Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎久保光彥
Iâ-so͘ kā i kóng, “Góa sī koh-oa̍h, sī oa̍h-miā; sìn góa ê lâng sui-jiân sí, iáu-kú ōe oa̍h. Só͘-ū hiān-chāi teh oa̍h lâi sìn góa ê lâng éng-oán bōe sí. Lí ū sìn bô?” Má-tāi ìn kóng, “Chú ah, góa sìn lí sī Ki-tok, sī hit-ūi teh-beh lâi sè-kan ê Siōng-tè ê Kiáⁿ.” (Iok-hān Hok-im 11:25-27)
Lâng lóng ē sí–khì. Siōng-tè chhòng-chō chit ê sè-kài, kàu-taⁿ, lán lóng bô-hoat-tō͘ siám-pī chit-ê būn-tê. In-ūi A-tong ê hoān-chōe, í-āu ê lâng pau-hâm lán lóng tio̍h-ài keng-giām sí.
Sù-tô͘ Pó-lô tī Lô-má Su 5:12-14 kóng, “Chōe tùi chi̍t ê lâng chìn-ji̍p sè-kan, sí mā tè–ji̍p-lâi; kiat-kó, só͘-ū ê lâng lóng ōe sí, in-ūi só͘-ū ê lâng lóng ū hoān-chōe. Iáu-bē ū Lu̍t-hoat í-chêng, chōe í-keng tī sè-kan; put-kò bô Lu̍t-hoat, chōe chiū bô sǹg-chòe chōe. M̄-kú tùi A-tong kàu Mô͘-se hit-tōaⁿ kî-kan, sí teh chi-phòe choân jîn-lūi, liân bô hoān-tio̍h A-tong só͘ hoān ê kè-sit ê lâng mā tio̍h sí. A-tong sī teh-beh lâi Hit-ūi ê ū-piáu.”
Kin-á-ji̍t lán beh lâi khòaⁿ Iok-hān tē 11 chiuⁿ, lāi-té ū Iâ-so͘ hō͘ Lia̍p-sat-lō͘ tùi sí koh-oa̍h ê kò͘-sū. Che sī Sin-iok Sèng-keng tiong-kan siōng chhut-miâ ê kò͘-sū ê chi̍t-ê.
Thong-kòe Iâ-so͘ hō͘ Lia̍p-sat-lō͘ koh-oa̍h ê kò͘-sū, kà-sī lán I chiū-sī chin-chiàⁿ ê koh-oa̍h kap oa̍h-miā. Iâ-so͘ kā Lia̍p-sat-lō͘ ê a-ché kóng, “Só͘-ū hiān-chāi teh oa̍h lâi sìn góa ê lâng éng-oán bōe sí.”
Lán ē-sái kóng sí ū nn̄g khoán ê ì-sù. Tē-it to̍h-sī chū-jiân ê sí. Tē-jī to̍h-sī lêng-sèng-tek ê sí. Lán beh lâi thó-lūn tē-jī-ê ê ì-sù.
Lêng-sèng-tek ê sí sī siáⁿ-mi̍h? Kap chū-jiân ê sí ū siáⁿ-mi̍h chha-pia̍t?
Chū-jiân ê sí chiū-sī khòaⁿ-ē-tio̍h–ê. Lêng-sèng-tek ê sí sī khòaⁿ-bē-tio̍h–ê. Mā ē-sái kóng chū-jiân-tek ê sī gōa-bīn ê, lêng-sèng-tek chiū-sī lāi-chāi ê.
Lán lóng ē keng-giām chū-jiân-tek ê sí. Che sī bô hoat-tō͘ tô-siám–ê. M̄-koh lêng-sèng-tek ê sí m̄-sī lán lóng tio̍h keng-giām–ê. Lí nā sī sìn Iâ-so͘, lí tō͘ m̄-bián keng-kòe chit tē-jī-ê ê sí. In-ūi Iâ-so͘ tī chia án-ne kóng: “Só͘-ū hiān-chāi teh oa̍h lâi sìn góa ê lâng éng-oán bōe sí.” In-ūi thong-kòe I ê si̍p-jī-kè kap koh-oa̍h, Iâ-so͘ hō͘ lán lī-khui tē-jī-ê sí ê sok-pa̍k.
Taⁿ, lán tio̍h koh-chi̍t-pái lâi sàm-su Iâ-so͘ ê ōe. Iâ-so͘ kā lán kóng, Sìn Iâ-so͘ ê lâng éng-oán bē sí.
Lán koh-chài siūⁿ koan-hē sìn Iâ-so͘ chit chân tāi-chì. Góa nā kóng, “Góa siong-sìn sè-kan ū chi̍t chióng kha chin tōa ê koài-bu̍t. Lí siūⁿ án-chóaⁿ?” Lí ū khó-lêng siūⁿ kóng, eh, he sī bô sím-mi̍h iàu-kín ê tāi-chì. In-ūi tùi ū ê lâng lâi kóng, chit khoán ê koài-bu̍t bô-lūn ū chûn-chāi á-sī bô chûn-chāi, lóng bô sím-mi̍h ì-sù. M̄-koh, lâng beh sìn Iâ-so͘ á-sī m̄-sìn, che sī kap he bô kāng-khoán ê būn-tê. Iâ-so͘ ê chûn-chāi chin-chiàⁿ sī koan-hē lán ê oa̍h kap sí.
Lán nā kóng lán sìn Iâ-so͘, lán chiū-sī choân-sim choân-ì óa-khò Iâ-so͘. Sìn Iâ-so͘ sī chhin-chhiūⁿ Iâ-so͘ thiàⁿ lán, lán mā beh thiàⁿ ka-tī, thiàⁿ chhù-piⁿ, thiàⁿ Siōng-chú. Sìn Iâ-so͘ chiū-sī sêng-jīn Iâ-so͘ sī lán ê Chú, sêng-jīn lán nā bô Iâ-so͘, lán chin-chiàⁿ bô ǹg-bāng. Sìn Iâ-so͘ chiū-sī lán beh ūi-tio̍h Siōng-chú ê kok lâi kòe lán ê seng-oa̍h. Sìn Iâ-so͘ chiū-sī chhòng-chō chit khoán ê seng-oa̍h, beh piáu-sī tî-liáu Iâ-so͘ í-gōa, sè-kan bān-hāng tāi-chì lóng bô sím-mi̍h kè-ta̍t. Sìn Iâ-so͘ chiū-sī hoân-sū thang kau-thok hō͘ Iâ-so͘.
Hit khoán ê lâng éng-oán bē keng-kòe lêng-sèng-tek ê sí. Che sī Iâ-so͘ siúⁿ-sù hō͘ lán ê te̍k-pia̍t ê chiok-hok.
