊是用無仝ê情境，一步一步，將咱chhōa到仝一个問題ê面前。佇屬靈經驗真迷人ê時，佇關係oh-tit拒絕ê時，當文化hō͘你感覺家己無歸屬佇in ê時，上帝干焦問一項代誌：你，是teh跟綴siáng？這毋是欲審判別人，是欲hō͘咱佇上帝面前，誠實徛在ê問題。可能你無公開否認信仰，毋過你略略仔放手、tau̍h-tau̍h-á妥協、慢慢仔將hăn-tó͘-luh交出去。
請會記得：問你「你，是teh跟綴啥人」 ê 彼个上帝，就是當初將你對「做奴才ê所在」chhōa出來 ê上帝。伊毋是佇遠遠ê所在kā你定罪，伊是佇你行oai-chhoa̍h ê時陣，叫你停落來。請你將你tng teh選擇、煩惱ê彼个代誌帶到這个問題：「你，到底是teh跟綴啥人？」
