Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Chū-chiông A-gû-á chek ê sè-hàn kiáⁿ phòa-pēⁿ sí khì liáu-āu, i ê jîn-seng piàn sêng o͘-àm, sim-chêng bô khoài-lo̍k, sin-thé mā án-ne lú-lâi lú soe-lám. I siūⁿ kóng ka-kī koh chia̍h mā bô-jōa-kú ah, ài phah-sǹg kā ē-pòe pun sûi-lâng, khah bián in āu-pái ūi- tio̍h pun châi-sán khí-oan-ke, án-ne tùi í-keng sí ang khó-liân ê sè-hàn sin-pū mā khah ū kau-tài. In-ūi A-gû-á chek ê châi-sán bô chē, chhân-hn̂g chhù-the̍h seng pun hó-sè, chiap-sòa chiah pun kî-thaⁿ ê cha̍p-mi̍h-á.
Hit chi̍t kang, thiⁿ-khì bē-bái, ū chhut ji̍t-thâu, chng–nih ê chhù-piⁿ-á e-e-tīn-tīn lâi khòaⁿ nāu-jia̍t, óaⁿ-pôaⁿ, tiáⁿ-oe-á, ka-chì-á, bí-lôa, pùn-taⁿ… ta̍k hāng lóng pâi pâi chhut-lâi khǹg tī tiâⁿ–nih, tōa-pâng jī-pâng lûn-liû the̍h chi̍t hāng, ta̍k pâng ê tōa-lâng gín-á khiā tī nn̄g-pêng kò͘ ka-kī pun–tio̍h ê mi̍h-kiāⁿ. Tōa-hiaⁿ ê sim-lāi it-ti̍t bô-sóng-khoài, chhùi–nih put-sî teh ngāu-ngāu-liām, “sī-án-chóaⁿ tōa-pâng bô pun khah chē leh… .”
Lûn kàu pun kiâm-chhài ê sî, tōa-hiaⁿ khiā tī pí lâng khah koân ê kiâm-chhài-tháng téng-bīn, hoah, “tōa-pâng chi̍t châng, jī-pâng chi̍t châng …” , tōa-hiaⁿ lú pun lú siū-khì, khòaⁿ-tio̍h tē-hū-á ê cha-bó͘-kiáⁿ mā óa lâi tàu khioh kiâm-chhài, chiū sim-kông-hóe-to̍h the̍h chi̍t châng kiâm-chhài siàng tùi cha-bó͘ gín-á lo̍h-ĕ, hāi i ê bīn kap saⁿ-á-khò͘ phùn kah choân kiâm-chhài-chiap, i ê hīⁿ-khang koh thiaⁿ-tio̍h a-peh tōa siaⁿ hoah kóng, “sí cha-bó͘ gín-á chiah sè-hàn tō ē-hiáu ài mi̍h-kiāⁿ ! ”
Chit ê pi-siong ê kì-tî it-ti̍t tòe chit-ê cha-bó͘ gín-á chi̍t-sì-lâng, i ê a-peh bô-ì-tiong khì siong-hāi tio̍h gín-á ê sim, chit-má hiō-hóe mā bē-hù ah !
